DWOKO MA MUMA CHIWO: ‘Sa biro ma ji duto manie liete nowinj dwond Yesu mi giniwuog oko.’—Johana 5:28, 29.

Yesu nokoro ni e Pinyruoth mare ibiro chier ji duto manie Liel. Fernando, ma a owuo kuome e sula motelo wacho niya: “Ne ahum nono ka ne ahango somo weche ma yudore e Johana 5:28, 29. Weche ma ne asomo e ndikono ne omiyo abedo gi geno ma ne aongego.”

Jatich Nyasaye ma ne iluongo ni Ayub ne ong’eyo ni kotho, to Nyasaye ne dhi chiere. Nopenjo kama: “Ka dhano otho, nobed mangima kendo koso?” Kae to nodwoko ka en gadier niya: ‘Darit ndalo duto e lueny ma an-go [tiende ni kinde ma ng’ato nie Liel], nyaka wach ma gonya obi. Diluong nyinga e ka daduoki wach.’—Ayub 14:14, 15.

Geno mar chier ne ok en gima wendo ne Maritha nyamin Lazaro. Bang’ tho mar Lazaro Yesu nonyiso Maritha niya: “Owadu biro chier.” Maritha ne odwoke kama: “Ang’eyo ni obiro chier e kinde chier chieng’ giko.” Kae to Yesu ne onyise kama: “An e chier kendo an e ngima. Ng’at ma nyiso yie kuoma, kata ka otho, obiro bet mangima kendo.” (Johana 11:23-25) Mapiyo bang’ mano, Yesu ne ochiero Lazaro! Wach ma ne otimoreno nyisowa gik ma biro timore e kinde ma biro. Temie paro kaka kindeno biro chalo kichiero jomotho e piny mangima!

DWOKO MA MUMA CHIWO: Wach Nyasaye nyiso ni chier mar Yesu ne opogore gi chier mar ji aboro ma Muma wuoyo kuomgi. Ji aborogo ne odak e pinyka bang’ kosechiergi. Kata kamano, Muma wacho kama e wi Yesu bang’ kosechiere: ‘Yesu Kristo ni e bad Nyasaye korachwich, nimar ne odhi e polo.’ (1 Petro 3:21, 22) Be Yesu kende e ma ne idhi chier mondo odhi e polo? Noyudo Yesu osenyiso jootene niya: “Ka adhi mi aikonu kar dak, abiro duogo kendo, mi anarwaku e dala kama antie, mondo kama antieree un bende ubedie.”—Johana 14:3.

 Kristo ne odhi e polo kendo noiko kar dak ne jopuonjrene moko. Jogo duto mibiro chiero mondo odhi e polo kwan-gi en 144,000. (Fweny 14:1, 3) To jolup Yesugo dhi timo ang’o e polo?

Jogo biro bedo modich e polo! Muma wacho kama: “Ng’at mamor kendo maler en ng’ato ang’ata ma nigi kare e chier motelono; tho mar ariyo onge gi teko e wigi, to ginibed jodolo mag Nyasaye kod mag Kristo, kendo giniloch kaka ruodhi kanyachiel kode kuom higni 1,000.” (Fweny 20:6) Jogo mibiro chier mondo odhi e polo biro bedo ruodhi kendo jodolo gi Kristo e wi piny.

DWOKO MA MUMA CHIWO: Jaote Paulo ne owacho kama: “An gi geno kuom Nyasaye, ma en geno ma gin bende giyiego, ni chier nobedie mar joma kare gi joma ok kare.”—Tich Joote 24:15.

Gin jomage ma biro bedo e kind joma Paulo ne oluongo ni “joma kare”? Wanon ane ranyisi mar ng’at moro e Muma. Ka ne Daniel chiegni tho ne onyise kama: “Iniyuwe, eka inichungi e kari ka ndalo nogik.” (Daniel 12:13) Ne idhi chier Daniel mondo odag kanye? “Jo matir ginicham piny, mi ginidagie nyaka chieng’.” (Zaburi 37:29) Yesu nokoro kama: “Joma mor gin joma nigi chuny mamuol, nimar piny nobed pok margi.” (Mathayo 5:5) Daniel kaachiel gi joma moko makare ibiro ichier mondo odag e pinyni nyaka chieng’.

Jomage ma biro bedo e kind joma Paulo ne oluongo ni “joma ok kare”? Gin ji bilionde ma ne odak e pinyni, to ne ok giyudo thuolo mar puonjore adiera manie Muma. Bang’ kosechiergi gibiro yudo thuolo mar puonjruok e wi Jehova * kod Yesu. (Johana 17:3) Jogo duto ma biro yiero tiyo ne Nyasaye biro dak nyaka chieng’ mana kaka Nyasachgi Jehova.

DWOKO MA MUMA CHIWO: Nyasaye‘biro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo.’ (Fweny 21:4) “Giniger udi, ginidagie; ginipidh puothe mag muzabibu, ginicham olembgi.”—Isaiah 65:21.

Tem ane paro kidak e kindego gi wedeni kaachiel gi osiepeni ma oa chier! Kata kamano pod ng’ato nyalo penjore kama, Ere kaka anyalo bedo gadier ni jomotho ibiro chier?