We Jehova Otayi Mondo Ibed Thuolo Gadier
We Jehova Otayi Mondo Ibed Thuolo Gadier
“[Non] chik makare, ma miyowa bedo thuolo.”—JAK. 1:25.
BE INYALO LERO?
En chik mane matero ng’ato e thuolo madier, to jomage mayudo ber kuom chikno?
Ng’ato nyalo bedo nade thuolo gadier?
En thuolo mane ma joma siko e yor ngima biro yudo?
1, 2. (a) Wang’eyo nade ni ji ok ni thuolo e piny sani, to nikech ang’o? (b) En thuolo mane ma jotich Jehova geno yudo e kinde mabiro?
WADAK e kinde ma timbe guondo, ketho chik, kod timbe gero medore ahinya. (2 Tim. 3:1-5) Nikech mano, sirkande mopogore opogore osemedo keto chike, jiwo teko ma polise nigo, kendo keto piche mamako gik matimore. E pinje moko, jomoko osejiwo arita margi giwegi kuom keto alarm e utegi, medo yore mag loro dhoudi motegno koda keto sing’enge ma nigi sitima. Moko bende ok yie wuok oko gotieno kata weyo nyithindgi otug kendgi maok girangogi bed ni en otieno kata odiechieng’. Nenore maler ni ji ok ni thuolo kendo nenore ni mano biro medo dhi nyime.
2 E puodho mar Eden, Satan noriambo ni dhano nyalo bedo gi thuolo madier ka giweyo winjo Jehova. To mano ne en miriambo marach manade! Kuom adier, kaka ji medo weyo luwo chike mag Nyasaye e kaka dhano medo chandore. Gik maricho ma medo timoregi mulo nyaka ngima jotich Jehova bende. Kata kamano, wan gi geno mar neno ka dhano duto igonyo oa e tuech mar richo gi top, mondo giyud gima Muma luongo ni “thuolo gi duong’ mar nyithind Nyasaye.” (Rumi 8:21) Kendo Jehova osechako iko jotichne mondo oyud thuolono. E yo mane?
3. Jehova osemiyo jolup Kristo chik mane, to gin penjo mage ma wabiro nono?
3 Dwoko yudore e wach ma jandik Muma Jakobo noluongo ni “chik makare, ma miyowa bedo thuolo.” (Som Jakobo 1:25.) Loko mamoko mag Muma keto wechego ni “chik maketowa thuolo” (The New English Bible) kod “chik makare mar thuolo” (The New American Bible). Kinde mang’eny, ji neno chike kaka rageng’ to ok kaka gik mamiyo gibedo thuolo. To kare, “chik makare, ma miyowa bedo thuolo” en ang’o? Kendo ere kaka oketowa thuolo?
CHIK MAMIYO WABEDO THUOLO
4. “Chik makare, ma miyowa bedo thuolo” en ang’o, to jomage mayudo ber kuom chikno?
4 “Chik makare, ma miyowa bedo thuolo” ok en Chik Musa, nikech Chik Musa nomiyo richo onenore ayanga kendo Kristo nochopogi kare. (Math. 5:17; Gal. 3:19) To kare Jakobo ne loso kuom chik mane? Nowuoyo kuom “chik mar Kristo,” mabende iluongo ni “chik mar yie” kendo ni “chik ma miyowa bedo thuolo.” (Gal. 6:2; Rumi 3:27; Jak. 2:12) Omiyo “chik makare” oriwo gik moko duto ma Jehova dwaro ni mondo watim. Jokristo mowal kaachiel gi ‘rombe mamoko’ yudo ber kuom chikno.—Joh. 10:16.
5. Ang’o momiyo chik mamiyo wabedo thuolo ok en ting’ mapek?
5 Mopogore gi chike mag pinje mang’eny, “chik makare” ok tek winjo kendo ok miwa ting’ mapek, kar mano oting’o chik kod puonj mayot luwo. (1 Joh. 5:3) Yesu nowacho kama: “Lota yom, kendo ting’na yot.” (Math. 11:29, 30) E wi mano “chik makare” otenore kuom hera to ok kuom chike mang’eny moridore, nimar ondike e paro koda chuny joma luwe to ok e kidi kaka chike mag Musa.—Som Jo Hibrania 8:6, 10.
KAKA “CHIK MAKARE” KETOWA THUOLO
6, 7. Ang’o minyalo wachi kuom chike mag Jehova, kendo ang’o momiyo chik mamiyo wabedo thuolo ok oridore?
