Fweny mar Johana 4:1-11
4 Bang’ mago ne arango, mi ne aneno dhoot moro moyawore e polo, kendo dwol ma chal gi mar turmbeta ma ne akwongo winjo ka wuoyo koda nonyisa niya: “Bi ane malo kae, abiro nyisi gik ma nyaka timre.”
2 Gikanyono, roho nomaka, kendo ne! ne aneno kom-loch moro moket e polo, kendo ne nitie ng’at mobet e kom-lojno.+
3 To Jal ma ne obetieno ne chalo gi kidi mar jasper+ kod kidi mar sardius,* kendo ne nitie lihudu* ma olworo kom-lojno koni gi koni, kendo lihuduno ne chalo gi kidi mar zumaridi.+
4 Bende, ne nitie kombe 24 mag loch molworo kom-lojno koni gi koni, kendo ne aneno jodongo 24+ morwakore gi nengni ma rochere kobet e kombe mag lochgo, to ne gisidho osimbo mag dhahabu e wiyegi.
5 Mil polo ne wuok e kom-lojno,+ bende, dwol moko ne winjore kaachiel gi mor polo;+ kendo ne nitie teyni abiriyo mag mach ma liel e nyim kom-lojno, to mago gin roho abiriyo mag Nyasaye.+
6 E nyim kom-lojno, ne nitie gimoro ma chal gi nam+ mar kio ma rieny ka kidi mar krustol.
E dier kom-lojno tir, ne nitie chuech mangima ang’wen mopong’ gi wenge e nyimgi kod ka ng’egi, kendo ne gilworo kom-lojno koni gi koni.+
7 Chuech mangima mokwongo ne chal gi sibuor,+ to chuech mangima mar ariyo ne chal gi nyaruath,+ to chuech mangima mar adek+ ne nigi lela wang’ ma chal gi mar dhano, to chuech mangima mar ang’wen+ ne chal gi otenga ma huyo.+
8 Kendo moro ka moro kuom chuech mangima ang’wen-go ne nigi buombe auchiel; ne gin gi wenge mang’eny e dendgi duto kendo e igi.+ To ne gisiko giwacho niya odiechieng’ gotieno: “Maler, maler, maler en Jehova*+ Nyasaye, Manyalo Duto, ma ne nitie, kendo ma nitie, kendo ma biro.”+
9 Sa asaya ma chuech mangimago chiwo duong’, gi luor, kod erokamano ne Jal mobet e kom-lojno, Jal ma dak nyaka chieng’,+
10 jodongo piero ariyo gang’wen-go+ podho piny e nyim Jal mobet e kom-lojno, kendo gilamo Jal ma dak nyaka chieng’, kendo gibolo osimbegi e nyim kom-lojno ka giwacho niya:
11 “A Jehova* Nyasachwa, iwinjori yudo duong’,+ gi luor,+ kod teko+ nikech ne ichueyo gik moko duto,+ kendo gigo ne obetie kendo ne ochuegi nikech dwachi.”
Weche Moler Piny
^ Kata, “kidi makwar ma nengone tek.”
^ Kata, “ndanya.”
^ Som Apendiks A5.
^ Som Apendiks A5.
