Injili mar Johana 8:12-59
8 12 Yesu nowachonegi kendo niya: “An e ler mar piny.+ Ng’at ma luwa ok bi wuotho e mudho ngang’, to obiro bedo gi ler+ mar ngima.”
13 Omiyo, Jo-Farisai nowachone kama: “In ichiwo neno kuomi iwuon; nendi ok en adier.”
14 Yesu nodwokogi kama: “Kata ka achiwo neno kuoma awuon, nenda en adier, nikech ang’eyo ka ma nawuokie kod ka ma adhiye.+ To un ok ung’eyo ka ma ne awuokie kod ka ma adhiye.
15 Un ung’ado bura kaluwore gi ringruok;*+ an to ok ang’ad ne dhano moro amora bura kata matin.
16 To e ma pod ka ang’ado bura, bucha en madier, nikech ok an kenda, to Wuora ma ne oora ni koda.+
17 Bende, ondik e Chiku uwegi niya: ‘Neno mar ji ariyo en madier.’+
18 An achiwo neno kuoma awuon, kendo Wuora ma ne oora chiwo nenda.”+
19 Eka ne gipenje niya: “Wuoru ni kanye?” Yesu nodwokogi kama: “Ok ung’eya, bende ok ung’eyo Wuora.+ Ka da bed ni ung’eya, dikoro ung’eyo Wuora bende.”+
20 Nowacho wechego sa ma ne opuonjo e kar keno+ mar hekalu. To onge ng’at ma nomake, nikech sane pok nochopo.+
21 Omiyo, nowachonegi kendo niya: “An adhi, unumanya, to e ma pod unutho e richou.+ Ka ma adhiye ok unyal bire.”+
22 Eka Jo-Yahudi nochako penjore kama: “Odwaro dere, koso? Nikech owacho ni, ‘Ka ma adhiyoe ok unyal biroe.’”
23 Nomedo wachonegi niya: “Un ua mwalo; an aa malo.+ Un ua e pinyni; an ok aa e pinyni.
24 Mano e momiyo ne awachonu niya: Ubiro tho e richou. Nikech ka ok uyie ni an e en, ubiro tho e richou.”
25 Omiyo, ne gipenje niya: “In ng’a?” Yesu nodwokogi kama: “Ang’o momiyo aketho seche kodu?
26 An gi weche mang’eny monego awach kuomu, kendo monego ang’adie bura. Kuom adier, Ng’at ma ne oora en ja adier kendo weche sie ma ne awinjo kuome e ma awacho e piny.”+
27 Ne ok ging’eyo ni nowuoyo kodgi e wi Wuon mare.
28 Yesu nowacho niya: “Bang’ kuseng’awo Wuod dhano malo,+ eka unung’e ni an e en,+ kendo ni onge gima atimo gi dwacha awuon;+ to awacho gigi mana kaka Wuora nosepuonja.
29 To Ng’at ma ne oora ni koda; ne ok ojwang’a, nikech kinde duto atimo gik ma more.”+
30 Ji mang’eny noketo yie kuome sa ma nowacho wechego.
31 Eka Yesu nomedo wacho ne Jo-Yahudi ma noyie kuome niya: “Ka usiko e wachna, un jopuonjrena adier,
32 kendo ubiro ng’eyo adiera,+ mi adiera noketu thuolo.”+
33 Ne gidwoke kama: “Wan koth Ibrahim kendo pok ne wabedoga wasumbni ng’ato ngang’. Obet nade ni iwacho ni, ‘Unubed thuolo’?”
34 Yesu nodwokogi niya: “Adier, adier, awachonu ni, ng’at ma timo richo en misumba richo.+
35 E wi mano, misumba ok sik e od ruodhe nyaka chieng’; wuod ruoth to siko nyaka chieng’.
36 Omiyo, ka Wuod Nyasaye ketou thuolo, ubiro bedo thuolo gadier.
37 Ang’eyo ni un koth Ibrahim. To udwaro nega, nikech wechena ok bed gi dongruok kuomu.
38 Gik ma aseneno ka an gi Wuora e ma awacho,+ to un utimo gik musewinjo kuom wuonu.”
39 Ne gidwoke kama: “Wuonwa en Ibrahim.” Yesu nowachonegi niya: “Ka da un nyithind Ibrahim,+ dikoro utimo gik ma Ibrahim notimo.
40 To sani udwaro nega, an ma asewachonu adiera ma ne awinjo kuom Nyasaye.+ Ibrahim ok notimo kamano.
41 Un utimo tije mag wuonu.” Ne giwachone niya: “Wan ne ok onyuolwa kuom terruok;* wan gi Wuonwa achiel, ma en Nyasaye.”
42 Yesu nodwokogi niya: “Ka da bed ni Nyasaye e Wuonu, dikoro uhera,+ nimar nawuok ir Nyasaye, to koro an kae. Ne ok abiro kuom dwacha awuon, to Nyasaye e ma ne oora.+
43 Obet nade ni ok ung’eyo tiend gima awacho? En nikech ok unyal winjo wachna.
44 Un ua kuom wuonu Jachien, kendo udwaro timo gombo mag wuonu.+ Ng’atno ne en janek a chakruok,+ kendo ne ok ochung’ motegno e adiera, nikech adiera onge e iye. Sa ma owacho miriambo, owacho mana kaka kite owuon obet, nimar en jamiriambo kendo wuon miriambo.+
45 An to nikech awachonu adier, ok uyie kuoma.
46 Ng’ano kuomu ma nyalo nyiso ni an gi richo? Ka awacho adiera, obet nade ni ok uyie kuoma?
47 Ng’at Nyasaye winjo weche Nyasaye.+ Mano e momiyo un ok uwinji, nikech ok un jo Nyasaye.”+
48 Jo-Yahudi nopenje kama: “Donge wan kare e wacho ni, ‘In Ja-Samaria+ kendo ni in gi jachien’?”+
49 Yesu nodwoko niya: “Aonge gi jachien, to amiyo Wuora duong’, un to uchaya.
50 Kendo ok amany duong’ ma mara awuon;+ nitie Ng’at ma dwaro miya duong’, kendo en e ma ong’ado bura.
51 Adier, adier, awachonu ni, ng’at ma mako wachna, ok bi tho ngang’.”+
52 Jo-Yahudi nowachone niya: “Koro to wang’eyo ni in gi jachien. Ibrahim ne otho, jonabi bende ne otho, to in iwacho ni, ‘Ka ng’ato omako wachna, ok nobil tho ngang’.’
53 Be iduong’ moloyo wuonwa Ibrahim ma ne otho, koso? Jonabi bende ne otho. Itemo wacho ni in ng’a?”
54 Yesu nodwoko kama: “Ka amiyora duong’ awuon, duong’ mara en ka nono. Wuora e ma miya duong’,+ en e Wuoro ma uwacho ni en Nyasachu.
55 To e ma pod ok ung’eye,+ to an to ang’eye.+ Kendo ka anyalo wacho ni ok ang’eye to abiro chalo kodu, abiro bedo jamiriambo. An ang’eye kendo amako wachne.
56 Ibrahim wuonu ne nigi mor maduong’ kogeno neno ndalona, kendo nonenogo, mi nobedo mamor.”+
57 Eka Jo-Yahudi nopenje niya: “Pok ichopo higni 50, to iwacho ni iseneno Ibrahim?”
58 Yesu nodwokogi kama: “Adier, adier, awachonu ni, ka Ibrahim pok nobetie, ne antie.”+
59 Omiyo, ne gikwanyo kite mondo gichielego, to Yesu nopondo, mi nowuok oko mar hekalu.
