Ne adongo e kuonde mopogore opogore e taon mar Los Angeles, ma yudore California e piny Amerka. Kuonde ma ne adongoego ne opong’ gi grube mag jokuoge kod joma tiyo gi yedhe ma mero ji. Wan nyithindo auchiel e odwa, to an e nyathi mar ariyo.

Minwa ne jaterowaga lemo e achiel kuom kanise mag Protestant. Kata kamano, ka ne arawera, ne awuondora ni ahero Nyasaye to koni timbena ne richo. Chieng’ Jumapil ne adhiga wer e kanisa. To e odiechienge mamoko e juma, ne adhiga e thum, ne atiyo gi yedhe ma mero ji kendo ne ajachode.

Iya ne wang’ piyo. Ne anyalo goyo ng’ato gi gimoro amora ma ne ni buta. Gik ma ne apuonjora e kanisa, ne ok konya. Ne ajawacho ni, “Ruoth e ma chulo kuor, to an e ma otiyo koda!” Ka ne an e sekondari e higni mag 1960, ne nitie grup moro mar siasa ma ne iluongo ni Black Panthers. Grubno ne mora ahinya nikech ne gikedo ne ratiro mar ji. Omiyo, ne achako riwora gi grup moro mar nyithi skul ma bende ne kedo ne ratiro mar dhano. Kinde mang’eny, ne wajong’anyo e nderni, to mano ne miyo iloro skul.

Ng’anyogo pod ne ok roma nikech ne ahero timbe gero. Kuom mano, ne adonjo e timbe mag mahundu. Kuom ranyisi, kinde moko an kod osiepena ne wajoneno sinembe ma ne nyiso kaka chon ne Jo-Amerka sando wasumbini moa Afrika. Gik ma ne waneno e sinembego ne wang’o iwa ahinya, kendo mano nomiyo wachako goyo nyithi wasunge ma ne nie od sinembego. Bang’ mano ne wadhi e gwenge mag wasunge ka wamanyogi mondo wagogi.

Ka ne achiegni chopo higni 20, an gi owetena ariyo ne wang’ere kaka jo mahundu. Polise ne siko luwre kodwa. Achiel kuom owetena ma luwa ne odonjo e grup moro mar jokuoge, kendo an ne ajatudora kodgi. Ngimana ne koro rach moloyo.

Nitie osiepna moro ma jonyuolne ne gin Joneno mag Jehova. Ne gigwela e chokruogegi, kendo ne ayie ma adhi. Ne aneno kaka Joneno ne opogore gi dinde mamoko ka ne ahango dhi e chokruogegi. Ng’ato ka ng’ato ne nigi Muma. Kata mana joma tindo bende ne golo twege! Ne amor ahinya ka ne ang’eyo ni Nyasaye nigi nying ma en Jehova, kendo namor neno kaka ne gitiyo gi nyingno. (Zaburi 83:18) Kanyaklano ne nigi ji moa e ogendni mopogore opogore, kata kamano ne onge sigu e kindgi.

 Mokwongo, ok ne adwar puonjora Muma gi Joneno mag Jehova, to ne ahero dhi e chokruogegi. Chieng’ moro godhiambo, ka ne an e chokruok mar Joneno mag Jehova, osiepena moko ne odhi e thum kamoro. Ka ne gin kuno, ne gigoyo rawera moro ma ginege mana nikech ne otamore miyogi jakede molos gi pien. Kinyne ne gipakore ahinya kuom timgino. Kata ka ne iyalogi e kot, pod ne ok gikawo wachno mapek. Ng’enygi ne otue e jela kuom ngimagi duto. Ne amor ahinya nikech odhiambono ne ok adhi kodgi e thum. A kanyo ne ang’ado ni ne adhi loko kit ngimana kendo chako puonjra Muma gi Joneno.

