Ezekiel 27:1-36
-
Wer miywagogo meli ma nimo mag Turo (1-36)
27 Wach Jehova nobirona kendo niya:
2 “Wuod dhano, wer ne Turo wend ywagruok,+
3 kendo iwach ne Turo kama,‘In midak e dho rangeye mag nam,Ka iloko ohala gi jo ma odak e chulni,Ma e gima Jehova Wuon Loch Duto owacho:
“Yaye Turo, in iwuon e ma isepakori ni, ‘Ajaber ahinya.’+
4 Alworani ochopo nyaka e chuny nam,Kendo jo ma geri osemedo berni.
5 Ne giloso bepeni gi yiend junipa moa Senir,+Kendo ne gikawo yadh sida moa Lebanon mi gilosonigo siro.
6 Ne giloso ngayi magi gi yiende madongo mag Bashan,To nyim yie mari ne olos gi yiend saipras, mi obidhe gi lak liech mogol e chulni mag Kitim.+
7 Ne iloso tanga mari gi law kitani moa Misri, kendo ma nigi rangi mabeyo,Kendo tandarua miumigo ne olos gi usi ma rambulu kod ma rajamna ma nogol e chulni mag Elisha.+
8 Jo ma odak Sidon kod Arvad+ e ma ne kwang’i.
Yaye Turo, jogi molony e ma ne chiko yie.+
9 Jo-Gebal motieg maber* kendo ma ne nigi lony+ e ma ne dino kuonde mokethore.+
Meli duto mag nam kod jotichne ne biro loko ohala kodi.
10 Jo-Persia, Lud, gi Put+ ne nie ogandani mar lweny.
Ne ging’awo okumbni maggi kod ogutegi kuomi, mi ne gimiyo iyudo duong’.
11 Jolwenji ma Jo-Arvad e ma ne rito ohinga molworo dalani,Kendo chwo ma jochir e ma ne rito ohingani.
Ne ging’awo okumbni molworore e ohinga magi duto,
Kendo ne gimedo berni.
12 “‘“Tarshish+ ne oloko ohala kodi nikech ne in gi mwandu mang’eny.+ Ne gikeloni fedha, gi nyinyo, gi bati, kod lisasi mondo iusnegi mwanduni.+
13 Javan, Tubal,+ kod Meshek+ ne oloko ohala kodi, ne gikeloni wasumbni+ kod gik molos gi mula.
14 Jo-Togarma+ ne okeloni farase, gi farese mag lweny, kod nyumbu* mondo iusnegi mwanduni.
15 Jo-Dedan+ ne oloko ohala kodi; ne indiko johala mang’eny e chulni mopogore opogore; ne gichuli lak liech+ kod bepe motegno ma rotenge.
16 Edom ne otimo ohala kodi nikech ne ing’eny gi mwandu. Ne gikeloni tarkois, usi ma rajamna, lewni ma nigi maridadi, lewni mayom, kite mag korol, kod rubi mondo iusnegi mwanduni.
17 “‘“Jo-Juda kod Jo-Israel ne oloko ohala kodi ka gimiyi ngano moa Minith,+ chiemo mabeyo, mor kich,+ mo, kod balsam+ mondo iusnegi mwanduni.+
18 “‘“Damaski+ notimo ohala kodi nikech mwandu ma ne in-go ne ng’eny ahinya, ne gikeloni divai moa Helbon kod yie rombe mag Sahar.*
19 Vedan kod Javan moa Uzal ne okeloni nyinyo mosethedhi, yiend kasia, kod odundu ma nigi suya mamit, mondo iusnegi mwanduni.
20 Jo-Dedan+ ne oloko ohala kodi ka ne gikeloni lewni mipedho e wi farese.
21 Ne indiko Jo-Arabia kod jodongo duto mag Kedar+ ma ne loko ohand nyirombe, yimbe, kod diek.+
22 Jolok ohala mag Sheba kod Raama+ ne loko ohala kodi; ne gikeloni kit modhi duto ma nigi suya mamit, kite ma nengogi tek, kod dhahabu, mondo iusnegi mwanduni.+
23 Haran,+ Kane, Eden,+ jolok ohala mag Sheba,+ Ashur,+ kod Kilmad ne loko ohala kodi.
24 Ne giuso lewni mabeyo, lep abola ma rambulu kendo ma nigi maridadi, kod kapede ma nigi rangi mopogore opogore e chiro mari. Giduto ne otwegi gi tol.
25 Meli mag Tarshish+ e ma ne ting’oni mwanduni ma ne itimogo ohala,Omiyo, ne ichalo gi yie moting’ore mapek* e nam.
26 Jogi ma ne kwang’i osekeli e nembe madongo;Yamb ugwe osegoyi e chuny nam mi okethi.
27 Mwanduni, gigeni mitimogo ohala, jo ma tiyo e meli, jo ma chiko meli,Jo ma dino kuonde mokethore e meli, jo ma uso mwanduni,+ kod jolwenji duto+—Ogandani duto—Biro nimo e chuny nam chieng’ mibiro podho.+
28 Ka jogi ma chiko yie ogo nduru, dho nam biro tetni.
29 Ji duto momako ngayi, jo ma tiyo e meli, jo ma tiyo e namBiro wuok e meli maggi mi ginichung’ oko e dho wath.
30 Giniting’ dwondgi ka giywagi malit+Gibiro kiro buru e wigi ka ging’ielore e buch kendo.
31 Giniliel wigi kendo ginirwak lep gunia;Gibiro ywagi malit ka gigoyo nduru matek.
32 Gibiro ywagore ka giwero wer ma giywagigo:
‘Ng’ano ma chalo gi Turo ma sani oling’ e chuny nam?+
33 Ji mang’eny ne oyieng’ gi mwanduni ma ne biro koa e nam.+
Mwanduni mang’eny kaachiel gi jolok ohandi ne omiyo ruodhi mag piny omewo.+
34 Koro isekethori e chuny nam, ee, isekethori e kut,+Kendo mwanduni duto kaachiel gi jogi osenimo kodi.+
35 Ji duto modak e chulni biro hum nono,+Kendo kihondko biro goyo ruodhi maggi+—gibiro juolo wengegi.
36 Jolok ohala moa e ogendni biro liyo ka gineno gima osetimoreni.
Gikoni nobed malit kendo enobi apoya,Ok inichak ichung’ ngang’.’”’”+
Weche Moler Piny
^ Hibrania, “Jodongo mag Jo-Gebal.”
^ Nyumbu en le ma punda onyuolo gi faras.
^ Kata, “yie rombe makwar kwar.”
^ Kata nyalo bedo, “ma nigi duong’.”
