Zaburi 60:1-12
Ne jatend wer. Wendni onego ower gi dwol mar “Ondanyo mar Rapar.” Miktam.* Zaburi mar Daudi. Mipuonjogo ji. Ka ne okedo gi Aram-naharaim kod Aram-Zoba, kendo ka ne Joab oduogo monego Jo-Edom e Hoho mar Chumbi.+
60 A Nyasaye, isewitowa; isemiyo olowa.+
Mirima osemaki kodwa, to koro yie waduog iri.
2 Isemiyo piny otetni mobarore,To koro wakwayi ni ilos kuonde mobarorego nikech ochiegni kethore chuth.
3 Isemiyo jogi oyudo chandruoge mathoth,Adier, isemiyo wamadho divai ma koro wakwang’ ka jo momer.+
4 Mi ane* jo moluori ranyisi,Mondo giring atunge mibayogigo. (Sela)
5 Reswa gi lweti ma korachwich kendo winj lamowa,Mondo jo ma ihero owuog e chandruok.+
6 Nyasaye osewuoyo e lerne:*
“Abiro locho, kendo abiro pogo Shekem ne joga,+Kendo pimonegi Hoho mar Sukoth.+
7 Gilead gi Manase gin maga,+Efraim en oguta;To Juda en ludha mar loch.+
8 Piny Moab en besen mara mar lwok.+
To e piny Edom e ma abiro boloe wuochena.+
Piny Filistia e ma abiro kokie ka aselocho.”+
9 A Nyasaye, ng’ano ma biro tera e dala ma omonji?*
En ng’ano ma notelna ka tera Edom?+
10 Donge en mana in misewitowani?
Yaye Nyasachwa, donge tinde ok idhi kodwa e lweny?+
11 Konywa e chandruokwa,Nimar kony ma dhano chiwo en kayiem nono.+
12 Nyasaye biro miyowa teko,+Kendo obiro nyono wasikwa.+
Weche Moler Piny
^ Som Tiend Weche.
^ Kata nyalo bedo, “Isemiyo.”
^ Kata nyalo bedo, “osewuoyo e kar dakne maler.”
^ Kata nyalo bedo, “e dala mochiel motegno?”
