1, 2. (a) Ang’o momiyo makruok gi Nyasaye en gima duong’ ahinya ne Jokristo madier, to wachno otudore nade gi weyo riwo lwedo ywaruok mag piny? (Ne picha manie chak sulani.) (b) Ji mang’eny omakore gi gik mage ahinya, to mano nyalo kelo ang’o?

JOKRISTO madier gin joma omakore gi Nyasaye kendo ok giriw lwedo weche siasa kinde duto. Nikech ang’o? Mano en nikech joma ochiwore ne Jehova nosingorene ni gibiro here, gibiro makore kode, kendo gibiro luwo chikene. (1 Joh. 5:3) Wadwaro luwo chike makare mag Nyasaye kamoro amora ma wadakie, kata bed ni ne wapon kanye, wawuok e piny mane, kata e oganda mane. Makruok gi Jehova kaachiel gi Pinyruodhe e gima wakawo mapek moloyo gimoro amora. (Mat. 6:33) Mano nyiso ni Jokristo madier ok onego odonjre e tungni kod ywaruok mag pinyni.—Isa. 2:4; som Johana 17:11, 15, 16.

² Joma ok lam Jehova nyalo hero ahinya pinje ma giwuokie, dhok ma giwacho, kido gi timbe mag oganda ma nonyuolgie, kata mana hero jotugo ma wuok e pinjegi. Gima lit en ni hero gigo ahinya osekelo piem kod ywaruok, ma seche moko osechuero remo kendo miyo ogendni onegore. Kata obedo ni ok wadonjre e wechego, yore ma ji tiyogo e tieko ywaruok manie kindgi, nyalo miyo wahinyre kaachiel gi joodwa. To nikech  Nyasaye nochueyowa gi kido mar dwaro neno ni gik moko timore e yo ma ratiro, sama sirkande mag dhano okawo okang’ ma ok owinjore, wanyalo neno ni gima gitimono ok ni kare kata matin. (Chak. 1:27; Rapar 32:4) Wawinjoga nade sama gima ok ni kare otimore? Nyalo bedo mayot ahinya chako riwo lwedo konchiel weche mag piny ma wadonj e ywaruok mag pinyni.

3, 4. (a) Ang’o momiyo Jokristo ok riw lwedo ywaruoge manie piny? (b) Sulani biro wuoyo kuom ang’o?

³ Riwruoge ma tayo dhano nyalo jiwo ji mondo okaw okang’ mar nyiso ni gichung’ kon mane sama ywaruok moro nitie. Jokristo madier to ok nyal timo kamano. Ok wariw lwedo riwruoge mag siasa ma dhi nyime e pinyni, kendo ok wadonjre e weche lweny. (Mat. 26:52) Ok wanyal yie mondo oyondhwa wariw lwedo ywaruok manie pinyni kwaparo ni achiel kuom gik ma kelo ywaruok e piny Satanni, ber moloyo machielo. (2 Kor. 2:11) Nikech ok wan mag piny, ok wariw lwedo ywaruok moro amora manie piny.—Som Johana 15:18, 19.

⁴ Kata kamano, nikech wan dhano morem, nyalo bedo ni moko kuomwa kedo matek mondo gigol kido ma kelo pogruok ma ne gin-go chon. (Yer. 17:9; Efe. 4:22-24) Omiyo, sulani biro wuoyo e wi puonj moko ma biro konyowa loyo kido ma kamago. Bende, wabiro nono kaka wanyalo tiego pachwa kod chunywa mondo wasik ka wamakore gi Pinyruodh Nyasaye.

5, 6. Kane Yesu nie piny, noneno nade ywaruok ma ne nitie e piny ma nodakie, to nikech ang’o?

