Jeremia 17:1-27
17 “Richo mar Juda osendiki gi kalam mar nyinyo.
Ogore e chunygi* gi kalam mabith molos gi kidi mar almasi*Kod e tunge mag kendo mag misango,
2 Sa ma yawuotgi paro kendo maggi mag misango kod sirnigi mag yien*+E but yiende mabeyo, e wi gode matindo,+
3 Kendo e wi gode madongo manie pewe.
Abiro miyo ji oyak gigeni duto, mwanduni duto+Ee, gibiro yako kuonde magi moting’ore malo nikech isetimo richo e pinyi duto.+
4 Ibiro weyo mwandu ma an awuon ne amiyi.+
Anami iti ne wasiki e piny ma ok ing’eyo,+Nikech isemoko mirimba mana ka mach.+
Obiro liel nyaka chieng’.”
5 Ma e gima Jehova owacho:
“Okuong’ ng’at ma keto genone kuom dhano,+Mogeno teko ma dhano nigo,+Kendo ma chunye ong’anyo ne Jehova.
6 Enochal gi yath man kende e thim.
Ok obi neno gik mabeyo ma biro,To obiro dak ka motwo e thim,E piny motimo chumbi ma ji ok odakie.
7 Ng’at moguedhi en ng’at moketo genone kuom Jehova,Moyie kuom Jehova.+
8 Obiro chalo gi yath mopidh e bath pige,Ma tero tiendene kochomo aora.
Ok obi parore sa ma chieng’ liet,Obokene biro bedo mang’ich kinde duto.+
Ok obi bedo gi parruok e ndalo mag oroKendo ok obi weyo nyago olemo.
9 Chuny otimo wuond mang’eny moloyo gimoro amora, kendo onyalo kelo hinyruok.*+
Ng’ano ma nyalo ng’eye?
10 An Jehova, adayo chuny dhano,+Anono paro ma iye,*Mondo achul ng’ato ka ng’ato kaluwore gi yorene,Kaluwore gi gik ma tichne onyago.+
11 Ng’at ma choko mwandu e yor mibadhi,+Chalo gi winj aywer ma choko tong’ ma ne ok otoko.
Gibiro lalne ka pok oti,Kendo bang’e fupe biro nenore.”
12 Kom-loch ma nigi duong’, ma noting’ malo a chakruok,E ka ma hekalu marwa nitie.+
13 A Jehova, geno mar Israel,Jogo duto moweyi biro yudo wich-kuot.
Ibiro ndik nyinge jogo mong’anyoni e lowo,+Nikech giseweyo Jehova, soko mar pi ngima.+
14 Changa, A Jehova, mondo abed mangima.
Resa, eka anayud kuwe,+Nimar in e ma apaki.
15 Neuru! Nitie jo ma wachona niya:
“Ere wach ma Jehova nowacho?+
Mad ochopi!”
16 To an to, ne ok aringo mi aweyo luwi kaka jakwath,Kata gombo chieng’ masira.
Ing’eyo malong’o gik ma dhoga osewacho;Gik moko duto ne otimore e wang’i.
17 Kik ilokrina ng’at ma miya luoro.
In e kar bwokna e ndalo masira.
18 Mad jo ma sanda oyud wich-kuot,+An to kik iwe ayud wich-kuot.
Mad luoro maduong’ omakgi,An to kik iwe abed maluor.
Kelnegi odiechieng masira,+Mondo ikethgi kendo itiekgi chuth.
19 Ma e gima Jehova ne onyisa: “Dhi ichung’ e dho rangach mar jo piny, ka ma ruodhi mag Juda donjogo kendo wuokgo, bang’e idhi e dho rangeye mamoko mag Jerusalem duto.+
20 Iniwachnegi ni, ‘Winjuru wach Jehova, un ruodhi mag Juda, un Jo-Juda duto, kod ji duto modak Jerusalem ma luwoga dho rangeyegi.
21 Ma e gima Jehova owacho: “Ritreuru uwegi, kendo kik uting’ osigo moro amora chieng’ Sabato, kata kadho kode e dho rangeye mag Jerusalem.+
22 Kik uting’ osigo moro amora kugolo e uteu chieng’ Sabato; kendo kik uti tich moro amora.+ Rituru odiechieng’ mowal mar Sabato, mana kaka ne achiko kwereu.+
23 To ne gitamore winja kata chikona itgi, wigi e ma ne tek kendo ne gitamore winjo wachna kata rwako kum ma namiyogi.”’+
24 “‘“Kata kamano, ka uwinja,” Jehova owacho, “kendo ok uting’o osigo moro amora kukalo e dho rangeye mag dalani chieng’ Sabato, to urito chieng’ Sabato obedo maler ma ok utiyo tich moro amora,+
25 eka ruodhi kod yawuotgi ma obedo e kom-loch mar Daudi,+ biro kadho e dho rangeye mag dalani, ka giidho geche lweny kod farese, gin kod jotendgi, kaachiel gi Jo-Juda gi jo modak Jerusalem;+ kendo ji biro dak e dalani kuom kinde duto.
26 Kendo ji nobi koa e mier mag Juda, kod mier mokiewo gi Jerusalem, gi piny Benjamin,+ kod pinje manie tiend gode+ gi manie wi gode, kaachiel gi Negeb. Gibiro kelo misengni miwang’o pep,+ gi misengni,+ gi chiwo mag cham,+ gi ubani, kod misengni mag goyo erokamano e od Jehova.+
27 “‘“ To ka ok uwinja, mi utamoru rito chieng’ Sabato mondo obed maler, kendo uting’o osigo moro amora ka ukalo dho rangeye mag Jerusalem chieng’ Sabato, abiro moko mach e dho rangeye mag dalano, mi majno biro wang’o ohinga motegno mag Jerusalem,+ kendo onge ng’at ma nonege.”’”+
Weche Moler Piny
^ Kata, “Ogor e kidi mopamore manie chunygi.”
^ Kata, “diamond” e dho Kisungu. Ma en kidi matekie moloyo.
^ Som Tiend Weche.
^ Kata nyalo bedo, “kendo ok onyal chango.”
^ Hibrania, “nyarogno.”
