“Ok Gin mag Piny”

“Piny osin kodgi, nikech ok gin mag piny.”​—JOHANA 17:14.

Tiend Wechego: Ka ne Yesu owacho ni ne ok en mar piny, mano nyiso ni ok noriwo lwedo ywaruok ma ne nitie e weche mag siasa kod mag oganda e yo mora amora. Nowacho kama: “Ka da bed ni Pinyruodha en mar pinyni, joga dine okedo mondo kik chiwa e lwet Jo-Yahudi. To adier Pinyruodha ok oa kae.” (Johana 18:36) Bende, nonyiso jolupne mondo gitamre paro, weche, kod timbe ma Wach Nyasaye kwedo.​—Mathayo 20:25-27.

Kaka Jokristo Mokwongo Nonyiso ni Giluwo Puonjno: Ka luwore gi Jonathan Dymond, ma en jandik weche mag din, Jokristo ma kinde mokwongo “notamore donjore e weche mag lweny kata obedo ni mano ne nyalo miyo oyanygi, otuegi e jela kata oneggi.” Ne giyie mondo osandgi kar riwo lwedo konchiel e weche mag piny. Timbegi mabeyo bende ne nyiso kaka gipogore gi jomamoko. Nonyis Jokristo kama: “Giwuoro gimomiyo ok udhi nyime wuotho kodgi e timbegi mag anjawo, omiyo, giwuoyo kuomu e yor achaya.” (1 Petro 4:4) Jasomo moro ma nono weche mag histori miluongo ni Will Durant nowacho ni “kinda ma Jokristo ne nigo mar makruok gi yiegi kod timbe mabeyo, ne chando chuny joma ne lamo nyiseche manono kendo ma nohero mor mar piny mopong’ gi timbe mag anjawo.”

Gin Jomage ma Luwo Puonjno e Kindegi? Buk miluongo ni New Catholic Encyclopedia wacho kama kowuoyo e wi gimomiyo Jokristo ok onego oriw lwedo weche mag lwenje: “Ok en gima kare ting’o gige lweny ni mondo waritrego.” Sula moro ma yudore e gaset mar Reformierte Presse nowacho ni nitie ripot moro ma nochiw gi African Rights, ma en riwruok ma kedo ne ratiro mar dhano. Ripodno nowacho ni kanise duto noriwore e lweny ma nonegie ji mang’eny e piny Rwanda e higa mar 1994, “mak mana Joneno mag Jehova kende.”

Japuonj moro mar jo sekondar nowuoyo e wi nek ma notim gi Jo-Nazi (Nazi Holocaust), kowacho ni “onge grup moro amora kata riwruok moro amora ma nokwedo miriambo, timbe mag gero, kata nek ma notim e okang’ malach e kindego.” Kata kamano, bang’ timo nonro gi United States Holocaust Memorial Museum, nondiko kama: “Koro to an gi dwoko.” Nofwenyo ni Joneno mag Jehova nochung’ motegno kendo nomakore gi yiegi kata obedo ni nisandogi malit ahinya.

To nade timbegi? Gaset mar U.S. Catholic wacho kama: “Thoth Jo-Katholik ok oyie gi puonj ma kanisagi puonjo e wi dak adaka gi ng’ato ka pok ukendoru e yor chik kod nindruok e kind joma pok okendore.” Gasedno bende wuoyo e wi dikon moro ma nowacho kama: “Thoth joma aseneno, ma kwan-gi ohingo pasent 50, biroga mondo oriw kend margi kaka dhako gi dichwo bang’ ka ne gisegadak.” Bug The New Encyclopædia Britannica wacho ni Joneno mag Jehova to “oramo ni nyaka gimakre gi timbe mabeyo e ngimagi.”