Yudo mich maber ma inyalo miyo ng’ato ok en gima yot. Mano en nikech kaka ng’at ma omi michno okawe ema biro nyiso kabe michno ber adier. E wi mano, mich ma moro ng’ato, samoro ok bi moro ng’at machielo.

Kuom ranyisi, rawera nyalo bedo mamor ahinya ka omiye masin moro ma nya sani. Ng’at maduong’ to nyalo mor ahinya ka omiye gimoro ma joodgi osebedogo kuom higni mang’eny kendo ma gigeno ahinya. E ogendini moko, mich ma moro joma tindo kod joma dongo duto en pesa, nikech mano miyogi thuolo mar timo gima gidwaro gi pesano.

Kata obedo ni yudo mich maberie moloyo ok yot, ji mang’eny pod temo mondo giyud mich maber ma ginyalo miyo joma gigeno. Nitie gik ma ka wang’eyo to nyalo konyowa yudo mich maberno. Wanon ane gik moko ang’wen ma biro konyowa ng’eyo mich maber ma nyalo moro ng’at ma wadwa miyo mich.

Gik ma ng’atno gombo yudo. Ng’at moro modak e taon mar Belfast e piny Northern Ireland nowacho ni ndiga ma ng’ato nomiye ka ne en jahigni 10 kata 11 kama e mich maberie mogik ma osegayudo. Nikech ang’o? Owacho kama: “Nagombo bedo gi ndiga.” Wechego nyiso ni gima ng’ato gombo yudo e ma biro nyiso kabe mich ma omiye biro more kata ooyo. Omiyo, par ane ni ng’at ma idwa miyo michno gombo yudo ang’o nikech gik ma ng’ato gombo bedogo e ma biro miyo oher mich ma omiye. Kuom ranyisi, kwere gi deye ohero bedo kanyachiel gi wedegi. Ginyalo gombo ni gibed gi nyithindgi kod nyikwagi kinde mang’eny kaka nyalore. Ka nyithindgi kod nyikwagi okawo thuolo kinde ka kinde mondo gibed kodgi, mano nyalo morogi moloyo miyogi mich moro machielo.

Gima nyalo konyowa ng’eyo gik ma jomamoko gombo en bedo joma chiko itgi maber sama giwuoyo kodwa. Muma jiwowa kama: “Ng’ato ka ng’ato nyaka bed ng’at ma winjo wach piyo, ma terore mos kuom wuoyo.” (Jakobo 1:19) E  seche ma igoyo mbaka gi osiepeni kata wedeni tem fwenyo gik ma gihero kod ma ok gihero. Mano nyalo konyi mondo iyier mich ma biro morogi.

Gik ma ng’atno dwaro gadier. Mich ma nyalo moro ng’ato ok ochuno ni obed gima lich ruok tek mana ni michno konyone kamoro. Kata kamano, ere kaka inyalo ng’eyo gima ng’ato dwaro gadier?

Yo mayot mar ng’eyo mano en penjo ng’at ma idwaro miyo michno. En mana ni penjo ng’ato mich ma doher ni omiye, nyalo miyo kik iyud mor ma inyalo bedogo ka ipoye gi michno. E wi mano, nitie joma nyalo wacho awacha gik ma gihero kod ma ok gihero, kata kamano, kodok korka gik ma gidwaro gadier, nyalo bedonegi matek wacho.

Kuom mano, bed ng’at ma nyalo fwenyo gik ma timore e ngima ng’ato. Dibed ni en rawera, ng’at ma oseti, osekendo kata podi, osekende kata podi, dakgi nokethore, en ng’at mondik e tich koso oseritaya? Par mich ma nyalo konyo ng’ato kaluwore gi gima timore e ngimane.

Mondo ing’e gik ma ng’ama idwaro miyo mich dwaro gadier, inyalo wuoyo gi joma osekalo e chal ma entiereno. Ginyalo nyisi gik mathoth ma timore ne ng’atno ma jomamoko ok nyal ng’eyo. Ng’eyo weche kaka mago nyalo konyi mondo ichiw mich ma biro moro ng’atno gadier.

Sa ma ichiwe mich. Muma wacho niya: “Wach mohul e ndalo mowinjore, ber ahinya.” (Ngeche 15:23) Ndikoni nyiso ni sa ma wawachoe wach moro kod sa ma watimoe gimoro en gima duong’ ahinya. Mana kaka weche mowach e sa mowinjore nyalo moro ng’ato, e kaka mich bende ma ochiw e sa mowinjore kata kama owinjore nyalo moro ng’at ma omi michno.

Wanyalo chiwo mich e kinde makende kaka sama osiepwa moro kendo kata ikende, sama rawera moro chiegni tieko skul, kata ka ng’ato gi chiege oyudo nyathi. Jomoko ndikoga list mag gik makende ma biro timore e higa mangima. Timo kamano konyogi mondo gichan chon mich maber ma digiher chiwo. *

Ok ochuno ni warit mana kinde makende e ka wachiw mich. Mich en gima wanyalo chiwo sa asaya to pod wabedo mamor. Kata kamano, nitie gik moko ma nyaka watang’go. Kuom ranyisi, ka wuoyi omiyo nyako moro mich maonge gimomiyo, mano nyalo miyo nyakono opar ni samoro wuoyino dware. Ka dipo ni wuoyino ok diher bedo osiep nyakono, chiwo mich ma kamano nyalo kelo chochni. Mano e momiyo ber nono wach machielo ma en gimomiyo ng’ato chiwo mich.

Gimomiyo ng’ato chiwo mich. Mana kaka ranyisi ma wanenono nyiso, ber paro chon kapo ni ng’at ma wadwa miyo mich moro nyalo bedo gi paro ma ok owinjore bang’ yudo michno. Ng’at ma chiwo mich onego onon ane gimomiyo odwa chiwo mich moro. Kata obedo ni ji mang’eny diher chiwo mich gi chuny maler, nitie ji mathoth ma chiwo mich e odiechienge moko e higa mana nikech ochun-gi. To nitie jomoko ma chiwo mich ka gigeno ni nitie gima ber ma ibiro timnegi kata ni gin bende inyalo migi mich.

Inyalo timo ang’o mondo ibed gadier ni ichiwo mich gi chuny maler? Muma wacho niya: “Gik moko duto mutimo, timgiuru gi hera.” (1 Jo-Korintho 16:14) Ka ichiwo mich nikech ihero ng’at ma imiyo michno kendo idewe, ng’atno biro kawo michno komor to in bende ibiro bedo mamor nikech ichiwo michno gi chuny maler. Sama  imiyo ng’ato mich kihero, mano moro Wuonwa manie polo. Jaote Paulo nopwoyo Jokristo ma ne ni Korintho nikech ne gichiwore konyo Jokristo wetegi ma ne ni Judea. Paulo nonyisogi ni “Nyasaye ohero ng’at ma chiwo gi ilo.”​—2 Jo-Korintho 9:7.

Paro weche ma wasenono e sulani biro konyi mondo ibed mamor sama ichiwo mich. Weche kaka mago kaachiel gi mamoko mathoth e ma nomiyo Nyasaye oloso chenro mondo omi dhano mich maberie moloyo. Wakwayi ni isom sula ma luwo mondo ing’e ni mich maberno en mane.