Zekaria 14:1-21
14 “Neuru! Ndalo biro, mana ndalo mar Jehova, ndalo ma ji biro yako mwandu magu* kendo pogogi e wang’u.
2 Abiro choko ogendni duto mondo giked gi Jerusalem. Dalano ibiro maki, mon ibiro nindgo gi thuon, kendo utene ibiro pe. Nus mar jo ma odak e dalano ibiro ter e tuech, to nus modong’ ok bi gol e dalano.
3 “Jehova biro wuok mondo oked gi ogendnigo+ mana kaka okedoga e ndalo lweny.+
4 Chieng’no tiende biro chung’ e wi Got Zeituni,+ momanyore gi Jerusalem yo wuok chieng’; kendo godno biro barore diere chakre yo wuok chieng’ nyaka yo podho chieng’,* mi enolos hoho maduong’; nus mar godno biro sudo yo nyandwat, to nusne modong’ biro sudo yo milambo.
5 Ubiro ringo ka uchiko e hoho mar godena, nimar hoho mar gode biro chopo nyaka Azel. Ubiro ringo mana kaka ne uringo ka ne piny oyiengni e ndalo ma Uzia ne locho e wi Juda.+ Kendo Jehova Nyasacha nobi, kaachiel gi jo maler duto.+
6 “Chieng’no, ler mugeno ok nobedie+—gik moko notho thudhno.
7 Odiechieng’no biro ng’ere kaka odiechieng Jehova.+ Ok nobed gi odiechieng’ kata gi otieno; kendo lerne biro siko kata e seche mag odhiambo.
8 Chieng’no pi mar ngima+ biro mol koa Jerusalem,+ nus mar pigno biro mol kochomo nam man yo wuok chieng’,*+ to nus machielo biro chomo nam man yo podho chieng’.*+ Enobed kamano e ndalo chwiri kod ndalo oro.
9 Kendo Jehova nobed Ruoth e wi piny mangima.+ Chieng’no Jehova biro bedo achiel,+ kendo nyinge nobed achiel.+
10 “Piny duto biro chalo gi Araba,+ chakre Geba+ nyaka Rimon+ man yo milambo mar Jerusalem. Ibiro ting’e malo kendo noduoke ka ma ne entiere, mi ji nodag e iye,+ chakre Ranga Benjamin+ nyaka e Rangach Mokwongo, kendo nyaka e Rangach ma Tung’, koa e Ohinga mar Hananel+ nyaka kuonde ma ibiyoe mzabibu mag ruoth.
11 Ji biro dak e iye; kuong’ mar kethruok ok nobedie kendo,+ kendo ji nodag e Jerusalem gi kuwe.+
12 “Ma e masira ma Jehova biro goyogo ogendni duto ma biro kedo gi Jerusalem:+ Ringre ng’ato biro tow ka pod ochung’ gi tiende, wang’e biro tow e ode, kendo lewe biro tow e dhoge.
13 “Chieng’no Jehova biro kelo chochni e kindgi; kendo ng’ato biro mako lwet nyawadgi kae to gigore.+
14 Juda bende biro kedo gi Jerusalem; kendo ibiro chok mwandu mag ogendni mokiewo kodgi. Gibiro choko dhahabu, fedha, kod lewni mang’eny.+
15 “Masira ma kamano bende nogo farese, nyumbu,* ngamia, punde, gi jamni duto manie kambi.
16 “Jogo duto modong’ kuom ogendni ma nobiro kedo gi Jerusalem nodhi ir Ruoth, ma en Jehova Nyasach oganda lweny+ higa ka higa+ mondo gikulrene,* kendo mondo gitim nyasi mar Sap Kiche.+
17 To ng’ato ang’ata moa e dhoudi mag piny ma ok odhi Jerusalem mondo okulre ne Ruoth Jehova Nyasach oganda lweny, koth ok bi chue e pinygi.+
18 Ka dhood Misri ok obiro, koth ok bi chuenegi. Kar mano, Jehova biro goyogi gi masira ma ne ogoyogo ogendni ma ne ok obiro e Sap Kiche.
19 Mano e kum ma ibiro kum-go Misri kaachiel gi ogendni duto ma ok obiro e Sap Kiche.
20 “Chieng’no okot manie ng’ut farese ibiro ndik ni, ‘Ler en mar Jehova!’+ Kendo agulni mitedogo+ man e od Jehova nochal gi bakunde+ manie nyim kendo mar misango.
21 Agulni duto mitedoe man Jerusalem kod Juda nobed maler kendo mowal ni Jehova Nyasach oganda lweny, kendo ji duto ma timo misengni nodonji mi ginichweki e agulni moko. E odiechieng’no Ja-Kanaan* moro amora ok nochak obedie e od Jehova Nyasach oganda lweny.”+
Weche Moler Piny
^ Tiende ni, Jerusalem.
^ Hibrania, “nyaka yo nam.”
^ Tiende ni, Nam Mediterania.
^ Tiende ni, Nam Chumbi.
^ Nyumbu en le ma punda onyuolo gi faras.
^ Kata, “gilame.”
^ Kata nyalo bedo, “jalok ohala.”