6 Tong’ ma Jehova oketo ne chwechne mariek gin makonyogi kendo ritogi. Kuom ranyisi, par ane chike matayo teko mayudore e chwech. Ji ok ng’ur ni chikego hinyogi. Kar mano, gimor kodgi nimar chikego konyo ahinya e miyo ngima obed maber. E yo machalo kamano, chike Jehova matayo timbe mabeyo kod mamiyo wabedo gi winjruok maber kode kaka onyis e “chik makare” mar Kristo, gin makonyo dhano.
7 Mopogore gi miyowa rit, chik mamiyo wabedo thuolo bende miyowa thuolo mar chopo gombowa duto makare maok wadonjore gi ratiro kod thuolo mag jomoko. Omiyo, gima miyo wabedo thuolo gadier, ma en thuolo mar chopo gombowa mabeyo duto, en nyago gombo makare mawinjore gi kido kod chike mag Jehova. Koket e yo machielo, nyaka wapuonjre hero gik ma Jehova ohero kendo sin gi mago mosin-go, to mano e gima chik mamiyo wabedo thuolo konyowa timo.—Amos 5:15.
8, 9. Jogo maluwo chik mamiyo wabedo thuolo yudo ber mane? Chiw ranyisi.
8 Nikech wan dhano morem, wanyagore mondo walo gombo maricho. Kata kamano, ka wamakore gi chik mamiyo wabedo thuolo, waneno kaka chikno nigi teko mar gonyowa kata mana gie kindegi. Kuom ranyisi: Japuonjre Muma moro miluongo ni Jay nong’iyo ahinya madho ndawa. Kane opuonjore ni timno ok mor Nyasaye, nochune ni nyaka otim yiero. Be ne pod odhi weyo mondo gombo mar ringre ochike koso nodhi yie mondo Jehova otaye? Notimo yiero mariek mar tiyo ne Nyasaye kata bed ni ringrene ne pod gombo ndawa. Nowinjo nade bang’ loyo tim marachno? Owacho kama: “Nawinjo ka an thuolo kendo namor sidang’.”
9 Jay noduogo ofwenyo ni thuolo ma piny chiwo miyo ji “paro weche mag ringruok,” kendo gibedo wasumbini mag gigo, to thuolo ma Jehova chiwo moriwo ‘paro weche mag roho’ gonyo ji kendo terogi e “ngima kod kuwe.” (Rumi 8:5, 6) Jay noyudo teko kanye mar loyo tim bedo misumba ndawa? Tekono ne ok owuok kuome owuon to kuom Nyasaye. Owacho kama: “Ne ajapuonjora Muma maok abara, lemo ka akwayo roho maler, kendo kwayo kony e kanyakla mar Jokristo.” Wan bende yorego nyalo konyowa mondo wabed thuolo gadier. Wane ane kaka mano nyalore.
NON MATUT WACH NYASAYE
10. “Nono” chik Nyasaye tiende en ang’o?
10 Jakobo 1:25 wacho kama: ‘En ma nono chik makare, ma miyowa bedo thuolo, kosiko kotimo kamano noguedh jali e tichne.’ Wach motigo e dho-Grik ni “nono” tiende en “rango gimoro king’iye e yo matut,” madwaro ni iket pachi duto e gino. Ka wadwaro ni mondo chik mamiyo wabedo thuolo oti e pachwa kod chunywa, nyaka wapuonjre Muma gi kinda kendo paro matut e yor lamo gigo ma wasomo.—1 Tim. 4:15.
11, 12. (a) Yesu nojiwo nade gimomiyo dwarore wadag kaluwore gi adiera? (b) Mana kaka onyis malo kanyo, rowere onego otang’ gi wach mane?
11 Dwarore ni ‘wasik’ kata wanan e luwo puonj mag Wach Nyasaye mondo wadag kaluwore gi adiera ma wapuonjore. Yesu bende ne nigi paro ma kamano ka nowacho ne jomoko ma noyie kuome kama: ‘Un kusiko e wachna, eka unubed jopuonjrena adier. Kendo unung’e adiera, kendo adiera nomiu bedo thuolo.’ (Joh. 8:31, 32) Buk moro wacho niya, “ng’eyo” miwuoyo kuome kae, tiende bende nyalo bedo kawo gimoro mapek nikech “gima ng’ato ‘ong’eyono’ konye ahinya e ngimane.” Omiyo, ‘wang’eyo’ adiera e yo maber chuth ka wadak kaluwore gi adierano. Bang’e wanyalo wacho e yo makare ni ‘wach Nyasaye’ “tiyo” e chunywa, ka loko kitwa mondo wamed chalo gi Wuonwa me polo.—1 Thes. 2:13.
