Ruth 3:1-18
3 Naomi nowacho ne Ruth niya: “Nyara, donge ber ka koro amanyonie ng’at ma nyalo kendi mondo in bende ibedie gi odi?+
2 Iwinjo, Boaz ma ne ijatiyo gi jotichnecha en-ga watwa,+ kendo kawuono gotieno odhi piedho shairi ka ma odinoega cham.
3 Omiyo, lwokri, iwirri mo mang’we mamit, kae to irwakri maber, e ka idhi mwalo kuno. Kendo kik iwe Boaz oneni ka pok ochiemo mometho.
4 To sa ma ji dhi nindo, ing’i ni Boaz dhi nindo kanye, idonj kanyo iel tiende, kae to inind kanyo. Obiro wachoni gima onego itim.”
5 Ruth nodwoke niya: “Duto miwachona abiro timo.”
6 Omiyo, nodhi kar dino, motimo duto ma ne Naomi owachone.
7 Ka ne Boaz osechiemo mometho, nodhi nindo but ka ma noketie cham. Eka Ruth nolidho moelo tiende, mi onindo kanyo.
8 E dier otieno, Boaz nobwok mochiewo. Noa malo monwang’o dhako moro konindo yo ka tiende.
9 Nopenje niya: “In ng’a?” Ruth nodwoke niya: “An Ruth, jatichni. Yar nangani mondo ium jatichni nikech inyalo wara.”+
10 Boaz nowachone niya: “Jehova mondo oguedhi nyara. Hera minyiso sani duong’ moloyo ma ne inyiso motelo,+ nikech ne ok iluwo yawuoyi ma jochan kata momewo.
11 Omiyo, kik ibed maluor nyara, abiro timoni duto miwacho,+ nikech ji duto modak e gweng’ni ong’eyo ni in nyako makare.
12 En adier ni anyalo wari,+ kata kamano, nitie ng’at machiegni kodi moloya monego owari.+
13 Bed ka gotienoni, to ka jalo oyie wari kiny gokinyi, mano nobed maber.+ To ka odagi wari, akuong’ora gi nying Jehova ni an awuon abiro wari. Omiyo, nind aninda kae nyaka okinyi.”
14 Omiyo, Ruth nonindo gi yo ka tiend Boaz nyaka okinyi. Noa malo ka piny pod mudho ma ng’ato ok nyal fwenyo nyawadgi. Eka Boaz nowacho niya: “Kik ng’ato ong’e ni dhako moro nende obiro kar dino kae.”
15 Nomedo wacho niya: “Kel lawi mar abolano kendo iyare.” Mi noyare kendo Boaz noolone shairi ma dirom sea auchiel,* moyieye. Eka Boaz nodok e dala maduong’.
16 Ka ne Ruth odok ot, Naomi nopenje niya: “Weche nodhini nade nyara?”* Ruth nonyise gik moko duto ma ne jalo otimone.
17 Kendo nowacho ne Naomi niya: “Ne onyisa ni kik aduog iri gi lueta nono. Kuom mano, nomiya sea auchielgi mondo akelni.”
18 Naomi nowachone niya: “Bed abeda mos nyara, nyaka ing’e kaka wachni biro bet. Jalo ok bi ling’, nyaka olos wachno kawuono.”
Weche Moler Piny
^ Sea auchiel nyalo romo lita 44 kama. Som Apendiks B14.
^ Hibrania, “In ng’a nyara?”
