1, 2. (a) Gin ngeche mage ma Yesu oa goyo ne osiepene? (Ne picha manie chak sulani.) (b) Ang’o monego wang’e kuom ngero mar rombe gi diek?

YESU osebedo ka wuoyo gi Petro, Andrea, Jakobo, kod Johana ma gin osiepene mogeno ahinya. Eka gia winjo kowuoyo e wi ngero mar jatich mogen kendo mariek, nyiri apar ma silili, kod ngero mar talanta. Koro otieko mbakano kowuoyo kodgi e wi ngero moro machielo. Owachonegi kaka kinde biro ma “Wuod dhano” nong’ad ne “ogendni duto” bura. To mano kaka weche manie ngeroni morogi! E ngerono, Yesu wuoyo e wi grube ariyo mag ji, ma achiel iluongo ni rombe to machielo iluongo ni diek. E wi mano, owuoyo bende kuom grup mar adek ma oluongo ni ‘owete Ruoth.’—Som Mathayo 25:31-46.

² Jotich Jehova osebedoga gi siso ahinya mar ng’eyo tiend ngeroni, nikech ei ngeroni, Yesu nowuoyo e wi gima ochomo dhano duto. Nonyiso gimomiyo jomoko ne dhi yudo ngima mochwere to moko iketho nyaka chieng’. Ngimawa otenore kuom ng’eyo tiend ngeroni kod kaka waluwo adiera ma ne Yesu opuonjo e ngeroni. Omiyo, e sulani wabiro nono penjo ma luwogi: Jehova osebedo ka leronwa tiend  ngeroni mos mos e yo mane? Ang’o momiyo wanyalo wacho ni ngeroni nyiso ni onego wakaw tij lendo gi pek? En ng’ano sie monego otim tij lando wach maber? To ang’o momiyo mae e sa mowinjore wamakre gi “Ruoth” kod joma oluongo ni ‘owetena’?

3, 4. (a) Gin weche mage adek ma nyaka wang’e eka wawinj tiend ngero mar rombe gi diek? (b) E higa mar 1881, gaset mar Zion’s Watch Tower nolero nade tiend ngerono?

³ Mondo wawinj tiend ngero mar rombe gi diek e yo makare, nyaka wakwong wawinj tiend gik moko adek madongo e ngerono: joma iwuoyo kuomgi, kinde ming’adoe bura, kod gimomiyo ipogo dhano e grube ariyo, mar rombe kata mar diek.

⁴ E higa mar 1881, gaset mar Zion’s Watch Tower nonyiso ayanga ni “Wuod dhano” ma be iluongo ni “Ruoth,” en Yesu. Jopuonjre mag Muma e kindego nong’eyo ni joma Kristo luongo ni ‘owetene’ ochung’ ne joma biro locho kode kaachiel gi ji duto ma biro dak e piny ka koro gin joma kare chuth. Ne giparo ni tij pogo rombe gi diek ne dhi timore kinde Loch Kristo mar Higni Aluf Achiel. Kendo ne giyie ni joma iluongo ni rombe gin joma odak ka luwo chik Nyasaye mar hera.

5. E higni mag 1920, ere kaka nomed lernwa adiera e wi ngero mar rombe gi diek?

⁵ E chak higni mag 1920, Jehova nokonyo joge omed ng’eyo maler tiend ngeroni. Gaset mar The Watch Tower ma Oktoba 15, 1923, nomedo jiwo maler ni “Wuod dhano” en Yesu. Kata kamano, gasedno notiyo gi weche mogol e Ndiko e nyiso ni owete Kristo gin mana joma biro locho kode e polo, kendo lero ni rombe gin joma nigi geno mar dak e piny e bwo Pinyruodh Kristo. To nade kinde ma ne idhi pogie rombe gi diek? Gasedno nolero ni kinde Loch Kristo mar Higni Aluf Achiel ne dhi yudo ka owete Kristo locho kode e polo, omiyo ne ok nyal konygi kata jwang’gi gi kueth manie piny. Kuom mano, pogo rombe gi diek ne en gima dhi timore kapok Loch Kristo mar Higni Aluf Achiel ochakore. To gimomiyo ne inyalo wach ni ng’ato en rombo, gasedno notieko ka wacho ni ne idhi fwenygi ni gin rombe nikech ne giyie ni Yesu e Ruodhgi kendo bedo gi geno ni Pinyruoth e ma ne dhi kelo ngima maber.

