Ang’o Momiyo Kend Kethore?

“Jo Farisai moko nobiro ire [Yesu], moteme, ka giwacho niya, ‘En kare mondo ng’ato oriemb chiege kuom wach moro amora koso?’”​—Mathayo 19:3.

MOKO kuom joma nodak e kinde Yesu ne penjo kabe kend en gima nyalo siko kata kabe dwarore ni osiki. Yesu nokonegi kama: “Pok usomo ni nyaka a chakruok Jachuech nochueyogi dichwo gi dhako? Kendo nowacho niya, ‘Nikech wachno ng’ato nowe wuon mare gi min mare, kendo nopadre gi chiege, mi ji ariyogo nobed ringruok achiel.’ E momiyo ok pod gin ji ariyo, to gin ringruok achiel. Omiyo gi ma Nyasaye oseriwo, kik dhano opogi.” * (Mathayo 19:4-6) Onge kiawa ni Nyasaye ne dwaro ni dichwo gi dhako mokendore osik e kend margi.

E pinje mang’eny ndalogi, kuom kend apar, kend ang’wen kata mokalo kanyo ‘pogore’ ma kethre chuth. Be en adier ni puonj ma Muma chiwo e wi kend ok nyal tiyo kata matin e kindewagi? Be dibed ni kend mang’eny kethore nikech kend ema en chenro morem?

Par ane ranyisini: Nitie dichwo gi dhako mogero ot. Gitiyo gi kindegi koda tekregi e rito odno maber. Odno ok mukre. Kae to, nitie dichwo gi dhako machielo ma bende ogero ot machalo gi mano ndi to ok gikaw kinde kata tiyo gi tekregi e rito odgino. Odgi gore piny mi gijwang’e. Ang’o momiyo ot mar ariyoni ne omukore​—ot ema ne rach koso weg odno? Onge kiawa ni weg odno ema ne ojwang’o ting’ margi.

E yo ma kamano bende, bedo ni kend mang’eny kethore ok onyiso ni kend en chenro morem. Kend tara gi tara mosedhi maber nyiso adier ni kend ok en chenro morem. Kend ma kamago kelo mor kendo tego joma nie kendgo, joodgi, koda oganda. Mana kaka dwarore ni orit ot pile, kend bende dwarore ni orit mondo eka odhi maber.

Bed ni kend mari eka ochakore, kata osebedoe kuom higini mang’eny, puonj ma Muma chiwo kuom kaka onego orit kendo oteg kend, gin puonj matiyo gadier. Ne ane ranyisi moko e ite maluwogi.

[Weche moler piny]