Ne Josombwa
Gaset ma koro isomoni ne ochak go Julai 1879. Weche osedhi kalokore a kindeno—to mano bende e kaka gasedni osebedo kalokore. (Ne piche man malo kae.) Ka chakore gi gochoni, ibiro neno lokruoge mamoko e yo mochan-go Ohinga mar Jarito. Lokruogego gin mage?
E pinje mang’eny, ji momedore manyo weche e Intanet kendo gineno ka yorno yotnegi. Ginwang’o weche mayudore e Intanet kende mana kuom diyo maos. Ji nyalo somo buge mang’eny koda gasede e Intanet.
Nikech ji mang’eny tinde ohero manyo weche e Intanet, nyocha watimo lokruok moko e Websait marwa mar www.jw.org/luo, mondo wami websaitno omed ywayo ji kendo manyo weche kuno obed mayot moloyo. Jogo madhi manyo weche kuno nyalo somo bugewa mosego e dhok mokalo 430. Chakre gi dweni, joma limo Websaitwa nyalo somo sula moko ma yande pile yudore e gasedewa to koro biro yudore mana e Websait marwa. *
Nimar wabiro keto sula moko e Intanet, gocho mar ji duto mar Ohinga mar Jarito biro bedo gi ite 16 to ok 32 kochakore gi gochoni. Gie sani, Ohinga mar Jarito yudore e dhok 204. Nikech obiro bedo mana gi ite 16, biro bedo mayot goyo gasedni e dhok momedore.
Wageno ni timo lokruogegi biro konyowa chopo ne ji momedore wach mareso ngima mawuok e Muma. En gombo marwa dhi nyime chiwo weche mapuonjo kendo maywayo ji—e buge koda e Intanet—mondo okony josombwa mang’eny mamiyo Muma luor kendo dwaro ng’eyo gima Muma puonjo kuom adier.
Joma Ogoyo Bugni
^ par. 5 Moko kuom sula mabiro yudore e Intanet gin kaka maluwogi: “Ne Rowere,” manyiso puonjruok Muma modok korka rowere, kod “Gik ma Apuonjora e Muma,” ma gin sula molos mondo okony jonyuol puonjo nyithindo ma gin johigini adek kadok chien.