⁵ Kapo ni ok ing’eyo gima inyalo timo ka wach moro omaki, ber kipenjori ni, ‘Debed ni wachni omako Yesu, dotimo ang’o?’ Yesu nodak gi ji mowuok kuonde mopogore opogore kaka Judea, Galili, Samaria, kod mamoko. Muma nyiso maler ni ne nitie ywaruok e kind ogendnigo. (Joh. 4:9) Ywaruok be ne nitie e kind Jo-Farisai kod Jo-Sadukai (Tich 23:6-9), e kind josol osuru kod jomamoko (Mat. 9:11), kendo e kind joma nodhi e skunde mag jorabi kod joma ok nodhi e skundego. (Joh. 7:49) E kinde Jokristo mokwongo, piny Israel ne nie bwo loch Rumi, to Jo-Israel ne ok dwargi malich. Kata obedo ni Yesu ne kedo ne din maradier kendo noyie ni warruok a kuom Jo-Yahudi, ne ok ojiwo jopuonjrene mondo opar ni gibeyo moloyo jomamoko. (Joh. 4:22) Kar mano, nojiwogi mondo gihergi kendo gikawgi kaka jowetegi.—Luka 10:27.

⁶ Ang’o momiyo Yesu ne ok okawo ni oganda moro ber moloyo machielo? Mano en nikech en kaachiel gi Wuon mare ok giriwga lwedo ywaruok me piny. Kane Jehova ochueyo dichwo gi dhako mokwongo ka en gi Wuode, nodwaro ni dhano opong’ piny. (Chak. 1:27, 28) Nyasaye nochueyo dhano e yo ma ne nyalo miyo ginyuol ogendni ma nigi pien del mopogore opogore. Jehova gi Yesu ok okawo ni oganda moro, dhok moro, kata piny moro ni ber moloyo mamoko. (Tich 10:34, 35; Fwe. 7:9, 13, 14) Nyaka waluw ranyisi maber ma giketonwa.—Mat. 5:43-48.

7, 8. (a) En wach mane ma Jokristo nyaka yier koma gichung’e? (b) En ang’o ma nyaka Jokristo ng’e kodok korka wach tieko chandruoge mag dhano?

⁷ Nitie wach moro achiel ma nyaka wariw lwedo, ma en ratiro ma Jehova nigo mar bedo jaloch e wi gik moko duto. Ywaruok e wi wachni nochakore e puodho mar Eden kane Satan oketo  kiawa e yo ma Jehova lochogo. Omiyo e kindegi, dhano duto nyaka yier ka be giyie ni yo ma Nyasaye lochogo ber moloyo mar Satan, kata ka yo ma Satan lochogo ber moloyo mar Nyasaye. To kiwacho adier, be inyiso ni in kor Jehova kuom luwo chikene kar timo gik moko mana kaka in iwuon ineno ni ber? Be iyie ni Pinyruodhe kende e ma nyalo tieko chandruoge mag dhano? Koso iparo ni dhano nigi teko mar chikore owuon?—Chak. 3:4, 5.

⁸ Dwoko michiwo ne penjogi biro nyiso kaka ijadwoko ji sama gipenji paro ma in-go kuom wach moro ma dwarore ni ng’ato otimie yiero. Josiasa kaachiel gi joked ne ratiro mag dhano kod lokruok, osetimo kinda ahinya mondo gimany yore mag tieko gik ma kelo pogruok e kind ogendni. Nyalo bedo ni gin gi paro maber kendo gigombo konyo ji adier. Kata kamano, Jokristo ong’eyo ni Pinyruodh Nyasaye kende e ma biro kelo ne dhano konyruok madier kendo neno ni otim ne ji gik moko e yo makare. Nyaka wawe weche e lwet Jehova. To kapo ni ng’ato ka ng’ato e kanyakla mar Jokristo temo chuno gima oparo ni ber, donge kanyakla magwa nyalo bedo gi pogruok?

9. En chandruok mane ma ne nitie e kanyakla ma Korintho, to Paulo nojiwogi mondo gitim ang’o?

⁹ Ne ane kaka Jokristo mokwongo notimo ka wach moro ma kelo pogruok nosieko e kanyakla mar Korintho. Jomoko ne wacho niya: “‘An mar Paulo,’ ‘An to an mar Apolo,’ ‘To an to an mar Kefa,’ ‘An to an mar Kristo.’” Bed ni ne en ang’o ma ne kelo ywaruok, wachno ok nomoro jaote Paulo nimar ne oketho kuwe mar kanyakla. Nopenjogi kama: “Be Kristo opogore?” Ang’o ma ne dhi konyo kanyaklano? Paulo nojiwogi niya: “Owete, koro asayou kokalo kuom nying Ruodhwa Yesu Kristo ni mondo uduto uwuo ka un gi winjruok achiel, kendo kik ubed gi pogruok e kindu, to ubed e achiel chutho, ka un gi paro achiel kod dwaro achiel.” Kata mana e kindewagi, pogruok moro amora ok onego obedie e kanyakla mar Jokristo.—1 Kor. 1:10-13; som Jo-Rumi 16:17, 18.

