Ne Jo-Rumi 14:1-23
14 Rwakuru ng’at ma yiene yom yom,+ to kik ung’adne bura kuom weche ma paro opogoree.*
2 Yie mar ng’at moro nyalo yiene chamo gik moko duto, to ng’at ma yiene yom yom chamo mana alode.
3 Ng’at ma chamo gimoro kik ocha jal ma ok cham, to ng’at ma ok cham kik ng’ad bura ne jal ma chamo,+ nimar Nyasaye oserwako jalno.
4 In ng’a ma ding’ad bura ne jatich ng’at machielo?+ Ochung’ kata opodho e nyim ruodhe.+ Kuom adier, obiro chung’, nimar Jehova* nyalo chunge.
5 Ng’at achiel kawo ni chieng’ moro oloyo machielo gi duong’;+ ng’at machielo to kawo ni odiechienge duto chalre;+ ng’ato ka ng’ato mondo obed gadier chuth e pache owuon kuom gima ong’ado timo.
6 Ng’at ma kawo ni chieng’ moro oloyo machielo gi duong’, timo kamano ne Jehova.* Bende, ng’at ma chiemo, otimo kamano ne Jehova,* nimar ogoyo ne Nyasaye erokamano;+ to ng’at ma ok chiem, otimo kamano ne Jehova,* nimar ogoyo ne Nyasaye erokamano.+
7 Kuom adier, onge ng’ato kuomwa mangima ne en owuon,+ kendo onge ng’at ma tho ne en owuon.
8 Nikech ka wangima, wangima mondo wami Jehova* duong’,+ kendo ka watho, watho mondo wami Jehova* duong’. Omiyo, bed ni wangima kata watho, pod wan mag Jehova.*+
9 Mani e gimomiyo Kristo ne otho mi bang’e obedo mangima kendo, ni mondo obed Ruoth e wi jo motho kod jo mangima.+
10 To marang’o ing’ado ne owadu bura?+ Bende, ang’o momiyo ichayo owadu? Nimar waduto wanachung’ e nyim kom-bura mar Nyasaye.+
11 Nikech ondik kama: “Jehova* owacho ni, ‘Akuong’ora+ ni ji duto biro goyo chongegi piny e nyima, kendo lep duto biro miyo Nyasaye duong’ ayanga.’”+
12 Omiyo, ng’ato ka ng’ato kuomwa nochiw ne Nyasaye dwoko ma mare owuon e bura.+
13 Kuom mano, kik wang’ad ne jowetewa bura,+ kar mano ng’aduru ni ok ubi keto e nyim owadwa moro gima kelone chwanyruok kata gima miyo okier.+
14 Ang’eyo kendo an gadier chuth kuom Ruodhwa Yesu, ni onge gima bedo ma ok ler kende owuon;+ to ka nitie ng’at ma neno ni gimoro ok ler, en e ma gino ok ler e wang’e.
15 Nimar ka chiemo e ma miyo owadu chwanyore, kare koro ok udhi nyime wuotho kaluwore gi hera.+ Kik iwe chiembi omi iketh yie mar ng’at ma Kristo ne othone.+
16 Kuom mano, kik uwe mondo ji owuo marach kuom gima ber mutimo.
17 Nikech Pinyruodh Nyasaye ok en chiemo gi metho,+ to en tim makare, gi kuwe, kod mor kuom roho maler.
18 Nikech ng’at ma en misumba Kristo e yo ma kamano, en ng’at ma Nyasaye oyiego kendo olong’o e wang’ dhano.
19 Kuom mano, waluwuru gik ma loso kuwe+ kod gik ma gerowa waduto.+
20 Weuru ketho tich Nyasaye mana nikech chiemo.+ En adier ni gik moko duto ler, kata kamano en gima rach ka ng’ato chamo gima biro kelo chwanyruok.+
21 Ber mondo kik icham ring’o, kata madho divai, kata timo gimoro amora ma kelo chwanyruok ne owadu.+
22 Yieni obed mana mari iwuon e nyim Nyasaye. Ng’at mamor en ng’at ma chunye ok ng’adne bura kaluwore gi gik ma en e moyiego.
23 To ka po ni oriwo gi kiawa mi ochamo, chunye oseng’adone bura, nikech ok ochamo kaluwore gi yie. Kuom adier, gimoro amora ma ok otenore kuom yie, en richo.
Weche Moler Piny
^ Kata nyalo bedo, “weche ma un-go gi kiawa.”
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
