BEZALEL gi Oholiab ne ong’eyo tij gedo. Kane gin wasumbni Misri, ne giselosoga matofali mang’eny ma ne ok ginyal kata paro kwan-gi. To mano ne gitimo chon ahinya. Koro to ne gidhi tiyo tich moro ma ne idhi tim e rang’iny ma malo ahinya nikech nomigi migawo mar chung’ ne tij loso tabernakel. (Wuok 31:1-11) Kata kamano, ji matin ahinya e ma ne dhi neno gik mabeyo ma ne gidhi loso. Bedo ni ji matin e ma ne dhi neno tijgi maber, be mano ne dhi nyoso chunygi? Be nochuno ni ji nyaka pwo tijgi? Be ochuno ni nyaka ji opwo tiji eka ibed mamor?

Moko kuom gik ma nolos e i tabernakel ne ber gi ber miwuoro. Non ane ranyisi mar jokerubi ma ne olosi gi dhahabu kae to oket e wi sandug singruok. Jaote Paulo nowacho ni jokerubigo ne “nigi duong’.” (Hib. 9:5) Tem ane paro kaka gik ma ne olos gi dhahabu mothedhgo ne onyiny kendo ne long’o!—Wuok 37:7-9.

Kapo ni gik ma Bezalel gi Oholiab noloso inyalo yudi sani, inyalo ketgi e miusiam mabeyo mogik, kama ji mang’eny nyalo nenogie kendo pwoyogi. To kinde ma nolosie gigo, ji adi ma noneno bergi? Jokerubigo ne oketi Kama Ler Moloyo. Omiyo, jadolo maduong’ kende e ma ne nyalo nenogi dichiel e higa kodonjo kuno e Odiechieng Loso Winjruok. (Hib. 9:6, 7) Kuom mano, mana ji manok kende e ma ne onenogi.

Debed ni in Bezalel kata Oholiab ma notiyo matek ahinya mondo olos gik mabeyo miwuoro, diwinjo nade bang’ fwenyo ni ji manok kende e ma noneno gik mabeyo ma ilosogo? Kindegi, ji mang’eny neno ni gitiyo tich maber mana sama mbesegi pakogi kendo pwoyo gik ma gitimo. Gineno ni mano e yo mar pimo tich maber ma gichuero ne luya. Jotich Jehova to opogore. Mana kaka Bezalel gi Oholiab, wabedo mamor sama watimo dwach Jehova kendo ng’eyo ni omor gi tijwa.

E ndalo Yesu, jotend dinde ne thoro lemo mana mondo gimorgo ji. Yesu to nochiwo paro  machielo: Lem gi chuny modimbore ma ok igomb ni joma rangi opaki. Mano konyo nade? “Wuonu ma neno ka en kama opondo nochuli.” (Mat. 6:5, 6) Nenore maler ni gima duong’ ok en gima ji paro e wi lamowa, to gima Jehova owuon paro. Paro ma en go kuomwa e ma miyo lamowa bedo maber gadier. Mano bende e gima inyalo wachi kuom gimoro amora ma watimo e tij Nyasaye. Ok wane ni tich ma watiyo ber mana nikech jomoko pwoyowa, to nikech tijno moro Jehova, “ma neno ka en kama opondo.”

Ka tij loso tabernakel norumo, “bor polo noumo hema mar chokruok, kendo duong’ maler mar Jehova nopong’o tabernakel.” (Wuok 40:34) Donge mano nyiso maler ni Jehova ne mor gi tich ma notimno? Iparo ni Bezalel gi Oholiab nowinjo nade sama mano notimore? Kata obedo ni nyingegi ne ok ondik e gik ma ne gilosogo, nyaka bed ni ne gimor ahinya ng’eyo ni Nyasaye noguedho kindagi. (Nge. 10:22) E higni ma noluwo, nyaka bed ni chunygi ne mor ahinya neno ka gik ma ne gilosogo pod itiyogo e tij Jehova. Kinde ma ibiro chier Bezalel gi Oholiab e piny manyien, onge kiawa ni gibiro bedo mamor ahinya ng’eyo ni tabernakel notigo e lamo madier kuom higni ma dirom 500!

E riwruok mar oganda Jehova e kindegi, nitie ji mathoth ma tiyo matek ma ok ohul nyinggi. Jogo oriwo: Joma loso vidio mag katun, joma goro piche, joma wer, jogo piche, joma loko dhok, kod jondiko. Onge ng’at ma nyalo fwenyo tich matek ma gitimo. Mano bende e gima inyalo wachi e wi tije mitimo e kanyakla mokalo 110,000 e piny mangima. Ng’a ma nenoga owadwa ma rito weche pesa e kanyakla ka pong’o fombe mag pesa e giko dwe? Ng’awa ma janeno ka jagoro mar kanyakla iko ripode mag tij lendo? Ng’ama nenoga ka owadwa kata nyaminwa moro oloso kamoro mokethore e Od Romo?

Kane Bezalel gi Oholiab otho, onge okombe, kata midila ma ne giyudo kuom tij gedo ma ne gitiyo e rang’iny ma malo. E wi mano, ne ok ondik nyinggi e gik ma ne giloso mondo ji opargigo. Kata kamano, nitie gimoro maber mogik ma ne gibedogo, ma en ni Jehova noyie kodgi. Wan gadier ni Jehova ne mor gi tijgi. Waluwuru ranyisi margi mar bedo joma bolore kendo bedo moikore tiyo ne Nyasaye.