Puonjri Kuom Wach Nyasaye

 Ang’o Momiyo Nyasaye Oweyo Gik Maricho kod Chandruok Obedie?

Sulani oting’o penjo manyalo bedo ni isepenjori, kendo onyiso kama inyalo yudoe dwoko ei Mumbi. Joneno mag Jehova diher nono penjogi kaachiel kodi.

1. Richo ne ochakore nade?

Richo nochakore e piny kane Satan owacho miriambo mokwongo. Satan ne ok en ng’ama rach kane ochweye. Ne en malaika makare, to ne ok “ochung’ e adiera.” (Johana 8:44) Ne obedo gi gombo mar yudo lamo monego odhi ne Nyasaye kende. Satan nowuondo Hawa dhako mokwongo, mi oseme mondo owinje kar winjo Nyasaye. Adam ne oriwore gi chiege e ketho chik Nyasaye. Gima Adam ne otimono, ne okelo chandruok koda tho.​—Som Chakruok 3:1-6, 17-19.

Sama Satan ne nyiso Hawa ni oketh chik Nyasaye, Satan ne ng’anjo ne loch Nyasaye. Thoth dhano oseriwore gi Satan e kwedo Nyasaye kaka Jaloch. Mano osemiyo Satan obedo “jaduong’ mar pinyni,” tiende ni jaloch mar pinyni.​—Som Johana 14:30; Fweny 12:9.

2. Be chwech mar Nyasaye ne nigi rem moro?

Dhano kaachiel gi malaike ma ne Nyasaye ochweyo ne nigi nyalo mar winjo kendo luwo dwaro mag Nyasaye e yo makare chuth. (Rapar mar Chik 32:5) Nyasaye nochweyowa kendo miyowa thuolo mar timo yiero e kind ber gi rach. Thuolono en yor nyiso herawa kuom Nyasaye.​—Som Jakobo 1:13-​15; 1 Johana 5:3.

3. Ang’o momiyo Nyasaye oseweyo chandruok odhi nyime?

Jehova oseweyo mondo ng’anjono odhi nyime kuom kinde. Nikech ang’o? Mondo onyis ni loch maok otelne gi Nyasaye ok nyal konyo dhano ngang’. (Yeremia 10:23) Bang’ higini 6,000 ma dhano osebedo kalochogo, adierano koro osenenore ayanga. Joloch ma dhano ok osetieko lweny, mahundu, mibadhi, koda tuoche.​—Som Eklesiastes 7:29; 8:9; Jo Rumi 9:17.

Mopogore gi mano, jogo ma orwako Nyasaye kaka Jaloch, konyore kendgi giwegi. (Isaiah 48:17, 18) E kinde mokayo machiegni, Jehova biro kelo giko ne sirkande duto mag dhano. Mana jogo ma oyie mondo Nyasaye ema oloch e wigi, ema biro dak e piny.​—Isaiah 2:3, 4; 11:9; som Daniel 2:44.

 4. Bedo ni Nyasaye pok okawo okang’ miyo ji thuolo mar timo ang’o?

Satan ne owacho ni onge dhano moro amora manyalo chung’ motegno komakore gi Nyasaye. Nikech Nyasaye pok okawo okang’, mano miyowa waduto thuolo mar nyiso kabe wayiero loch Nyasaye kata loch dhano. Wanyiso yierono kaluwore gi kit ngimawa.​—Som Ayub 1:8-11; Ngeche 27:11.

5. Ere kaka wanyalo nyiso ni Nyasaye e Jalochwa?

Wanyalo nyiso ni Nyasaye e Jaloch sama waketo kinda mar manyo lamo madier kendo timo gigo maluwore gi Wachne, ma en Muma. (Johana 4:23) Bende, ok wadonjre gi weche siasa koda lwenje mana kaka Yesu notimo.​—Som Johana 17:14.

Satan tiyo gi tekone e ywayo ji mondo otim gik maricho makelo hinyruok. Sama watamore timbego, moko kuom osiepewa koda wedewa nyalo jarowa kata kwedowa. (1 Petro 4:3, 4) Omiyo, wan gi yiero. Be wabiro bedo osiepe gi jogo ma ohero Nyasaye? Be wabiro luwo chikene manyiso rieko koda herane? Ka watimo kamano, to wanyiso ayanga ni Satan ne oriambo kane owacho ni onge ng’at manyalo timo gima Nyasaye wacho.​—Som 1 Jo Korintho 6:9, 10; 15:33.

Mondo iyud weche momedore, ne sula mar 11 ei bugni, Ang’o ma Muma Puonjo Kuom Adier?, mogo gi Joneno mag Jehova.

[Picha manie ite mar 16]

Adam notimo yiero marach

[Picha manie ite mar 17]

Yiero mwatimo nyiso kabe wadwaro ni Nyasaye obed Jalochwa