Tich Joote 19:1-41
19 E ndalo ma Apolo+ ne ni Korintho, Paulo ne wuotho e gwenge man mabor gi nam kendo ne odhi nyaka Efeso.+ Kanyo noyudoe jopuonjre moko
2 mi nopenjogi kama: “Be ne uyudo roho maler sa ma ne urwako yie?”+ Ne gidwoke niya: “Pok ne wawinjoe ngang’ wach moro amora e wi roho maler.”
3 Omiyo, nopenjogi kama: “Kare ne obatisu e batiso mane?” Ne gidwoke niya: “E batiso mar Johana.”+
4 Paulo nowachonegi kama: “Johana ne batiso ji gi batiso ma ne nyiso ni giloko chunygi+ kowacho ne ji mondo giyie kuom jal ma ne dhi luwo bang’e,+ ma en Yesu.”
5 Bang’ winjo mano, ne obatisgi e nying Ruoth Yesu.
6 To ka Paulo noketo lwete kuomgi, roho maler nobironegi+ mi ne gichako wacho dhok ma welo kendo ne gikoro wach.+
7 Giduto ne gin chwo 12 kama.
8 Bang’ donjo e sunagogi,+ noyalo gi chir kuom dweche adek, kogolo twege kendo kogoyo mbaka e wi wach Pinyruodh Nyasaye kendo ne otimo kamano e yo mong’ith.+
9 To ka chuny jomoko kuomgi nodoko matek mi gitamore yie ka giwuoyo marach kuom Yorno*+ e nyim oganda, Paulo ne owere kodgi+ mi nogolo jopuonjre kanyo. Ne ojagolo twege pile ka pile e od romo mar skul mar Turano.
10 Notimo kamano kuom higni ariyo nyaka Jo-Yahudi kod Jo-Grik duto ma nodak e alwora mar Asia nowinjo wach Ruoth.
11 Kendo Nyasaye nomedo konyo Paulo motimo tije madongo miwuoro.+
12 Kata mana otamba kod lewni ma ne osemulo dend Paulo ne itero ne jotuo+ kendo ne gichango. Jochiende bende ne wuok kuom ji.+
13 To moko kuom Jo-Yahudi ma ne wuotho ka gigolo jochiende bende notemo tiyo gi nying Ruoth Yesu kuom jo ma ne nigi jochiende. Ne gijowacho kama: “Akweri matek e nying Yesu ma Paulo yalo.”+
14 Koro ne nitie yawuoyi abiriyo mag jatend-jodolo ma nyinge Skewa, ma bende ne timo kamano.
15 To jachiendno nowachonegi kama: “Ang’eyo Yesu,+ to Paulo bende alonygo.+ Un to un jomage?”
16 Eka jal ma ne nigi jachienno nochikore kuomgi, mokedo kodgi nyaka noloyogi, mi ne giringo duk ka giwuok ei odno ka gihinyore.
17 Wachno nolandore ne ji duto nyaka ne Jo-Yahudi kod Jo-Grik ma nodak Efeso. Luoro nomakogi giduto, kendo nying Ruoth Yesu nomedo yudo duong’.
18 Thoth jo ma noserwako yie ne biroga kendo ne gihulo timbegi ayanga.
19 Kuom adier, ji mogwaro ma ne timo timbe juok nochoko bugegi mi giwang’ogi e nyim ji duto.+ Kendo ne gigoyo kwan mi giyudo ni nengogi romo fedha 50,000.
20 Kuom mano, wach Jehova* nomedo landore kendo bedo gi teko maduong’ ahinya.+
21 Ka gigo nosetimore, Paulo nong’ado e chunye ni bang’ kalo Makedonia+ kod Akaya, obiro dhi Jerusalem.+ Nowacho kama: “Bang’ dhi kuno, abiro dhi Rumi bende.”+
22 Omiyo, nooro Timotheo+ kod Erasto+ ma gin moko kuom jo ma ne konye mondo gidhi Makedonia, to en owuon ne odong’ e alwora mar Asia kuom kinde.
