Ang’o Momiyo Onego Ichiwri ne Jehova?

‘Gotienoni malaika mar Nyasaye, ma an ng’ate nende ochung’ buta.’—TICH 27:23.

1. Kapok joma dwaro ni obatisgi odhi mondo obatisgi, mano yudo ka gisekawo okenge mage, to penjo mage mawuokie?

“KOKALO kuom misango mar Yesu Kristo, be ise loko chunyi kuom richoni ma ichiwori ne Jehova mondo itim dwaro mare?” Ma e achiel kuom penjo ariyo ma joma ibatisi dwoko e giko mar twak migolo ne jogo madwaro ni obatisgi. Ang’o momiyo dwarore ni Jokristo ochiwre giwegi ne Jehova? Ere kaka chiwruok ne Jehova konyowa? Ang’o momiyo ng’ato ok nyal lamo Nyasaye e yo mowinjore kapok ochiworene? Mondo omi wayud dwokogi, dwarore ni wanon mokwongo gima chiwruok en.

2. Tiend chiwruok ng’ato owuon ne Jehova en ang’o?

² Chiwruok ng’ato owuon ne Nyasaye tiende en ang’o? Ne ane kaka jaote Paulo nolero winjruok ma ne ni e kinde gi Nyasaye. E nyim jo mogwaro ma ne gikwang’ godo e yie ma ne masira omako, noluongo Jehova ni “Nyasaye ma an ng’ate.” (Som Tich Joote 27:22-24.) Jokristo duto madier gin mag Jehova. Mopogore gi mano, piny duto ni ‘e teko mar ng’a marachno.’ (1 Joh. 5:19) Jokristo bet mag Jehova sama gichiworene gin giwegi e lamo. Chiwruok ma kamano en singo mar ng’ato owuon. Bang’e to batiso mar pi luwo mano.

3. Batiso mar Yesu nonyiso ang’o, to ere kaka jolupne nyalo luwo ranyisine?

³ Yesu noketonwa ranyisi kane oyiero owuon timo dwach Nyasaye. Nikech ne onyuole e oganda mar Israel ma ne osechiwore, en bende ne koro osechiwore ne Nyasaye. To kata kamano, sama ne ibatise, nochopo gimoro e okang’ moloyo kaka Chik ne dwaro. Wach Nyasaye nyiso ni nowacho niya: ‘Era e! Asebiro mondo atim dwaroni.’ (Hib. 10:7; Luka 3:21) Omiyo, batiso mar Yesu nonyiso ni koro nosebiro e nyim Nyasaye ni mondo otim dwach Wuon mare. Jolupne luwo ranyisine ka gichiwore giwegi mondo obatisgi. Kata kamano, kuom jolupnego, batiso mar pi, en gima nyiso e lela ni ng’ato osechiwore owuon ne Nyasaye e lamo.

Kaka Chiwruok ne Nyasaye Konyowa

4. Osiep ma ne ni e kind Daudi kod Jonathan puonjowa ang’o kuom wach chiwruok?

⁴ Chiwruok mar Jokristo en gima onego okaw gi pek. Ok en gima iwacho awacha. To ere kaka chiwruok konyowa? E yor ranyisi, we wanon ane kaka chiwruok ma dhano timo e kindgi konyo. Ranyisi achiel en mako osiep. Mondo omi ibed gi osiep, nyaka iyie kawo ting’ ma bedo e osiep kelo. Mano dwaro chiwruok—kiwinjo ka in-gi chuny mar rito osiepno. Osiep mong’ere ahinya ma ilero ei Muma en mar Daudi kod Jonathan. Ne gitimo singruok mar osiep e kindgi. (Som 1 Samuel 17:57; 18:1, 3.) Kata obedo ni osiep ma ji chiwore e okang’ ma kamano ok yot neno, osiep mang’eny dhi maber sama ng’ato ka ng’ato ochiwore gi chunye duto ne nyawadgi.—Nge. 17:17; 18:24.

