Lit Ahinya ni Wanyalo Tho Sa Asaya
PAR ane ni ineno vidio mar ng’at moro mihero mong’ere ahinya. Wawach ni en jathum. Vidiono chakore kotin, kae to omedo puonjore goyo thum kaka omedo dongo, kendo odhi nyime tiegore e goyo thum. Mosmos, ineno kochako goyo thum e nyim ji mang’eny, ochako dhi goyo thum kuonde maboyo boyo, kendo obedo jathum mong’ere e piny mangima. Ka pod vidiono dhi nyime, ineno ka jathumno koro oseti, kae to vidiono rumo ka jathumno tho.
Ranyisi ma watiyogoni en gima timorega gadier. Bed ni ng’ato en jathum, jasayans, jang’wech, ja opira, kata en rahuma, gikone nyaka otho athoya. Ka ng’ato pod ngima, onyalo timo gik mathoth mabeyo kendo madongo. Kata kamano, iparo ni ng’atno ne nyalo timo gik mathoth ma romo nade ka di ne bed ni dhano ok bed moti kendo ok tho?
Kata obedo ni lit ahinya ni wabiro ti kendo wabiro tho, mano e gima oritowa waduto. (Eklesiastes 9:5) Kata watem matek ma chalo nade mondo kik wati kendo kik watho, ok wanyal pondo ne gigo. Mopogore gi mano, ngimawa nyalo ng’adore ka aksident moro oyudowa kata ka tuo moro onegowa apoya. Mana kaka Muma wacho, wachalo gi ong’ueng’o mokinyi ma “betie kuom kinde machuok kae to lal nono.”—Jakobo 4:14.
Nikech wanyalo tho sa asaya, ji mang’eny wachoga ni, “Wachiemuru kendo wameth nimar kiny wanatho.” (1 Jo-Korintho 15:32) Gidak kamano nikech ging’eyo ni ginyalo tho sa asaya kendo gionge gi geno moro amora ni ginyalo bedo mangima kendo. Nitie kinde ma ngima nyalo bedo matek ahinya ne ng’ato mopenjre ni, ‘Be nochuewa mondo wadag mana machuok?’ Ere kama wanyalo yudoe dwoko mar penjono?
Ji mang’eny nono weche mag sayans mondo giyud dwoko. Dongruok ma josayans kod lakteche osetimo osechoro ngima dhano e okang’ moro. To nitie josayans moko ma pod temo ahinya mondo giyud kaka dhano nyalo medo dak kuom kinde malach. Kata bed ni gitimo kinda ma chalo nade, penjo ma pod wapenjore gin magi: Ang’o momiyo wabedo moti kendo watho? Be nitie geno moro amora ni ibiro tieknwa jasikwa ma en tho? Sula mamoko ma luwo dwaro wuoyo e wi wechego kendo chiwo dwoko mar penjoni: Be nochuewa mondo wadag mana machuok?
Samoro Inyalo Hero Magi Bende
OHINGA MAR JARITO
Gik ma Dhano Osetemo Timo Mondo Gidag Aming’a
Josayans mathoth timo nonro mondo ging’e gimomiyo dhano bedo moti. Nonro ma gitimo osechopo kodgi kanye?