12 Penjri ane niya, ‘Be ang’eyo adiera e yo maber? Be adak kaluwore gi adierano? Koso pod agombo “thuolo” moko mag piny? ’ Koparo kinde ma ne en rawera, nyaminwa moro ma nodongo e lwet jonyuolne ma gin Joneno mag Jehova nondiko kama: “Ka idongo e ot ma ji ong’eyo adiera, ok ikaw Jehova kaka ng’at maduong’ ahinya e ngimani. An awuon ne ok ang’eye maber. Ne ok asin gi gik mosin-go. Ne ok apar kabe Jehova dewo gik ma atimo. Be ne ok alem kane an e chandruok. Ne agenora awuon, to sani koro ang’eyo ni ok nowinjore atim kamano nikech ne aonge gi lony e ngima.” Gima ber en ni bang’e nyaminwano nofwenyo ni ok ne en gi paro mowinjore mi notimo lokruok madongo ahinya. Nochako tiyo ne Nyasaye ka en painia mapile.
ROHO MALER NYALO KONYO E KETI THUOLO
13. Ere kaka roho maler mar Nyasaye konyo e ketowa thuolo?
13 Wasomo kama e 2 Jo Korintho 3:17: ‘Kama roho mar Jehova nitie, ema thuolo nitie.’ Ere kaka roho maler konyo e ketowa thuolo? Achiel kuom tije mag roho maler en ni onyago kuomwa kido mamiyo wabedo thuolo, kaka: “hera, mor, kuwe, horuok, miwafu, ng’wono, bedo adiera, muolo, ritruok.” (Gal. 5:22, 23) Ka onge kidogi, to ahinya hera, onge oganda manyalo bedo thuolo gadier ma en gima nenore ayanga e piny ndalogi. Bang’ ka osekwano nyak mar roho, jaote Paulo nomedo wacho kama: “Onge chik ma kwedo magi.” Tiend gima jaoteno ne wacho en ang’o? Onge chik moro amora manyalo geng’o nyak mar roho mar Nyasaye mondo kik odongi. (Gal. 5:18) Ka ok kamano, to kare omiwa chikno nang’o? En dwaro mar Jehova ni mondo wanyag kendo wanyis kido kaka mag Kristo maonge gimoro amora mageng’owa.
14. Jogo maluwo chuny mar piny bedo wasumbini e yore mage?
14 Jogo ma chuny mar pinyni chiko kendo matimo gombo mag ringregi giwegi nyalo paro ni gin thuolo. (Som 2 Petro 2:18, 19.) Adiera en ni ok gin thuolo. Oseket chike mathoth mondo ogeng’ gombo kod timbe maricho ma jogo timo. Paulo nowacho ni “Chik ok oketi ni jo makare, to okete ni jo mochayo Chik, gi joyiem.” (1 Tim. 1:9, 10) Bende, gin wasumb richo nikech gitimo ‘gombo mag ringruok’ ma en kaka ruodhgi. (Efe. 2:1-3) E yo machalo kamano, joma kamago chalo ochunglo ma nyumore e bakul moting’o mor kich. Ka gombogi chikogi, mapiyo nono joma kamago nwang’o ni gimoko e obadho.—Jak. 1:14, 15.
KANYAKLA MAR JOKRISTO KETOWA THUOLO
15, 16. Chokruok kanyachiel gi owete gi nyimine e kanyakla konyowa nade, to ere kaka wabedo thuolo?
15 Kane ichako riwori gi kanyakla mar Jokristo, ne ok indiko barua mar kwayo mondo ibed achiel kuom jokanyo mar kanyakla. Kar mano, ne iriwori gi kanyakla nikech Jehova noywayi. (Joh. 6:44) Ang’o momiyo noywayi? Dipo ni noneni kaka ng’at makare moluoro Nyasaye? Inyalo wacho ni “Ooyo! ” To kare Nyasaye noneno ang’o kuomi? Noneno ka in gi chuny manyalo rwako chikne maketo ji bedo thuolo, kendo manyalo luwo kaka ochiko. E kanyakla, Jehova oseriti komiyi chiemb chuny, osegonyi kuom puonj mag dinde mag miriambo kod luoro manono, kendo osepuonji kaka inyalo nyago kido kaka mag Kristo. (Som Jo Efeso 4:22-24.) Nikech mano, isebedo achiel kuom jogo manie oganda achiel kende e piny mangima, minyalo luong e yo makare ni joma ni “thuolo.”—Jak. 2:12.