5. Ere kaka misumba ne nyalo siko gi ruodhe ma nodak godo maber kohero?

⁵ Chik ma ne Nyasaye omiyo Jo-Israel konyowa ng’eyo kaka chiwruok ne konyo. Kane misumba dwaro siko gi ruodhe modak godo maber, ne onyalo timo singruok masiko e kinde gi ruodheno. Chik wacho kama: “To ka misumbano owacho ratiro, An ahero ruodha, gi chiega, kod nyithinda; ok nawuogi mar bedo  thuolo: eka ruodheno nokele e nyim Nyasaye, nokele e dhoot kata e sis dhoot; kendo ruodhe notuch ite gi riwi; to enotine nyaka chieng’.”—Wuok 21:5, 6.

6, 7. (a) Ere kaka winjruok mondik piny miyo ji neno ber? (b) To mano nyiso ang’o kuom winjruok ma wan-go gi Jehova?

⁶ Kend en riwruok madwaro chiwruok e okang’ mamalo. Ok en chiwruok ma ng’ato winjo ni en-go mana nikech noketo sei e satifiket, to en chiwruok ne ng’ato owuon. Ji ariyo modak adaka maok gikendore kaka chik dwaro, ok nyal winjo e chunygi ni gin ei kend mogurore e mise madier, to koda nyithindgi bende. Kata kamano, jogo mochiwore e riwruok mar kend kaka chik dwaro, nigi puonj mag Ndiko mamiyo gitemo loso chandruok kata pogruok moneno e kindgi, kendo gitimo mano e yor hera.—Math. 19:5, 6; 1 Kor. 13:7, 8; Hib. 13:4.

⁷ E diere ma ne indiko Muma, bedo gi winjruok mondik piny, obed e weche mag ohala kata tij andika, ne konyo. (Math. 20:1, 2, 8) Kindegi, mano bende en adier. Kuom ranyisi, wayudo kony ka wabet gi winjruok ma wandiko piny e kindwa, kapok wadonjo gi ng’ato e ohala moro kata kapok wachako tich gi kambi. Omiyo, ka chiwruok nyalo konyo jogo manie winjruok mar osiep, kend, kata mar tich, mano kaka chiwruok ne Jehova biro konyi moloyo e winjruokni kode! We koro wane ane kaka chiwruok ne Jehova Nyasaye osekonyo joma chon, kendo kaka mano ne ok en aena chiwruok miwacho awacha.

Kaka Chiwruok ne Nyasaye Nokonyo Jo-Israel

8. Kuom Jo-Israel, tiend chiwruokgi ne Nyasaye ne en ang’o?

⁸ Jo-Israel duto nobedo joma ochiwore ne Jehova kane gisingore ne Nyasaye. Jehova nochokogi but Got Sinai, kendo nowachonegi niya: “Ka nuwinj dwonda adieri, kendo mako muma mara, eka unubedna libamba moyier e kind libembini duto.” Ji nodwoko kanyakla niya: “Duto ma Jehova osewacho wanatim.” (Wuok 19:4-8) Chiwruok mar Jo-Israel ne ok en mana singruok ni ne gidhi timo gimoro. Tiende ne en ni, ne gin mag Jehova, kendo Jehova nokawogi kaka “libamba moyier.”

9. Ere kaka Jo-Israel noneno ber kuom bedo ni ne gin oganda mochiwore ne Nyasaye?

⁹ Jo-Israel noneno ber kuom bedo jogo ma gin mag Jehova. Nomakore kodgi chuth kendo ne oritogi mana kaka janyuol rito nyathine. Nyasaye nowacho ne Jo-Israel kama: ‘Wi dhako diwil gi nyathine madhoth koso, ni kik okech wuode monyuolo owuon? Ee, wi jogi diwil, to an wiya ok nowil kodi.’ (Isa. 49:15) Jehova nomiyogi Chik ma tayogi, jip moa kuom jonabi, kendo rit mar malaike. Jandik-zaburi nowacho kama: “Onyiso Yakobo wachne, onyiso Israel chik buche kod buchene mong’ado. Ok osetimo kamano ni oganda moro.” (Zab. 147:19, 20; som Zaburi 34:7, 19; 48:14.) Mana kaka Jehova norito oganda ma ne en mare e ndalo machon, e kaka obiro rito jogo ma chiworene e ndalogi.

Gimomiyo Onego Wachiwre Wawegi ne Nyasaye

10, 11. Be wan jogo monyuol e oganda mar jood Nyasaye? Ler ane.

¹⁰ Sama giparo wach chiwruok mar Jokristo kod batiso, jomoko nyalo penjore ni, ‘Be ochuno ni nyaka achiwra ne Nyasaye ni mondo eka alame?’ Gimomiyo mano dwarore nenore maler ka wanono kaka winjruokwa gi Nyasaye chalo gie sani. Ng’e ni, nikech richo mar Adam, waduto onyuolwa oko mar jood Nyasaye. (Rumi 3:23; 5:12) Chiwruok ne Nyasaye en gima dwarore ahinya mondo omi orwakwa ei oganda mar joode e polo gi piny. We wane ane gimomiyo.

¹¹ Onge ng’ato kuomwa ma nigi wuoro ma ne nyalo nyuole e ngima mochwere kaka Nyasaye ne dwaro. (1 Tim. 6:19) Ne ok onyuolwa kaka nyithind Nyasaye nikech kane jonyuolwa mokwongo otimo richo, oganda dhano nobedo joma opogi gi Wuoro ma jahera kendo Jachwech. (Pim gi Rapar mar Chik 32:5.) Nyaka a kanyo kadhi nyime, dhano osebedo kodak  oko mar jood Jehova e piny koda e polo, ka gipogore gi Nyasaye.

12. (a) Ere kaka dhano ma joricho nyalo bet jokanyo mag jood Nyasaye? (b) Gin okenge mage ma nyaka wakaw kapok obatiswa?

¹² Kata kamano, ng’ato ka ng’ato kuomwa nyalo kwayo mondo Nyasaye orwake ei oganda mar jood jotichne moseyiego. * Wan kaka joricho, ere kaka wanyalo timo mano? Jaote Paulo nondiko kama: “Ka ne pod wan wasik Nyasaye, noketwa wawinjore gi Nyasaye kuom tho mar Wuode.” (Rumi 5:10) Sa batiso, wachiwo kwayo ne Nyasaye ni omiwa chuny maler mondo wabed jogo moyiego. (1 Pet. 3:21) Kata kamano, kapok obatiswa, nitie okenge ma nyaka wakaw. Nyaka wang’e Nyasaye, wapuonjre gene, walok chunywa, kendo walok timbewa. (Joh. 17:3; Tich 3:19; Hib. 11:6) To pod nitie gimoro modong’ ma nyaka watim kapok orwakwa ei oganda mar jood Nyasaye. Gino en ang’o?

13. Mondo omi ng’ato obed achiel kuom jood Nyasaye, ang’o momiyo dwarore ni otim singruok makende mar chiwruok ne Nyasaye?

¹³ Ng’at mapok orwak mobedo jakanyo mar jood Nyasaye onego osingre mondi ne Jehova e yo makende mondo omi obed achiel kuom jotichne. Mondo wang’e gimomiyo, par ane wuoro mohero rawera moro ma kich kendo ogombo ni orwak rawerano obed achiel kuom joode owuon. Wuorono ong’ere kaka ng’at maber. Kata kamano, kapok orwako wuowino kaka wuode, wuorono dwaro ni wuowino otim singruok moro. Omiyo ng’atno wacho niya, “Kapok akawi kaka wuoda, adwaro ng’eyo ka ibiro hera kendo luora kaka wuonu.” Mana ka wuowino dwaro chiwore e yor singruok makende eka ng’atno biro rwake obed achiel kuom joode. Donge mano en gima owinjore? Kamano bende, Jehova rwako mana jogo moyie singorene giwegi e yor chiwruok. Muma wacho kama: “Uchiw ringreu obed misango mangima, maler, malong’o ni Nyasaye.”—Rumi 12:1.

Chiwruok En Gima Nyiso Hera kod Yie

14. Chiwruok en yo manyiso hera e yo mane?

¹⁴ Timo singo mar chiwruok ne Nyasaye en yo mwanyisogo hera mawuok e chunywa ne Jehova. E yore moko, ochalo mana gi timo singo mar kend. Dichwo ma Jakristo madonjo e kend nyiso hera ma en-go kuom singruok ni obiro makore gi jaode kata ang’o timre. Singo ma kamano en singruok ne ng’ato, to ok mana singruok mar timo gimoro. Dichwo ma Jakristo ong’eyo malong’o ni ok onyal dak gi ng’at modwaro kendorego ka ok onyal timo singruok mar kend. E yo ma kamano, ok wanyal neno ber chuth mar bedo e oganda mar jood Jehova ka ok watimo singo mar chiwruok. Omiyo wachiwore wawegi ne Nyasaye nikech, kata bed ni wan joricho, wan gi gombo mar bedo joge, kendo wang’ado mar makruok kode chuth, kata ang’o timre.—Math. 22:37.

15. Ere kaka chiwruok nyiso yie?

¹⁵ Sama wachiwore wawegi ne Nyasaye, wanyiso ni wan gi yie. Ang’o momiyo en kamano? Yiewa kuom Jehova miyo wabet gadier ni sudo machiegni kode bernwa. (Zab. 73:28) Wang’eyo ni ok bi bet mayot kinde duto wuotho gi Nyasaye ka wadak “e kind tieng’ mobam kendo mokethore,” to kata kamano wageno kuom singo Nyasaye ni obiro konyowa. (Fili. 2:15; 4:13) Wang’eyo ni warem, to wan gadier ni Jehova biro bet mang’won kodwa kata e kinde ma waketho.  (Som Zaburi 103:13, 14; Jo Rumi 7:21-25.) Wan gi yie ni Jehova biro miyowa pok ka wachung’ motegno e yiewa.—Ayub 27:5.

Chiwruok ne Nyasaye Kelo Mor

16, 17. Ang’o momiyo chiwruok ne Jehova kelo mor?

¹⁶ Chiwruok ne Jehova kelo mor nikech timo mano oriwo koda chiwruok wan wawegi. Yesu nowacho adiera mong’ere ahinya kuom wach chiwruok niya: “Miyo kelo gweth moloyo kawo.” (Tich 20:35) Yesu noyudo mor ahinya kuom chiwore e tiyo ne Nyasaye kane en e piny. Nitie kinde ma ne ok okawo thuolo mar yueyo, chiemo, kata weche mamoko madwarore mondo omi okony ji yudo yo madhi e ngima. (Joh. 4:34) Yesu nohero miyo chuny Wuon mare mor. Nowacho niya: “An atimo malong’one ndalo duto.”—Joh. 8:29; Nge. 27:11.

¹⁷ Omiyo, Yesu nochiko jolupne e yor ngima maber chuth ka nowacho niya: “Ng’a ma dwaro luwa, mondo okwerre owuon.” (Math. 16:24) Timo kamano miyo wasudo machiegni gi Jehova. Be nitie ng’at machielo manyalo ritowa gi hera e yo maloye?

18. Ang’o momiyo dak kaluwore gi chiwruokwa ne Jehova kelo mor moloyo chiwruok ne gimoro amora kata ne ng’at machielo?

¹⁸ Chiwruokwa ne Jehova kendo dak kaluwore gi chiwruokno ka watimo dwache, biro kelonwa mor moloyo chiwruok ne gimoro amora kata ne ng’at machielo. Kuom ranyisi, thoth ji chiwo ngimagi ne manyo mwandu, to ok giyud mor kata ber madier. Kata kamano, jogo machiwore ne Jehova yudo mor mochwere. (Math. 6:24) Gweth mar bedo “jotich kaachiel kod Nyasaye” miyogi mor, nimar chiwruokgi ok en ne tich moro, to gichiwore ne Nyasachwa moherowa. (1 Kor. 3:9) Onge ng’at manyalo bedo mamor gi chuny ma gin-go mar chiwruok, maloyo Nyasaye. Obiro koda dwoko jogo moseti e hikgi mag rowere mondo oritgi nyaka chieng’.—Ayub 33:25; som Jo Hibrania 6:10.

19. En ber mane makende ma joma ochiwore ne Jehova bedogo?

¹⁹ Chiwo ngimani ne Jehova miyo ibedo gi winjruok machiegni kode. Muma wacho niya: “Suduru ir Nyasaye, to nosud iru.” (Jak. 4:8; Zab. 25:14) E sula maluwo, wabiro nono gimomiyo wanyalo bedo gadier kuom timo yiero mar bedo mag Jehova.

[Weche moler piny]

Inyalo Dwoko Nade?

• Chiwruok ng’ato owuon ne Nyasaye tiende en ang’o?

• Ere kaka chiwruok ne Nyasaye konyowa?

• Ang’o momiyo dwarore ni Jokristo ochiwre ne Jehova?

[Penjo mag Puonjruok]