6. E higni mag 1990 ere kaka nomed ler tiend ngero mar rombe gi diek?

⁶ Kaluwore gi kaka noler wachno, jotich Jehova ne obedo gi paro ni koro ng’ado bura ni ng’ato en rombo kata diel ne en gima dhi timore e kinde duto mag ndalo giko kaluwore gi kaka ng’ato orwako kata ok orwako wach Pinyruoth. Kata kamano, e higni mag 1990, nolernwa wachno. Gaset mar Mnara wa Mlinzi ma Oktoba 15, 1995, ne nitie sula ariyo ma lero tudruok mane nitie e kind weche ma Yesu nowacho e Mathayo 24:29-31 (som) kod ma nie bug Mathayo 25:31, 32. (Som.) * Gasedno notieko nang’o? Nowacho niya: “Pogo kind rombe gi diek en gima biro timore e kinde mabiro.” E kinde mane sie? “Obiro timore e kinde mag ‘masira’ miwuoye e Mathayo 24:29, 30 ka ‘Wuod dhano obiro e duong’ mare.’. . . Kae to  ka piny duto chiegni yudo kethruok, Yesu biro ng’adonegi bura ma otiekgi.”

7. Tiend ngero mar rombe gi diek en ang’o?

⁷ Kindegi wang’eyo maler tiend ngero mar rombe gi diek. Kiwuoyo kuom joma ngerono ochung’ne, Yesu ma en “Wuod dhano,” e Ruoth. To wach ma otigo ni ‘owetena’ ochung’ ne Jokristo mowal ma gin mon kaachiel gi chwo, ma biro locho gi Kristo e polo. (Rumi 8:16, 17) “Rombe” kod “diek” ochung’ ne ji moa e ogendini duto. To gin ok owalgi kod roho maler. Nade kinde ma ibiro ng’adie burano? Mano biro timore ka masira maduong’ ma chiegni chakre, dhi ka rumo. To gimomiyo ibiro ng’ad ne jomoko bura ni gin rombe to jomoko ni gin diek en mane? Mano biro luwore gi kaka ne gisetimo ne owete Kristo mowal ma pod nie piny sani. Nikech wan wang’eyo ni giko mar pinyni okayo machiegni ahinya, wamor ni Jehova osemedo leronwa tiend ngeroni kaachiel gi ngeche mamoko miwuoyoe e Mathayo sula 24 kod 25!

8, 9. Ang’o momiyo iluongo rombe ni ‘joma kare’?

⁸ E ngero mar rombe gi diek, Yesu ok wuo achiel kachiel kuom tij lando wach pinyruoth. Kare, ang’o momiyo wanyalo wacho ni ngerono jiwowa wamed kawo tij lendo e yo mapek?

⁹ Mokwongo, ne ni Yesu puonjo kotiyo gi ngero. Omiyo, nenore maler ni ok owuo kuom wach pogo rombe kod diek masie. Kamano bende, ok owach ni ng’at ma ibiro ng’ad ne bura ni en rombo, ni nyaka pidh, rwak, rit kata limo achiel kuom owete Yesu e jela e yo masie. Kar mano, owuoyo kuom chuny ma ng’ato nyiso sama otimo ne owete Yesu tich kata migawo moro. Yesu neno ng’at moluongo ni rombone kaka ng’at “makare” nikech ng’atno fwenyo ni Kristo pod nigi owetene e piny, kendo ng’atno oikore konyogi e kindegi mag giko.—Math. 10:40-42; 25:40, 46; 2 Tim. 3:1-5.

