Samuel Mokwongo 28:1-25
-
Saulo dhi ir ajuoga man En-dor (1-25)
28 E kindego, Jo-Filistia ne ochoko jolwenjgi mondo gidhi giked gi Jo-Israel.+ Omiyo, Akish nowacho ne Daudi niya: “Donge ing’eyo ni in gi jogi ubiro dhi koda e lweny?”+
2 Daudi nodwoke niya: “Ing’eyo maber gima anyalo timo.” Eka Akish ne onyiso Daudi niya: “Mano e momiyo abiro keti mondo ibed jaritna kinde duto.”+
3 Koro Samuel ne osetho kendo Jo-Israel duto ne oseywage ma giyike Rama kama nodakie.+ Noyudo Saulo oseriembo ajuoke kod jokor wach e piny Israel.+
4 Jo-Filistia ne ochokore mi gidhi goyo kambi Shunem.+ Saulo bende ne ochoko jolweny duto mag Israel mi gigoyo kambi Gilboa.+
5 Ka ne Saulo oneno kambi mar Jo-Filistia, ne obedo maluor ahinya.+
6 Kata obedo ni Saulo ne penjo Jehova wach,+ Jehova ne ok dwoke e yo moro amora. Ne ok odwoke kata e yor lek, kata gi Urim,+ kata gi jonabi.
7 Gikone Saulo ne onyiso jotije niya: “Manynauru ajuoga moro ma dhako+ mondo adhi apenje gima onego atim.” To jotije ne odwoke kama: “Nitie ajuoga moro ma dhako e piny En-dor.”+
8 Omiyo, Saulo noloko lewni mondo kik fwenye mi nodhi gi jotije ariyo ir dhakono. Ne onyiso dhakono niya: “Korna wach+ kendo igolna ng’at ma abiro wachoni.”
9 To dhakono ne odwoke niya: “Donge ing’eyo maber kaka Saulo ne oriembo ajuoke gi jokor wach e piny Israel?+ Koro marang’o itemo wuonda mondo onega?”+
10 Eka Saulo ne okuong’orene gi nying Jehova kama: “Akuong’ora gi nying Jehova ni onge ketho moro amora mibiro ket kuomi nikech wachni.”
11 Dhakono ne openje niya: “Agolni ng’a?” Ne odwoke kama: “Golna Samuel.”
12 Ka ne dhakono oneno “Samuel,”*+ ne ogoyo nduru matek mopenjo Saulo niya: “Ang’o momiyo iwuonda? Donge in Saulo?”
13 Saulo ne odwoke niya: “Kik iluor. Ineno ang’o?” Dhakono ne onyise niya: “Aneno ng’at ma chalo nyasaye ka wuok e lowo.”
14 Eka Saulo ne openje niya: “Ochalo nade?” To ne odwoke ni, “Ochalo jaduong’ moro moti morwako kandho ma onge bade.”+ Gikanyono, Saulo ne ofwenyo ni kare en “Samuel,” omiyo ne ogoyo chonge piny mi okulore nyaka e lowo.
15 “Samuel” ne owacho ne Saulo kama: “Ang’o momiyo ichanda ka imiyo igola e lowo?” Saulo ne odwoke niya: “An gi chandruok maduong’. Jo-Filistia kedo koda to Nyasaye bende oseweya mi koro ok odwoka kotiyo gi jonabi kata lek.+ Mano e momiyo aluongi mondo inyisa gima onego atim.”+
16 “Samuel” ne owachone kama: “Ang’o momiyo ipenja gima onego itim to Jehova oseweyi+ kendo osebedo jasiki?
17 Jehova biro timo gik ma nonyisa ni akor: Jehova biro golo pinyruoth e lweti mi omi nyawadu ma en Daudi.+
18 Nikech nidagi winjo Jehova kendo ne ok iolo mirimbe mager kuom Jo-Amalek,+ mano e momiyo Jehova timoni kama kawuononi.
19 Jehova biro chiwi gi Jo-Israel e lwet Jo-Filistia+ kendo kiny+ nibed koda kaachiel gi yawuoti.+ Bende, Jehova biro keto jolwenj Israel e lwet Jo-Filistia.”+
20 Eka Saulo nopodho piny e lowo kendo ne oluor ahinya nikech weche ma “Samuel” ne onyisego, kendo ne oonge teko nikech ne oseriyo kech odiechieng’ gotieno.
21 Ka ne dhakono obiro moneno ka luoro omako Saulo ahinya, ne onyise niya: “Asetimo gima ne inyisa kendo ne ayie kata mana tho+ mondo atim gima ne idwaro.
22 Koro kiyie to winja. We akelni makate moro matin icham mondo iyud teko mar dok.”
23 Saulo ne odagi winje monyise niya: “Ok abi chiemo.” Kata kamano, dhakono kaachiel gi jotij Saulo ne ohombe mondo ochiem. Gikone, ne owinjogi mi ochung’ kendo nodhi mobet e otanda.
24 Dhakono ne nigi nyaruath machwe e dalane. Omiyo, ne oyang’e mapiyo piyo kae to odwalo mogo molosogo makate ma onge thowi.
25 Ne okelo chiemogo ne Saulo gi jotije mi ne gichiemo. Kae to ne giwuok ma gidhi gotienono.+
Weche Moler Piny
^ “Tiende ni ng’at ma chalo gi Samuel.”