Nikech ne wadongo ka wachare gi joma wasunge, thoth gik ma naneno e kind Joneno mag Jehova ne mako dhoga ahinya. Kuom ranyisi, ne awuoro ka Janeno moro ma msungu ne oweyo nyithinde ne joot moro ma jorotenge ka ne odhi loka. Bende, ne awuoro ahinya ka joot ma ne gin wasunge noyie dak gi rawera moro ma jarateng’ ma ne onge gi kama dodagie. Mano nomiyo abedo gadier ni Joneno mag Jehova e ma luwo weche Yesu ma yudore e Johana 13:35, ma wacho niya: “Ma e ma nomi ji duto ong’e ni un jopuonjrena—ka un gi hera e kindu uwegi.” Ne an gadier ni aseyudo joma lamo Nyasaye gadier.

Puonjruok Muma nokonya fwenyo ni nonego alok yo ma ne anenogo gik moko. Ne dwarore ni alok pacha obed manyien mondo adak gi ji gi kuwe, kendo neno ni mano e ngima maberie moloyo. (Jo-Rumi 12:2) Mos mos, ne aweyo bedo gi kido marichogo. Kae to, e dwe mar Januar 1974, ne obatisa ma abedo achiel kuom Joneno mag Jehova.

Kata bang’ kosebatisa, podi ne dwarore ni atim kinda mondo awe bedo ng’at ma iye wang’ piyo kendo mager. Kuom ranyisi, chieng’ moro ka ne alando Wach Nyasaye e ot ka ot, jakuo moro nokwalo redio e mtoka, ma achako lawe gi ng’wech. Ka ne achiegni juke, nolwaro rediono kae to oringo olal. Ka ne agoyo mbakano ne joma ne alendogo kanyo, jaduong’-kanyakla moro nopenja niya: “Stephen, dimako ng’atno, ditime nade?” Penjono nokonya fwenyo ni dwarore ni atem ahinya abed ng’at ma dak gi kuwe gi jomamoko.

E dwe mar Oktoba 1974, ne achako tiyo ne Nyasaye kuom thuolona duto, ka atiyo gi seche 100 dwe ka dwe e puonjo ji Muma. Bang’e, ne oluonga tiyo e ofis maduong’ mar Joneno mag Jehova man Brooklyn, New York. E higa mar 1978, ne adok Los Angeles rito minwa ma koro ne tuore. Higni ariyo bang’e, ne akendo nyako miluongo ni Aarhonda. Jaoda nokonya ahinya rito minwa ma ne tuore nyaka chop chieng’ ma minwa nothoe. Bang’ kinde, an gi Aarhonda ne oluongwa e skul moro mar Joneno mag Jehova mitiegoe jomisonari miluongo ni Skul mar Gilead, bang’ mano ne oorwa dhi lendo e piny mar Panama.

Chakre ne batisa, asekaloe gik mang’eny ma wang’oga iya ahinya. Tinde ang’eyo gimomiyo ber wuok e kind joma dwaro wang’o iya, kata seche moko atemoga kueyo ywaruok e yore mamoko. Ji mang’eny moriwo nyaka jaoda, osepwoya ahinya kuom kaka ajatimo sama ywaruok moro otuch. Kata mana an awuon, awuoroga kuom lokruok masetimo! Ok dawach ni asetimo lokruok kamano gi tekona awuon. To en nikech Muma nigi teko mar loko ngima ng’ato.—Jo-Hibrania 4:12.

Muma osekonya ma tinde adak e ngima maber, kendo mokuwe. Tinde ok ago ji, kar mano apuonjogiga ng’eyo Wach Nyasaye. Nitie jal moro ma ne apuonjorago Muma ma ne ok wawinjrego ka ne wan e sekondari. Bang’ ka nosebatise, ne wadak kode kuom kinde. Kendo pod wan osiepe nyaka chil kawuononi. Chop sani, an gi jaoda wasepuonjo ji mokalo 80 Muma, ma gibedo Joneno mag Jehova.

Agoyo erokamano ahinya ne Jehova kuom konya dak e ngima maber, kendo mopong’ gi kuwe e riwruok mare.