23 Gie kindeno, koko nomuoch+ kuom wach Yorno.*+
24 Ne nitie ng’at moro ma nyinge Demetrio ma ne en jathedh gik moko kotiyo gi fedha kendo ne okeloga ohala mang’eny ne jotheth kuom thedho hekalu matindo mag Artemi kotiyo gi fedha.+
25 Nochoko jothethgo gi jomamoko ma ne tiyo tije kaka mago mowachonegi niya: “Osiepena, ung’eyo maber ni tijni osebedo ka miyowa ohala mang’eny.
26 Koro useneno kendo usewinjo kaka Pauloni osesemo oganda mang’ongo mi olokogi komiyo gibedo gi paro machielo, kowacho ni nyiseche molos gi lwedo ok gin nyiseche,+ to osetimo kamano, ok mana e Efeso+ kende, to chiegni ni e alwora duto mar Asia.
27 E wi mano, wachno ok bi ketho mana tijwani kende, to bende obiro miyo ji ocha hekalu mar Artemi* nyasaye maduong’ mi gikawe ka gima nono. Kae to lamo kod duong’ ma ji manie alwora duto mar Asia kod piny mangima miye, biro bedo kayiem nono.”
28 Bang’ winjo mano kendo pong’ gi mirima, jogo nochako kok niya: “Artemi mar Jo-Efeso duong’!”
29 Omiyo, dalano ne ochacho gi koko kendo ji duto ne oringo modonjo kar tuke ka giywayo Gayo gi Aristarko+ ma ne gin Jo-Makedonia ma ne jowuotho gi Paulo.
30 To Paulo ne dwaro donjo iye kama ji ne nitie, kata kamano jopuonjre ne ok oyiene.
31 To kata mana jotelo ma ne chano nyasi kod tuke kendo ma ohero Paulo, noorone wach ka gisaye ni kik odonj kar tuke di po ka ohinye.
32 Adiera en ni, jomoko ne kok e wi wach moro, to moko e wi wach machielo; nimar ogandano duto ne ochochni, kendo thothgi ne ok ong’eyo gimomiyo ne gibiro kanyachiel.
33 Omiyo, Jo-Yahudi ne odhiro Aleksander e nyim ji, eka Aleksander ne orieyo lwete kodwaro kueyo oganda mondo owuo kodgi.
34 To ka ne gifwenyo ni ne en Ja-Yahudi, giduto ne gikok kanyachiel kuom seche ma dirom ariyo ka giwacho niya: “Artemi mar Jo-Efeso duong’!”
35 Gikone ka jatend dalano nosekueyo oganda, nowachonegi kama: “Yaye un Jo-Efeso, be nitie ng’at ma ok ong’eyo ni dala mar Jo-Efeso e ma orito Artemi ma nigi duong’ kod mar sanamu ma ne olwar koa e polo?
36 Nikech mago gin weche ma ok nyal kwedi, onego ukuwe mos kendo kik urikni kawo okang’.
37 Nimar usekelo jogi kae to ok gisekwalo hekalu, bende ok gichayo nyasachwa.*
38 Omiyo, ka Demetrio+ kod jotheth man kode nigi wach moro gi ng’ato, nitie odiechienge moketi mag yalo bura, to bende nitie jodongo ma ginyalo teronegi weche.
39 To ka po ni nitie gimoro momedore ma umanyo, nyaka to ng’ad wachno e romo mar chokruok mapile.
40 Nikech kuom adier, kaluwore gi gima otimore kawuononi, yot mondo odonjnwa gi ketho mar ng’anyo ne sirkal nikech waonge gi gimoro amora ma wanyalo wacho ni osemiyo ogandani obedo ma achach kama.”
41 Eka bang’ wacho wechego, nogonyo ogandano.
Weche Moler Piny
^ Tiende ni, kit ngima mar Jokristo kod puonj ma giluwo.
^ Som Apendiks A5.
^ Tiende ni, kit ngima mar Jokristo kod puonj ma giluwo.
^ Tiende ni, nyasaye ma dhako.
^ Tiende ni, nyasaye ma dhako.
