Samuel Mokwongo 7:1-17
7 Omiyo, Jo-Kiriath-jearim ne obiro mokawo Sandug Singruok mar Jehova mi gitere e got e od Abinadab,+ kendo ne giketo Eleazar wuode mondo orit Sandug Singruok mar Jehova.
2 Sandug Singruok ne obet Kiriath-jearim kuom higni 20 te. E kindeno Jo-Israel duto ne ochako duogo ir* Jehova.+
3 Eka Samuel nowacho ne Jo-Israel niya: “Ka adier uduogo ir Jehova gi chunyu duto,+ to wereuru gi nyiseche manono+ kod sanamu mag Ashtoreth,+ kendo umi Jehova chunyu duto, utine en kende,+ eka enoresu e lwet Jo-Filistia.”+
4 Kamano Jo-Israel ne owito nyiseche mag Baal gi sanamu mag Ashtoreth mi gitiyo ne Jehova kende.+
5 Eka Samuel nowacho kama: “Chokuru Jo-Israel duto Mizpa+ mondo alamnu Jehova.”+
6 Ne gichokore Mizpa mi gituomo pi. Ne giolo pigno e nyim Jehova mi gitueyo chiemo chieng’no.+ Ka gin kanyo ne giwacho kama: “Waseketho ne Jehova.”+ To Mizpa kanyo e ma Samuel ne ochako tiyoe kaka jang’ad bura+ e piny Israel.
7 Ka Jo-Filistia ne owinjo ni Jo-Israel ne ochokore Mizpa, jotendgi+ ne owuok mondo gidhi giked kodgi. Mano nomiyo luoro omako Jo-Israel.
8 Omiyo, Jo-Israel ne owacho ne Samuel niya: “Kik iwe kwayo Jehova Nyasachwa mondo okonywa+ kendo oreswa e lwet Jo-Filistia.”
9 Eka Samuel nokawo nyarombo ma pod dhoth mochiwe kaka misango miwang’o pep+ ne Jehova. Ne osayo Jehova mondo okony Jo-Israel, mi Jehova ne odwoko lamone.+
10 Sa ma Samuel ne chiwo misango miwang’o, jolweny mag Jo-Filistia to ne medo sudo machiegni. Eka Jehova nomiyo polo omor matek+ ne Jo-Filistia, mi gichochni kendo gikere.+ Kamano Jo-Israel ne oloyogi.+
11 Jo-Israel nowuok Mizpa mi gilawo Jo-Filistia kendo ne ginegogi nyaka milambo mar Beth-kar.
12 Bang’ mano, Samuel nokawo kidi+ mochungo e kind Mizpa gi Jeshana moluongo kidino ni Ebenezer,* nikech nowacho ni, “Jehova osekonyowa nyaka sani.”+
13 Kamano ne olo Jo-Filistia mi ne ok gichako giduogo kedo gi Jo-Israel.+ Kendo Jehova ne osando Jo-Filistia ndalo duto mag ngima Samuel.+
14 Bende, ne oduok mier ma Jo-Filistia nomayo Jo-Israel, chakre Ekron nyaka Gath, kendo Jo-Israel ne okawo kuonde ma Jo-Filistia ne omayogi.
Jo-Israel gi Jo-Amor bende ne nigi kuwe e kindgi.+
15 Samuel ne odhi nyime ng’ado bura e Israel kuom ngimane duto.+
16 Higa ka higa ne odhiga Bethel,+ Gilgal,+ gi Mizpa+ kong’ado bura ne Jo-Israel kuondego te.
17 Kata kamano, ne odokga Rama+ nikech kuno e ma ode ne nitie, kendo ne ong’ado bura ne Jo-Israel kuno bende. Ne ogero ne Jehova kendo mar misango kuno.+