10. Joma gin kaka rombe nyalo nyiso nade ni giriwo Jokristo mowal lwedo?

¹⁰ Mar ariyo, non ane weche molworo ngero ma Yesu nogoyono. Owuoyo e wi gik ma ne dhi nyiso ni osekawo loch e polo kendo ni wasechako dak e kinde mag giko. (Math. 24:3) Weche motelo e twag Yesu konyowa ng’eyo achiel kuom gik ma ne dhi timore ma en ni wach maber mar Pinyruoth “ne idhi yal e piny mangima.” (Math. 24:14) To kapok ochako wuoyo e wi rombe gi diek, nokwongo ogoyo ngero mar talanta. Mana kaka noler e sula mokalo, Yesu nogoyo ngerono kojiwogo Jokristo mowal, ma gin ‘owetene,’ ni nyaka giyal wach maber gi kinda. Kata kamano, kueth matin ma Yesu noweyono nigi tich mang’eny ahinya mar lando wach maber ne “ogendni duto” kapok giko ochopo. Ngero mar rombe gi diek nyiso maler ni Jokristo mowalgo ne idhi kony. Kuom mano, achiel kuom gik mifwenyogo jogo ma gin kaka rombe, en ni gikonyo owete Kristo kuom riwo lwedo tij lendo. Riwo lwedono oriwo timo gik mage? Be dibed ni en mana chiwonegi gige ringruok kendo jiwogi, koso nitie weche mamoko mathoth?

11. En penjo mane ma wanyalo bedogo, to nikech ang’o?

¹¹ E kindegi, kwan mar jopuonjre Yesu osechopo milion aboro, to thothgi ok gin Jokristo mowal. Yesu nochiwo talanta ne Jokristo mowal kende. (Math. 25:14-18) Mano miyo wapenjore niya, ‘Be Jokristo mamoko bende ne omi migawo mar lando wach maber mar pinyruoth?’ We wanon ane gik ma nyiso ni gin bende onego gitim tijno.

12. Ang’o ma wapuonjore kuom weche Yesu mondik e Mathayo 28:19, 20?

¹² Yesu nochiko jolupne duto mondo olend. Bang’ ka nosechier Yesu, nonyiso jolupne mondo okony ji obed jopuonjrene, ka gipuonjogi rito “weche duto” ma nochikogi. To mano noriwo nyaka tij lendo. (Som Mathayo 28:19, 20.) Kuom mano, jolup Kristo duto nyaka lend, bed ni gin gi geno mar dhi e polo kata dak e piny.—Tich 10:42.

13. Fweny ma Johana noneno puonjowa ang’o?

¹³ Bug Fweny nyiso ni tij lando wach maber ne idhi tim gi Jokristo mowal kaachiel gi Jokristo mamoko ma ok owal. Yesu nonyiso jaote Johana fweny mar “miaha,” ma gin Jokristo 144,000 mowal ma biro locho gi Kristo e polo, ma gwelo ji mondo obi “omodh pi ngima nono.” (Fwe. 14:1, 3; 22:17) Pigni ochung’ ne yo ma Jehova resogo dhano koa kuom richo kod tho kokalo kuom misango mar Kristo. (Math. 20:28; Joh. 3:16; 1 Joh. 4:9, 10) Rawar e wach maduong’ ma wajiwo e ote ma walando, kendo Jokristo mowal kawo okang’ mokwongo mar konyo ji ng’eyo wachno kendo yudo ber kokalo kuome. (1 Kor. 1:23) Kata kamano e fwenyno, Johana neno jomoko ma ok nie kueth mar miaha. Gin bende inyisogi mondo giwach ni, “Bi!” Girwako wachno kae to gin bende gikawo okang’ mar gwelo jomoko bende obi omodh pi ngima. Grup mar ariyoni nigi geno mar dak e piny. Kuom  mano, fwenyni nyiso maler ni ji duto mowinjo kigwelogi ni “bi,” ma giyie biro bende nigi ting’ mar lando wach maber ne jomoko.

