Joshua 24:1-33
24 Joshua nochoko dhoudi duto mag Israel Shekem. Ne oluongo jodong Israel, gi jotelo,+ kod jong’ad bura kendo ne gichung’ e nyim Nyasaye madier.
2 Joshua nonyiso ji duto niya: “Ma e gima Jehova Nyasach Israel owacho, ‘Kwereu+ ma chon+ kaka Tera wuon Ibrahim kod Nahor, ne odak loka Aora Yufrate kendo ne gilamo nyiseche mamoko.+
3 “‘Bang’ kinde, nagolo kwaru ma Ibrahim+ loka Aora Yufrate, mi atere e piny Kanaan mi aguedhe gi nyithindo mang’eny.+ Namiye Isaka;+
4 to Isaka ne amiyo Jakobo kod Esau.+ Bang’e, namiyo Esau Got Seir;+ Jakobo gi yawuote to ne odhi Misri.+
5 Bang’e, ne aoro Musa gi Harun+ Misri, kendo nagoyo Jo-Misri gi masiche,+ mi aresou.
6 Ka ne agolo wuoneu Misri+ mi gichopo e nam, Jo-Misri ne olawogi gi geche lweny kod joidh farese nyaka e Nam Makwar.+
7 Wuoneu ne ochako ywak ne Jehova+ mi noketo mudho mandiwa e kindgi gi Jo-Misri, mi omiyo pi nam oduogo moimo Jo-Misri duto,+ kendo ne uneno gi wang’u gik ma ne atimo e piny Misri.+ Bang’e, ne udak e thim kuom higni mang’eny.+
8 “‘Eka ne aterou e piny Jo-Amor ma ne odak loka* Aora Jordan, kendo ne gikedo kodu.+ Kata kamano, ne amiyo uloyogi ma ukawo pinygi, to gin natiekogi.+
9 Bang’e, Balak wuod Zipor ma ruodh Moab nokedo kod Jo-Israel. Omiyo, nonyiso Balaam ma wuod Beor mondo okuong’u.+
10 To ne ok atimo kaka Balaam ne dwaro.+ Omiyo, ne oguedhou nyadinwoya+ mi aresou e lwete.+
11 “‘Bang’e, nung’ado Aora Jordan+ ma uchopo Jeriko.+ Kendo jotend Jeriko, Jo-Amor, Jo-Perizi, Jo-Kanaan, Jo-Hiti, Jo-Girgash, Jo-Hivi, kod Jo-Jebus ne okedo kodu, to ne achiwogi e lwetu.+
12 Ne amiyo gibedo giluoro kod kibaji maduong’ mi giringo e nyimu.+ Ee, ne gin ruodhi ariyo mag Amor. Ne ok uloyogi nikech ligangla kata nikech atung’ ma ne un-go.+
13 Ne amiyou piny ma ne ok utiyone, kod mier ma ne ok ugero+ mondo udagie, kendo sani uchamo olemb mzabibu gi zeituni ma ne ok upidho.’+
14 “Omiyo, luoruru Jehova, tineuru gi chuny matir, kendo umakru kode gadier.+ Tiuru ne Jehova kendo uketh nyiseche ma kwereu ne lamo loka Aora Yufrate kod Misri.+
15 Koro kuneno ni tiyo ne Jehova rachnu, yieruru kawuono ni ubiro tiyo ne ng’a.+ Ka udwaro tiyo ne nyiseche ma kwereu ne tiyonegi loka Aora Yufrate+ kata nyiseche mag Jo-Amor ma udak e pinygi sani,+ yieruru. To an kaachiel gi jooda, wabiro tiyo ne Jehova.”
16 Giduto ne gidwoko niya: “Ok wanyal weyo tiyo ne Jehova ngang’ mondo wati ne nyiseche mamoko.
17 Jehova Nyasachwa e ma ne ogolowa gi wuonewa e tuech+ e piny Misri,+ kendo notimo honni madongo ka waneno gi wang’wa.+ Bende, en e ma ne oritowa kamoro amora ma ne wadhiye nyaka e kind ogendni duto ma ne waromogo.+
18 Jehova noriembo ogendni duto moriwo nyaka Jo-Amor ma ne odak e pinyni. Omiyo, wan bende wabiro tiyo ne Jehova nikech en e Nyasachwa.”
19 Joshua nowacho ne oganda niya: “Be unyalo tiyo ne Jehova adier? En Nyasaye maler+ ma dwaro ni en kende e ma olame,+ kendo ok obi weyonu richou kod timbeu mamono+ ka ok unyal timo kamano.
20 Ka uweyo Jehova mi uchako lamo nyiseche mamoko, en bende obiro lokore kodu motieku kata obedo ni osetimonu gik mabeyo kamano.”+
21 To oganda ne odwoko Joshua niya: “Ooyo, wabiro tiyo ne Jehova!”+
22 Omiyo, Joshua ne owacho ne oganda niya: “Un joneno kuom wachni, ni uwegi e ma uyiero ni ubiro tiyo ne Jehova.”+ Ne gidwoke niya: “Ee, wan joneno.”
23 “Omiyo, goluru nyiseche manie kindu, kendo umi Jehova Nyasach Israel chunyu.”
24 Oganda nonyiso Joshua niya: “Wabiro tiyo ne Jehova Nyasachwa kendo wabiro timo kaka ochikowa!”
25 Chieng’no Joshua notimo singruok gi oganda Israel ka gin Shekem momiyogi chike ma ne dhi tayogi.
26 Kae to Joshua nondiko wechego e bug Chik+ mar Nyasaye, kendo nokawo kidi maduong’+ mi oketo e bwo yath maduong’ man but ka maler ma Jehova opwodho.
27 Joshua nomedo wacho ne oganda niya: “Neuru! Kidi maduong’ni nobednwa janeno+ nikech osewinjo weche duto ma Jehova owachonwa, obiro bedonwa Janeno mondo kik walokre gi Nyasachwa.”
28 Bang’ mano, Joshua noweyogi mondo gidog e miechgi.+
29 Bang’ magi duto, Joshua wuod Nun, ma jatich Jehova ne otho ka en jahigni 110.+
30 Ne giyike e lope man Timnath-sera+ e piny motimo gode mar Efraim, yo nyandwat mar Got Gaash.
31 Jo-Israel nodhi nyime tiyo ne Jehova ndalo duto mag Joshua kod ndalo duto mag jodongo ma Joshua ne oweyo ka pod ngima kendo ma ne ong’eyo gik moko duto ma ne Jehova otimo ne Jo-Israel.+
32 Choke mag Josef+ ma ne Jo-Israel owuokgo Misri ne oyik Shekem e puodho ma ne Jakobo ong’iewo kuom yawuot Hamor,+ wuon Shekem. Ne ong’iewo puodhono gi fedha 100,+ kendo puodhono ne obedo lop nyikwa Josef.+
33 Eleazar wuod Harun bende ne otho.+ Ne oyike e got ma ne opog ne Finehas wuode+ e piny motimo gode mar Efraim.
Weche Moler Piny
^ Tiende ni, yo wuok chieng’.
