Samuel Mokwongo 31:1-13
-
Saulo gi yawuote adek tho (1-13)
31 Gie kindeno, Jo-Filistia ne kedo gi Jo-Israel.+ Jo-Filistia ne oloyo jolwenj Israel mi jolwenygo ne oringo kendo ne oneg jolweny mang’eny e Got Gilboa.+
2 Jo-Filistia ne olawo Saulo gi yawuote+ matek mi ne ginego Jonathan,+ Abinadab, gi Malkishua.
3 Lweny nobedo mager ahinya ne Saulo kendo jo ma bayo asere+ ne oyude mi gihinye marach.
4 Eka Saulo ne owacho ne jating’ne gige lweny niya: “Kaw liganglani mondo ichuoyago mondo jo ma ok oter nyangugi+ kik yuda ma gichuoya kendo gisanda malit.” Kata kamano, jating’ne gige lweny ne ok dwar chuoye nikech ne oluor ahinya. Omiyo, Saulo ne okawo liganglane mi ochuorego.*+
5 Ka ne jating’ ne Saulo gige lweny oneno ni Saulo osetho,+ en bende ne ochuore gi liganglane mi otho kaachiel gi Saulo.
6 Omiyo, Saulo gi yawuote adek, gi jating’ne gige lweny, kod jotichne duto ne otho e odiechieng’no.+
7 Ka Jo-Israel ma ne odak e pap gi alwora mar Jordan oneno ni ne oselo jolweny mag Israel kendo ni oseneg Saulo gi yawuote, ne giringo mi giweyo miechgi+ kendo Jo-Filistia ne obiro mi gichako dak kuondego.
8 Kinyne ka ne Jo-Filistia obiro mondo gikaw lewni kod gige lweny mag Jo-Israel ma ne otho, ne giyudo ka Saulo gi yawuote adek bende otho e Got Gilboa.+
9 Ne ging’ado wi Saulo oko kendo gikawo gigene mag lweny. Bang’ mano, ne gioro wach e piny Jo-Filistia duto mondo oland wachno+ e ute* mag nyisechegi+ kendo ne ji duto.
10 Kae to ne giketo gige Saulo mag lweny e hekalu mar Ashtoreth mi giguro ringrene e ohinga mar Bethshan.+
11 Ka ne Jo-Jabesh-gilead+ owinjo gik ma Jo-Filistia otimo ne Saulo,
12 jolweny duto ne owuok mi giwuotho otieno mangima kendo ne gikawo ringre Saulo gi ringre yawuote ma ne oyudo ogur e ohinga mar Bethshan. Ne giduogo gi ringrego Jabesh mi giwang’ogi kuno.
13 Kae to ne gikawo chokegi+ mi giyiko e bwo yadh tamarisk* man Jabesh+ kendo ne ok gichiemo kuom ndalo abiriyo.
Weche Moler Piny
^ Kata, “ochuoree.”
^ Kata, “hekalu.”
^ En yath ma siko ka ng’ich ma obokene tindo tindo, en gi maupe makwar kwar kod ma rochere.