14. Luwo “chik Kristo” oriwo timo ang’o?

¹⁴ Ji duto ma luwo “chik Kristo” nyaka lend. (Gal. 6:2) Jehova dwaro ni jogo duto ma lame oluw chike machal. Kuom ranyisi, nonyiso Jo-Israel niya: “Chik achiel nobedi kuom en monyuol e piny, kod jamwa madak e kindu.” (Wuok 12:49; Lawi 24:22) Jokristo ma sani ok ochik mondo omakre gi Chike Musa. Kata kamano waduto, bed ni wan Jokristo mowal kata ooyo, wan gi migawo mar luwo “chik Kristo.” Chikno oriwo weche duto ma Yesu nopuonjo. Achiel kuom gik ma Yesu nopuonjo en nyiso hera. (Joh. 13:35; Jak. 2:8) Yo maberie moloyo mar nyiso ni wahero Nyasaye, Kristo, kod jowetewa en kuom lando wach maber mar Pinyruoth.—Joh 15:10; Tich 1:8.

15. Ang’o momiyo wanyalo wacho ni chik ma Yesu nochiwo mar lendo omako Jokristo duto?

¹⁵ Weche ma Yesu nowacho ne ji manok nyalo mulo ji mang’eny. Kuom ranyisi, Yesu notimo singruok e wi Pinyruoth gi jootene 11 kende, kata kamano singruogno oriwo Jokristo mowal 144,000 duto. (Luka 22:29, 30; Fwe. 5:10; 7:4-8) E yo ma chalo kamano bende, Yesu nochiko mana jolupne manok ma ne ofwenyorenegi ka nosechier ni mondo gilend. (Tich 10:40-42; 1 Kor. 15:6) To jopuonjrene mokwongo duto noluwo wachno kata bed ni ne ok giwinjo achiel kachiel ka Yesu wacho ni gitim kamano. (Tich 8:4; 1 Pet. 1:8) Kamano bende, Yesu ok nowuoyo achiel kachiel gi jolendo mag Pinyruoth milion aboro ma sani lendo gi kinda. Giduto ging’eyo ni gin gi ting’ mar bedo gi yie kuom Kristo kendo ginyiso mano kuom timo tij lendo.—Jak. 2:18.

16-18. Ere kaka jogo ma nigi geno ni ginibed rombe konyo owete Kristo, to ang’o momiyo onego gitim mano gie sani?

¹⁶ Satan kedo ahinya gi owete Yesu modong’ e piny sani, kendo omedo timo kamano gi kinda ahinya nikech “odong’ mana gi kinde manok.” (Fwe. 12:9, 12, 17) Kata bed ni giromo gi tembe, gin e ma gitayo tij lendo gi kinda e okang’ ma pok ne otimego nyaka nene. Waonge kiawa ni Yesu ni kodgi kendo otayogi sama gitimo kinda.—Math. 28:20.

¹⁷ Jokristo ma kwan-gi medore kendo ma nigi geno mar bedo rombe, okawo tij konyo owete Kristo kaka migawo makende ahinya. Ok gitim kamano ka gilendo kende to bende ginyiso mano e yore mamoko. Kuom ranyisi, gigolo chiwo mag pesa kendo gikonyo e tij gero Ute Romo, Ute Chokruok mag Alwora kod ofise mag Joneno, to bende giriwo lwedo joma “jatich mogen kendo mariek” omiyo ting’ mar tayo oganda Jehova.—Math. 24:45-47; Hib. 13:17.

¹⁸ Kinde okayo machiegni ma malaike biro weyo mako yembe makelo masira maduong’. Mano biro timore ka owete Yesu ma nodong’ e piny oseyudo alama mogik. (Fwe. 7:1-3) Kapok Har–Magedon ochakore, Jokristo mowal ma pod nie piny biro dhi e polo. (Math. 13:41-43) Omiyo, magi e kinde ma jogo ma geno mondo chieng’ ong’adnegi bura ni gin rombe, onego okony owete Yesu gi chunygi duto.