SIKURU KA UNENO!
2022: Higa ma Nopong’ gi Tungni—Ang’o ma Muma Wacho?
E higa mar 2022, ute fwambo gi keyo ne nigi ripode mang’eny ma wuoyo kuom lwenje, pek mag yuto, kod masiche ma timore e alwora. Muma kende e ma lero gimomiyo gik marichogo timore.
Gimomiyo gik maricho notimore e higa mar 2022
Gik maricho ma notimore e higa mar 2022 nyiso maler ni wadak e kinde ma Muma luongo ni, “ndalo mag giko.” (2 Timotheo 3:1) Ndalo mag giko nochakore e higa mar 1914. Ne ane kaka gik mosebedo ka timore chalre gi gik ma Muma nokoro ni ne dhi timore e ndalowagi:
“Lwenje.”—Mathayo 24:6.
“Higa mar 2022 En Higa ma Lwenje Nochakoree Kendo e Piny Ulaya.” a
Ne sula ma wacho ni, “Russia Omonjo Ukraine.”
‘Nok mar chiemo.’—Mathayo 24:7.
“2022: Higa ma Kech Nomedoree Ahinya.” b
Ne sula ma wacho ni, “Lweny ma Ukraine Omedo Nok mar Chiemo e Piny Ngima.”
“Tuoche ma landore.”—Luka 21:11.
“Tuoche kaka polio, monkeypox, kod korona nodhi nyime hinyo ji mang’eny, to mano nyiso kaka ngima dhano pod ni kama tek ahinya nikech tuoche ma landore.” c
Ne sula ma wacho ni, “Ji Milion 6 Osetho Nikech Tuo mar Korona.”
“Gik ma kelo luoro.”—Luka 21:11.
“Liet mar piny, oro, mach ma muoch kendgi e bunge, kod ohula nokwako kuonde mang’eny. Higa mar 2022 ibiro par kaka higa ma lokruok mag kor lwasi nokeloe masiche mang’eny kendo nego ji alufe gi alufe, kaachiel gi daro ji tara gi tara e miechgi.” d
Ne sula ma wacho ni, “Piny Sani Liet Moloyo Kinde Moro Amora Mosekalo.”
“Tungni.”—Luka 21:9.
“Raia mang’eny ne nigi mirima nikech pek mag yuto kod nengo moidho, to mano nomiyo ng’anyo obedo mang’eny e higa mar 2022 moloyo higa moro amora mosekalo.” e
Ne sula ma wacho ni, “Nengo Gik Moko Medo Idho Ahinya.”
Higa mabiro dhi chalo nade?
Onge ng’ama ong’eyo gik ma biro timore e higa mar 2023. Gima wang’eyo en ni machiegnini, Pinyruodh Nyasaye ma en sirkal manie polo, biro kelo lokruok maduong’ e pinyni. (Daniel 2:44) Sirkandno biro tieko ne dhano chandruoge duto, kendo neno ni dwach Nyasaye otimore e piny.—Mathayo 6:9, 10.
Yesu Kristo nowacho kama: “Sikuru ka uneno.” (Mariko 13:37) Wajiwi ni itim kaka nowachono sama ineno ka gik ma timore e pinyni chopo weche ma nokor e Muma. Tudri kodwa mondo ipuonjri kaka Muma nyalo konyi sani, kod kaka onyalo miyo ibed gi geno mar dak maber e kinde mabiro kaachiel gi joodu.
a AP News, “2022 Was Year the Horror of War Returned to Europe,” mondik gi Jill Lawless, Desemba 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” mondik gi Lawrence O. Gostin, JD, Septemba 22, 2022.
d Earth.Org, “What’s Behind the Record-Breaking Extreme Weather Events of Summer 2022?” mondik gi Martina Igini, Oktoba 24, 2022.
e Carnegie Endowment for International Peace, “Economic Anger Dominated Global Protests in 2022,” mondik gi Thomas Carothers kod Benjamin Feldman, Desemba 8, 2022.
Samoro Inyalo Hero Magi Bende
OHINGA MAR JARITO
Nyasaye Chiegni Tieko Chandruok Duto
Wang’eyo nade ni Nyasaye chiegni tieko chandruok kod gik maricho duto?
ESSENTIAL BIBLE TEACHINGS
Pinyruodh Nyasaye En Ang’o?
Kinde duto ma Yesu ne yalo, nojapuonjo ji wach Pinyruodh Nyasaye nyading’eny moloyo wach moro amora. Ji osebedo kalemo kuom higni mang’eny mondo pinyruodhno obi.
PUONJ MADONGO MAG MUMA
Pinyruodh Nyasaye Nochako Locho e Higa mar 1914
Higni mokalo 2,600, Nyasaye nomiyo ruoth moro man gi teko lek moro ma chopo e kindewagi.
WECHE E WIWA
Kwa Mondo Opuonji Muma Nono ma Onge Chudo
Yud puonjruok Muma ma onge chudo e sa mowinjore kodi kendo e kama ihero.
