Delphine ma ne osewuo kuome e sula mokalo, ne neno ni parruok mag ngima ma ne en-go ne miyo omadho kong’o asasa. Muma wacho ni madho kong’o matin ok rach. Kata kamano, osiemowa niya: “Kik iriwri gi jogo mamadho kong’o mang’eny.” (Ngeche 23:20, Luo New Testament, 2003) Madho kong’o mokalo tong’ osemiyo ji mang’eny oyudo tuoche moko, oseketho kend mag ji mang’eny, kendo ji milionde tho higa ka higa. Thoth chandruogego inyalo geng’ ka ji oluwo puonj manie Muma.

Delphine noluwo puonj mag Muma. Owacho niya: “Nafwenyo ni madho kong’o ne ok tiekna parruok. Ne aluwo puonj ma yudore e Jo-Filipi 4:6, 7, ma wacho niya: ‘Kik ubed gi parruok e wi gimoro amora, to . . . nyisuru Nyasaye kwayou.’ Otieno kotieno ka ne achako bedo gi paro ma ok ni kare, ne alemo mondo Jehova okonya. Ne anyiso Jehova gik moko duto ma ne chanda moriwo parruok kod lit ma ne awinjo e chunya kendo ne asaye mondo okonya abed gi paro mowinjore. Okinyi ka okinyi ne atemo mondo kik abed gi paro ma ok ni kare. Lemo ne okonya mondo aket pacha kuom gik ma ne an-go to ok kuom gik ma ne aongego. Ne ang’ado mar weyo kong’o chuth. Nikech ne aseyudo kuwe makende, ne atemo ahinya mondo kik atim gimoro amora ma nyalo miyo kuweno olal.”

Onge chandruok ma kelo lit mang’eny kod kuyo ma loyo tim terruok. Kata kamano, puonj mag Muma nyalo konyowa mondo walo timbe mag terruok kuom tang’ gi gik ma nyalo miyo ng’ato odonj e tim terruok kaka milruok e yor kisera gi ng’at ma ok jaodi kod neno ponografi. Rawera miluongo ni Samuel wacho niya: “Ne yotna ahinya mondo achak milora gi ng’at ma ok jaoda. