Tich Joote 15:1-41
15 Koro jomoko noa Judea mi gichako puonjo owete niya: “Ka ok oteru nyangu kaluwore gi chik Musa,+ to ok unyal yudo warruok.”
2 To ka jogo nosebedo gi mbaka matek mi giyware ahinya gi Paulo kod Barnaba kuom wachno, ne ochan mondo Paulo gi Barnaba kod jomamoko kuomgi odhi ir joote gi jodongo man Jerusalem+ mondo olos wachno.
3 Omiyo, bang’ ka kanyakla nosekowogi matin, jogi ne odhi nyime gi wuodhgi ka gikadho e piny Foinike gi Samaria, ka gihulo adimba kaka jo ma oa e ogendni mamoko ne olokore mi giyie kuom Nyasaye, kendo mano nomiyo owete duto obedo gi mor mogundho.
4 Kane gichopo Jerusalem, kanyakla, gi joote, kod jodongo, norwakogi maber ahinya, kendo Paulo gi Barnaba ne onyisogi gik mang’eny ma Nyasaye nosetimo kokalo kuomgi.
5 To moko kuom jo ma noserwako yie, ma chon ne ni e dind Jo-Farisai, ne oa malo e kombegi mi giwacho niya: “Owinjore otergi nyangu kendo ochikgi mondo girit Chik Musa.”+
6 Kuom mano, joote gi jodongo nochokore mondo ginon wachno.
7 Ka ne gisewuoyo matut e wi wachno, Petro ne oa malo mowachonegi niya: “Owetena, ung’eyo maber ni chakre chon, Nyasaye ne oyiera e kindu mondo ayal ne ogendni mamoko wach maber kendo girwak yie.+
8 Kendo Nyasaye mong’eyo chuny dhano,+ nonyiso ni oyie kodgi kuom miyogi roho maler+ mana kaka wan bende nomiyowa.
9 Bende, Nyasaye ne ok onyiso ni nitie pogruok kata matin e kindwa kodgi,+ to ne opwodho chunygi nikech yiegi.+
10 Kare ang’o momiyo utemo Nyasaye ka uketo kuom jopuonjre ting’ mapek+ ma kwerewa ne ok nyal ting’o, to kata wan bende ok wanyal ting’o?+
11 Mopogore gi mano, wan gi yie ni ng’wono mogundho mar Ruoth Yesu miyo iresowa+ mana kaka gin bende iresogi.”+
12 Eka jogo duto ne oling’ thi mi ne giwinjo Barnaba gi Paulo ka nyisogi kaka Nyasaye nokonyogi mi gitimo ne ogendni mamoko honni mang’eny kod tije madongo.
13 Kane gisetieko wuoyo, Jakobo nowacho kama: “Owetena, winjauru.
14 Simeon+ oselero adimba kaka Nyasaye koro noparo jo ma oa e ogendni mamoko mondo okaw kuomgi jo ma iluongo gi nyinge.+
15 Kendo weche ma Jonabi nokoro nyiso mano mana kaka ondik niya:
16 ‘Bang’ wechegi, anaduog kendo mondo achung hema* mar Daudi ma nosepodho; anager kendo kuonde momukore kuome, mi anaduoke kaka ne en chon,
17 eka mondo jo ma odong’ omany Jehova* gi kinda kaachiel gi jo ma oa e ogendni duto ma gin jo ma iluongo gi nyinga, Jehova* ma timo gigi osewacho,+
18 ma gin gik ma ne oseng’ere chakre chon.’+
19 Kuom mano, gima an ang’ado en ni mondo kik chand jo ma oa e ogendni mamoko ma sani lokore mondo giyie kuom Nyasaye,+
20 to mondo ondiknegi giwere gi gik ma sanamu osedwanyo,+ giwere gi terruok,*+ gi gik mode,* kod remo.+
21 Nyaka a chon, ji osegabedo ka yalo weche ma Musa nondiko e dala ka dala, nikech isomo wechego e sunagoke sabato ka sabato.”+
22 Eka jootego gi jodongo kaachiel gi kanyakla duto nong’ado mondo gior jomoko moyier e kindgi, mondo jogo odhi Antiokia ka gin gi Paulo kod Barnaba. Ne gioro Juda ma ne iluongo ni Barsaba, kod Sila,+ ma ne gin jo ma tayo e kind owete.
23 Weche ma ne gindiko mi giorogigo e magi:
“Wan joote gi jodongo ma oweteu, wandikonu un owetewa man Antiokia+ gi Siria kod Kilikia, un ma ua e ogendni mamoko: Wamosou!
24 Nikech wasewinjo ni jomoko noa kuomwa mi gichandou gi wechegi ka gitemo lokougo,+ kata obedo ni ne ok wachikogi ni gitim kamano.
25 Koro wasechopo e paro achiel ni waornu Barnaba gi Paulo ma gin owetewa ma wahero, kod jomamoko ma waseyiero.
26 Gin jo ma osechiwo ngimagi nikech nying Ruodhwa Yesu Kristo.+
27 Kuom mano, waoronu Juda gi Sila mondo gin bende gihul mana wechego gi dhogi.+
28 En dwaro marwa kod mar roho maler+ ni kik wamednu ting’, mak mana gik ma dwaroregi:
29 ni uweru gi gik motimgo misango ne sanamu,+ gi remo,+ gi gik mode,*+ kod terruok.*+ Ka uritoru chuth kuom gigo, weche biro dhinu maber. Oritiuru!”
30 Omiyo, ka nosegonygi, ne gidhi Antiokia mi gichoko jopuonjre duto mondo gimigi baruano.
31 Bang’ some, ne gimor ahinya gi jip ma ne giyudono.
32 Kendo Juda gi Sila ma bende ne gin jonabi nojiwo owete mi gitegogi kuom golonegi twege mang’eny.+
33 Bang’ bet kuno kuom ndalo moko, owetego noweyogi mondo gidog gi kuwe ir jo ma ne oorogi.
34 *—
35 To Paulo gi Barnaba nodong’ Antiokia, kaachiel gi jomamoko mang’eny, ka gipuonjo kendo ka gilando wach maber mar Jehova.*
36 Bang’ ndalo moko, Paulo nowacho ne Barnaba kama: “Chutho chutho, koro wadoguru mondo walim owete e mier duto ma ne wayaloe wach Jehova* mondo wane ane ni to gidhi nade.”+
37 Barnaba noramo ni gidhi gi Johana ma bende ne iluongo ni Mariko.+
38 Paulo to ne ok dwar ni Mariko odhi kodgi nikech Mariko noweyogi Pamfulia mi ok nodhi kodgi e tijgi mar yalo.+
39 Mano nomiyo mirima mager omuoch e kindgi, mi ng’ato ka ng’ato nodhi yore. Barnaba+ nokawo Mariko mi gidhi kode gi yie nyaka Saipras.
40 Paulo to noyiero dhi gi Sila mi ne gidhi kode ka owete nosekwayo Jehova* mondo orite maber.+
41 Ne owuotho e mier mag Siria gi Kilikia ka otego kanyakla man kuondego.
Weche Moler Piny
^ Kata, “kiru; ot.”
^ Som Apendiks A5.
^ Som Apendiks A5.
^ Kata, “gik monegi to ok ochuer rembgi.”
^ Grik, porneia. Som Tiend Weche.
^ Grik, porneia. Som Tiend Weche.
^ Kata, “gik monegi to ok ochuer rembgi.”
^ Som Apendiks A3.
^ Som Apendiks A5.
^ Som Apendiks A5.
^ Som Apendiks A5.
