Be Onego Iyie Mana gi Gima Wang’i Neno?

“Ng’at ma nigi kiawa kabe Nyasaye nitie, paro ni tek chuth ng’eyo adiera kuom weche kaka, bedoe mar Nyasaye koda ngima mar kinde mabiro, ma gin e weche ma Jokristo koda dinde mamoko temo nono. Kata ka ng’eyo adiera kuom wechego ok tek, to otek gie sani.”​—JA FILOSOFI MILUONGO NI BERTRAND RUSSELL, 1953.

JAL ma ne okwongo biro gi paro ma kamano, ne en Thomas Huxley, jasayans ma ne nono weche le. Huxley, ma ne onyuol e higa 1825, ne odak e tieng’ achiel gi Charles Darwin, kendo ne oriwo lwedo puonj mar ni gik moko nosieko kendgi ma ok ochwegi. E higa 1863, Huxley nondiko ni, ne ok onyal neno gimoro amora manyiso ni nitie Nyasaye “moherowa kendo madewowa kaka din mar Jokristo puonjo.”

Thoth ji ndalogi nyalo yie gi paro mag joma nong’ere ahinyago, ka giwacho ni ginyalo mana yie gi gigo ma wang’gi neno kende. Ginyalo wacho ni, keto yie kuom ng’ato, kata kuom gimoro ma onge gimomiyo, en tim fuwo.

Be Muma chikowa ni wayie ayiea ni Nyasaye nitie? Ooyo. Muma nyiso ni en tim fuwo ka ng’ato keto yie kuom gik miwacho awacha ma ok nyal sir. Muma wacho ni, ‘ng’ama riekone tin oyie ayiea weche duto, to ng’ama jaterre mos oparo maber yo ma dowuothie.’​—Ngeche 14:15.

To nade bedo gi yie ni Nyasaye nitie? Kapok wanono kabe oherowa kata kabe odewowa, be nitie gima nyiso ni Nyasaye nitie kuom adier?

Kido mag Nyasaye Nenore

Sama nowuoyo gi jo Athene moko ma ne gin josomo ahinya, Paulo jandik Muma nowacho ni, Nyasaye “nochueyo piny gi gik moko duto manie iye.” Paulo nowacho ne joma ne nigi kiawago ni, Nyasaye ohero dhano, kendo ni “ok obor kodwa ng’ato ka ng’ato.”​—Tich Joote 17:24-27.

Ang’o momiyo Paulo ne nigi adier ahinya ni Nyasaye nitie, kendo ni ohero dhano ma gin chwechne? Paulo nolero achiel kuom gik manyiso ni Nyasaye nitie, kane ondiko ne Jokristo wetene ma ne ni e dala mar Rumi. Nowacho kuom Nyasaye kama: “Nyaka a chuech piny gik ma ok ne mag Nyasaye, kaka tekone mochwere, gi kite, mineno kuom gik ma en nochueyo, nenore ratiro.”​—Jo Rumi 1:20.

It maluwo wuoyo kuom kido adek mag Nyasaye manyalo nenore ratiro kuom gik mosechweyo. Sama inono ranyisigi, penjri ane kama, ‘Ng’eyo kidogo mag Nyasaye nyalo konya nade?’

[Weche manie ite mar 3]

Muma ok chikwa ni wayie ayiea ni Nyasaye nitie