10. Jaote Paulo notiyo gi ranyisi mane e nyiso gimomiyo Jakristo ok onego odonj e ywaruok manie pinyni?

¹⁰ Paulo nojiwo Jokristo mowal mondo oket pachgi ahinya e pokgi mar dhi dak e polo kar dich gi gige piny. (Fil. 3:17-20) * Ne onego gibedi jombetre tiende ni joma oor mondo oti e lo Kristo. Jombetre ok donjrega e weche mag piny ma oorgie. Gidich gi weche mag piny ma giwuokie. (2 Kor. 5:20) Jokristo ma nigi geno mar dak e piny bende gin raia mag Pinyruodh Nyasaye. Omiyo, ok en gima owinjore mondo giriw lwedo konchiel ywaruok ma dhi nyime e pinyni.

11, 12. (a) En kit dak mane ma nyalo miyo makruok gi Pinyruodh Nyasaye obed matek ne Jakristo? (b) En wach mane ma noyudo nyaminwa moro, to nonyagore kode nade?

¹¹ Kuonde mang’eny e piny, joma wuok e oganda moro dakga kanyachiel. Kitgi gi timbegi chalre, dhok ma giwacho en achiel, kendo weche mathoth oriwogi to magi duto miyo gibedo gi nyadhi kod sunga moro. E weche ma kamago, Jokristo nyaka tieg pachgi kod chunygi mondo ging’e kaka onego gitim kodok korka weche ma kelo ywaruok monego ng’ato ochiwie paro. Ere kaka ginyalo timo mano?

 ¹² Ne ane ranyisi mar Mirjeta * ma wuok e alwora moro ma chon ne en piny Yugoslavia. Nodongo e gweng’ ma ji ne mon gi Jo-Serbia. Bang’ puonjore ni Jehova ok buon ng’ato ang’ata kendo ni Satan e ma jiwoga tungni manie ogendni, notimo kinda ahinya mondo olok pache. Kata kamano, kane lweny otugore e alwora ma Mirjeta nodakie, sigu ma ne en-go chon nochier e chunye kendo mano nomiyo oyudo ka tekne lendo ne Jo-Serbia. Bang’e noduogo ofwenyo ni ne ok onyal ling’ aling’a kogeno ni siguno biro rumo kende. Nolamo Jehova kokwaye mondo okonye loyo pekno kendo mondo omed kindane e tij lendo ma chop kama dobedie painia. Owacho niya: “Asefwenyo ni keto pacha e tij lendo e gima osebedo ka konya ahinya. Sama an e tij lendo, atemo luwo ranyisi mar Jehova mar bedo ng’at mohero ji, kendo mano osemiyo siguno orumo.”

13. (a) En ang’o ma ne ok omoro Janeno moro to notimo nang’o? (b) Gima notimore ne Zoila puonjowa ang’o?

¹³ Ne ane ranyisi machielo mar nyaminwa miluongo ni Zoila. Thurgi sie en Mexico, to sani en e kanyakla moro man Ulaya. Nofwenyo ni e kanyaklano, owete moko ma ne wuok Latin America, ne wuoyoga marach e wi piny ma ne oae, kit ngimagi, kod thumbegi. In ditimo ang’o? En adier ni weche ma kamago ne ok mor Zoila. Kata kamano, gima ber ma notimo, en ni nolamo Jehova mondo okonye thiro paro maricho ma ne nyalo bet e chunye. Nyaka wayie ni Jokristo moko kuomwa pod nyagore gi paro maricho ma chalo kamago. Ok dwaher wacho kata timo gimoro ma nyalo kelo pogruok e kind owetewa kata jomamoko kata ma nyalo miyo gipar ni oganda moro ber moloyo machielo.—Rumi 14:19; 2 Kor. 6:3.

