Barua mar Ariyo ne Jo-Thesalonika 1:1-12
1 An Paulo, gi Silvano,* kod Timotheo,+ wandikonu un kanyakla mar Jo-Thesalonika, manie winjruok achiel gi Nyasaye Wuonwa kod Ruoth Yesu Kristo:
2 Ng’wono mogundho kod kuwe mar Nyasaye Wuoro kod Ruoth Yesu Kristo mondo obed kodu.
3 Owetewa, kinde duto wan gi ting’ mar goyo ne Nyasaye erokamano nikech un. Mano owinjore nikech yieu siko ka dongo moloyo, kendo hera ma ng’ato ka ng’ato oherogo wadgi medore.+
4 Nikech mano, wan wawegi wapwoyou*+ ne kanyakla mag Nyasaye nikech sinani maru kod yieu ka ukalo e sand kod chal matek duto.+
5 Mano en gima nyiso bura makare mar Nyasaye ma miyo ikwanou kaka jo mowinjore gi Pinyruodh Nyasaye, ma kuom adier e momiyo isandou.+
6 Nikech mano, en gima kare ka Nyasaye kelo masira ne jo ma kelonu masira.+
7 To un ma uyudo masiche, ibiro miu yueyo kanyachiel kodwa e chieng’no ma Ruoth Yesu+ biro fwenyoree koa e polo ka en-gi malaikene ma nigi teko+
8 e mach ma liel, sa mochulo kuor ne jo ma ok ong’eyo Nyasaye kod jo ma ok luw wach maber e wi Ruoth Yesu.+
9 Jogo biro yudo kum mar kethruok ma nyaka chieng’+ kigologi e nyim Ruoth kendo mabor gi tekone ma nigi duong’,
10 e kinde ma ibiro miyee duong’ kanyachiel gi joge maler, kendo e chieng’ono ji duto ma nonyiso yie biro wuoro, nimar neno ma ne wachiwo nomiyo ubedo gi yie.
11 Nikech mano, kinde duto walamonu ni mondo Nyasachwa okwanu kaka jo mowinjore gi luong ma ne oluongoue,+ kendo kokalo kuom tekone ochop dwaro mabeyo duto ma un-go, kod tije duto mutimo nikech yie ma un-go.
12 Mano en ni mondo nying Ruodhwa Yesu oyud duong’ kuomu, to un bende uyud duong’ e winjruok achiel kode kaluwore gi ng’wono mogundho mar Nyasachwa kod mar Ruoth Yesu Kristo.