16 Par ane wachni: Sama in e kind jogo mohero Jehova gi chunygi duto, be iwinjo kiluor? Be isiko ing’iyo bathi koni gi koni nikech ichich? Seche migoyo mbaka gi joweteni e Od Romo, be iketo pachi e mbaka to komachielo iketo pachi e gigeni kiparo ni inyalo kwalgi? Ok en kamano! Iwinjo ka in thuolo ahinya. Be inyalo winjo kamano ka in e romo mar joma ok ong’eyo Jehova? Ooyo! E wi mano, thuolo ma iyudo sani e kind jotich Nyasaye nyiso thuolo malach ma wabiro bedogo e kinde mabiro.
“THUOLO GI DUONG’ MAR NYITHIND NYASAYE”
17. Thuolo ma dhano nigo otudore nade gi “elruok mar yawuot Nyasaye”?
17 Kowuoyo kuom thuolo ma Jehova biro miyo jotichne manie piny, Paulo nondiko kama: “Chuech duto rito, kogeno ahinya, elruok mar yawuot Nyasaye.” Kae to nomedo niya: “Chuech duto nogony oa e tuech mar top, mondo oyud thuolo gi duong’ mar nyithind Nyasaye.” (Rumi 8:19-21) “Chuech duto” ochung’ne dhano ma nigi geno mar dak e piny, kendo mabiro yudo ber mar “elruok,” tiende ni fwenyruok mar yawuot Nyasaye mowal gi roho. Fwenyruokno biro chakore ka ‘yawuowigi,’ ma osechier modhi e polo, riwore gi Kristo e tieko richo duto e piny kendo tero “oganda mang’ongo” e piny manyien.—Fwe. 7:9, 14.
18. Thuolo ma joma winjo Nyasaye nigo biro medore nade, to gikone gibiro bedo gi thuolo mane?
18 Bang’ mano, dhano duto moresi biro bedo gi thuolo chutho—thuolo maonge wuond mar Satan kod jochiendene. (Fwe. 20:1-3) To mano wach maber manade! Bang’e, ji 144,000 ma gin joloch kendo jodolo kaachiel gi Kristo, biro dhi nyime keto dhano thuolo ka gitiyo gi misango mar rawar, nyaka chop kama richo kod rem ma ne giyudo kuom Adam rum chuth. (Fwe. 5:9, 10) Bang’ nyiso ni gichung’ motegno kata mana e bwo tem, dhano biro nwang’o thuolo madier ma Jehova ne dwaro ni gibedgo—“thuolo gi duong’ mar nyithind Nyasaye.” Parie wachno! Ok ininyagri kendo timo gima kare e wang’ Nyasaye nikech ibiro bedo ng’at makare ma nigi kido kaka mar Nyasaye.
19. E kindegi, ang’o manyaka watim mondo wasik e yo materowa e thuolo madier?
19 Be igombo yudo “thuolo gi duong’ mar nyithind Nyasaye”? Ka en kamano, we mondo “chik makare, ma miyowa bedo thuolo” odhi nyime chiko pachi gi chunyi. Ee, dhi nyime puonjori Muma gi kinda. Dag kaluwore gi adiera mipuonjori. Lem kikwayo roho maler. Kaw mapek kanyakla mar Jokristo kaachiel gi chiemb chuny ma Jehova chiwonwa. Kik iwe Satan wuondi kaka nowuondo Hawa mondo ipar ni yore Nyasaye geng’i timo gik midwaro. Kuom adier, Jachien nyalo timore ng’at mariek. To mana kaka wabiro neno e sula maluwo, Satan ok onego “olowa; nimar wang’eyo riekone.”—2 Kor. 2:11.
[Penjo mag Puonjruok]
[Picha manie ite mar 9]
Be pod agombo “thuolo” moko mag piny?
[Picha manie ite mar 9]
Be adak kaluwore gi adiera mag Muma?
