Chunywa nyalo nyosore ahinya ka osiepewa moro nigi tuo mar paro. Kata kamano, wanyalo nyiso osiepwano ni wadewe kuom konye nyagore gi tuoneno. Ere kaka wanyalo timo mano?

“Bed ng’at ma winjo wach piyo.” ​—JAKOBO 1:19.

Achiel kuom yore minyalo konyogo osiepni en chikone iti sama owuoyo. Kik ine ni nyaka ichiw dwoko ne gimoro amora mowacho. Yie gi gik mowacho kendo item bedo mang’won kode. Tem ketori e chal mare kendo kik ing’adne bura kata jare. Par ni samoro onyalo wacho gik ma ok adier kendo bang’e onyalo ywago ang’e.​—Ayub 6:2, 3.

‘Wuo e yo ma hoyo chuny.’​—1 JO-THESALONIKA 5:14.

Nyalo bedo ni osiepni parore ahinya kata samoro oneno ni en ng’at manono. Kata kamano, inyalo nyiso ni idewe ahinya kuom hoye kendo jiwe, kata ka ok ing’eyo weche sie minyalo nyise.

“Osiep madier nyiso hera ndalo duto.”​—NGECHE 17:17.

Tim gik ma nyalo konyo ng’atno. Kar sieko gi gimoro miparo ni nyalo konye, penje kaka doher ni okonye. Ka po ni tek ne osiepnino wacho kaka doher ni ikonye, tem penje gik  ma unyalo timo kanyachiel kode, kaka dhi bayo. Kata, inyalo dhine e chiro, timone ler, kata konye e tije mamoko.​—Jo-Galatia 6:2.

‘Hori.’​—1 JO-THESALONIKA 5:14.

Nitie kinde ma osiepni ok bi dwaro wuoyo. Nyise ni ibiro chikone iti sa asaya ma oikore wuoyo. Tuo mar osiepni nyalo miyo owach kata otim gimoro ma nyalo chwanyi. Kuom ranyisi, onyalo ketho chenro ma ne useloso kode kata iye nyalo wang’ piyo. Hori kendo iketri e chal mare sama ikonye e yo moro amora.​—Ngeche 18:24.

“Atemoga matek mondo osiepna onena kaka ng’at monyalo geno. Kata obedo ni ok anyal tiekone chandruoge duto ma tuone osekelone, atemoga matek mondo achik ita sama owuoyo. Nitie kinde ma gima duong’ modwaroga en mana ng’at ma nyalo chikone ite.”​—Farrah, a ma osiepne moro nigi tuo mar “eating and anxiety disorders” kod “clinical depression.”

“Achiel kuom osiepena ng’won-ga koda kendo ojiwaga ahinya. Nogwela e ode mondo wadhi wachiem kanyachiel. Ka ne an kuno, ne anyalo nyise gik moko duto ma ne chando chunya. Wachno nojiwa ahinya!”​—Ha-eun, ma nigi tuo mar “clinical depression.”

“Horuok dwarore ahinya. Sama jaoda otimo gimoro ma chwanya, aketoga e pacha ni otimo gino nikech tuone, to ok nikech hero mare. Mano konyaga mondo kik iya wang’ piyo kendo abed mang’won kode.”​—Jacob, ma jaode nigi tuo mar “depression.”

“Jaoda osesira kendo hoya ahinya. Sama awinjo ka parruok obemba, ok ochunaga ni atim gik ma ok adwar timo. Nitie sama mano chunega weyo timo gik mohero. Ahere ahinya nikech chuny mar chiwruok ma en-go.”​—Enrico, ma nigi tuo mar “anxiety disorder.”