Higni 3,500 mokalo ka pok Jo-Israel nodonjo e Piny ma Nosingi, Nyasaye nowacho ni nodhi ritogi mondo kik giyud “tuoche maricho” kaka ma ne nitie Misri. (Rapar mar Chik 7:15) Achiel kuom yore ma noritogigo en miyogi chike ma ne tayo weche ler kod geng’o tuoche. Kuom ranyisi:

•   Chike ma ne tayo Jo-Israel ne dwaro ni gilwokre kendo gilwok lepgi bende.​—Tim Jo-Lawi 15:4-27.

•   Nyasaye nonyisogi gima nonego gitim gi losruok dhano. Nowacho kama: “Neuru ni ubedo gi kar losruok oko mar kambi, kendo kuno e ma ubiroga dhiye. Rapur nyaka bed achiel kuom gigeni mag tich. Ka idhi losori oko, ne ni ikunyo bur gi rapurno, kae to ium losruokni.”​—Rapar mar Chik 23:12, 13.

•   Joma ne nigi tuoche ma landore ne ipogo gi jowetegi kuom kinde. Ka ne gisechango, ne nyaka gilwokre kendo gilwok lepgi e ka kwan-gi kaka joma ler. Bang’ mano, koro ne inyalo yienegi kikore gi oganda.​—Tim Jo-Lawi 14:8, 9.

•   Ng’ato ang’ata ma ne omulo ringre mosetho​—obed mar le kata mar dhano​—ne nyaka pog gi jowetene kuom kinde.​—Tim Jo-Lawi 5:2, 3; Kwan 19:16.

 Chike ma ne tayo Jo-Israel e rito ler noting’o weche ma josayans noduogo ofwenyo mana higni mang’eny bang’e.

 Ogendni mamoko to ne kia weche ler. Kuom ranyisi:

•   Yugi nikeyo akeya e nderni. Pi molil, chiemo ma ok ler, kod yugi mamoko ne miyo ji tuore ahinya, kendo nyithindo matindo be ne tho ao yaye.

•   Lakteche machon ne ok ong’eyo kute ma ne kelo tuoche, to kata moko kuomgi ma nong’eyo kutego ne nigi lony matin ahinya. Jo-Misri ne tiyo gi gik ma luwogi kaka yath: Remb ogwe kata olele, chieth winyo miluongo ni pelican, oyieyo motho, lach, kod makate mosekethore. Losruok dhano kod mar le be ne ojatigo e weche thieth.

•   Jo-Misri machon ne yudoga tuoche mang’eny nikech pi mochido ma ne yudore e Aora Nael kod mtaro ma ne tero pi aorano e puothe. Bende, nyithi Jo-Misri mang’eny notho nikech diep kod tuoche mamoko ma biro nikech chamo chiemo ma ok ler.

 Ngima Jo-Israel ne dhi maber moloyo ogendni mamoko nikech ne giluwo chike ma ne Nyasaye omiyogi.