14. Ere kaka Jokristo nyalo tiego pachgi kod chunygi kodok korka yo ma ginenogo joma opogore kodgi?

¹⁴ Be dibed ni kaka ne ipon kata alwora ma ne idakie nomiyo ihero pinyu kata thuru moloyo kuonde moko? Dibed ni paro ma kamago pod nie chunyi nyaka sani? Jokristo ok onego owe hera ma giherogo pinygi omi gicha jomoko. To nade kapo ni ifwenyo ni in gi paro ma ok owinjore kuom joma wuok e piny machielo, ma kit ngimagi opogore gi maru, ma wacho dhok mopogore gi maru, kata ma pien dendgi opogore gi maru? Nyalo bedo maber ka iparo matut yo ma Jehova nenogo joma paro ni pinjegi beyo moloyo mamoko kata mochayo jowetegi. Timo nonro e wi wechegi nyalo konyi ahinya sama itimo puonjruok ma mari iwuon kata sama utimo lamo maru mar joot. Kae to kwa Jehova mondo okonyi irwak paro ma en-go e wi wechegi.—Som Jo-Rumi 12:2.

15, 16. (a) Bedo ni wamokore gi Nyasaye nyalo miyo jomamoko okawwa nade? (b) Ere kaka jonyuol nyalo konyo nyithindgi onyagre gi weche ma biro dwaro ni gisik ka gimakore gi Nyasaye?

¹⁵ Jotich Jehova duto nyalo romo gi wach ma nyalo dwarore ni gibed mopogore gi joma gitiyogo, gisomogo, jirendegi, wedegi, kod jomamoko. (1 Pet. 2:19) Nyaka to wabed mopogore! Ok onego okawwa gi wuoro ka piny osin kodwa nimar Yesu nosenyisowa wachno chon. Thoth joma kwedowa ok ong’eyo gimomiyo Jokristo madier ok riw lwedo weche piny. Wan to wachno en gima duong’nwa ahinya.

¹⁶ Mondo wanyis ni wamakore gi Jehova, nyaka wachung’ motegno kata weche tek manade. (Dan. 3:16-18) Luoro dhano nyalo mako ng’ato ang’ata. Kata  kamano, rowere nyalo yudo ka teknegi ahinya bedo mopogore gi jowetegi. Kapo ni nyithindi oromo gi weche moko ma korgi tek, kaka wach goyo ne bandera salut kata nyasi mag pako piny, konygi mapiyo kaka nyalore. Sama utimo Lamo mar Joot kony nyithindi ong’e kaka Jehova neno wechego, to mano biro konyogi nyagore gi wechego ka gin gi chir. Konygi mondo giler yie ma gin-go e yo maler kendo e yor luor. (Rumi 1:16) Mondo weche obed mayot ne nyithindi, dhi iwuo gi jopuonjgi e wi wechego ka nyalore.

17. En paro mane monego watang’go, to nikech ang’o?

¹⁷ En adier ni seche moko wanyalo hero piny ma onyuolwae, kitwa gi timbewa, dhok ma wawacho, kod kit chiemo ma ne wapon-go. Kata kamano, ok onego wapar ni gik ma waherogo ni e ma beyo moloyo mamoko. Mondo wabed mamor, Jehova nochueyonwa gik mopogore opogore. (Zab. 104:24; Fwe. 4:11) Koro ang’o ma dimi ipar ni yo ma itimogo gik moko e ma ber?

18. Ere kaka bedo gi paro ma chal gi mar Jehova nyalo kelonwa gueth?

¹⁸ Nyasaye dwaro ni ji mopogore opogore duto ong’e adiera e yo malong’o chuth mondo gibi giyud ngima mochwere. (Joh. 3:16; 1 Tim. 2:3, 4) Bedo ng’at moyie rwako paro mag ji mopogore opogore, miyo wamedo bedo mamor e ngimawa kendo miyo warito kuwe ma wan-go kaka Jokristo. Sama wadhi nyime makore gi Jehova, nyaka wawe donjore gi ywaruok mag pinyni. Wabedo motang’ mondo wechego kik mienwa kata matin. To mano kaka waduoko ne Jehova erokamano kuom gonyowa a e tuech mar piny Satan mopong’ gi sunga, piem, kod gik mamoko ma kelo pogruok! Wadhiuru nyime bedo joma ohero kuwe mana kaka jandik-zaburi moro nonyiso kowacho niya: “Neuru kaka ber kendo long’o nadi ka owete odak kaachiel e lalrwokgi!”—Zab. 133:1.