2. Some gi Chuny Moikore Rwako Wechege

 Kaka Inyalo Winjo Tiend Weche Manie Muma

Be osiepni moro osegawachoni weche moko maricho kuom ng’at moro ma ne pok iromogo kata matin? Ka gikone ne iromo gi ng’atno, be weche ma osiepni ne onyisi kuome ne oumo wang’i ka moni neno kido mabeyo mag jalo? Gima chalo kamano bende nyalo timore kuom wach winjo tiend weche manie Muma.

JAOTE Paulo nochiwo siem kuom gima nyalo timore kapo ni wasomo Muma to waonge gi chuny mar rwako weche manie iye. Kowuoyo kuom Jo-Yahudi moko ma nodak e ndalone, Paulo nondiko kama: “An janeno margi ni gin jokinda kuom Nyasaye, to en kinda ma onge gi ng’eyo.”​—Jo Rumi 10:2.

Moko kuom Jo-Yahudigo ne ok oikore mar rwako adiera moro ma Ndiko mag Dho-Hibrania ne elo ayanga: tiende ni wach jal ma ne dhi bedo Mesia. Yesu Ja-Nazareth, nochopo weche duto ma Ndiko ne dwaro kuom Mesia, kendo nochopo weche duto ma ne okor e wi Mesia. To ema podi paro moko moridore ma Jo-Yahudi ma ndalone ne nigo e chunygi, ne omono thothgi winjo tiend Wach Nyasaye.

Ang’o mwanyalo puonjore kuom wach Jo-Yahudigo? Wapuonjore ni somo Muma gi chuny moikore rwako weche manie iye en gima dwarore ahinya. Ka ng’ato ng’ado ne Muma bura chon kapok osome, mano nyalo mone winjo tiend adiera manie iye.

Kuom ranyisi, profesa moro mar weche din e dala mar North Carolina e piny Amerka wacho ni, Muma en ‘mana buk kaka buge mamoko mag dhano, moting’o pach dhano, ma thothgi gin mana paro mopogore gi mag dhano mamoko, kendo onge moro kuom parogo manyalo tayowa  gadier chutho kuom kaka onego wadag.’ Kapo ni ng’ato nyalo somo Muma kokawe mana “kaka bug dhano,” donge biro bedone mayot kwedo kendo weyo tiyo gi puonj manie iye maok omorgo en owuon?

Mopogore gi mano, Muma to jiwowa ni wabed gi chuny mar some ka wapuonjore wechene gi kinda. Kowuoyo kuom Jo-Beria ma nodak e ndalo mag Paulo, Ndiko wacho kama: ‘Ne girwako wach ka chunygi oikore chutho, ka ginono weche manie Ndiko pile, mondo gine ka wechego dibed kamano.’ (Tich Joote 17:11) Mana kaka Jo-Beria, nyalo dwarore ni mondo iwe bedo gi chuny mar ng’ado ne Muma bura chon kapok isome, nimar mano nyalo moni winjo tiend weche manie iye. Som Wach Nyasaye gi chuny moikore rwako weche manie iye, kendo gi chuny mar fwenyo ote majaber moa kuom Wuon-go.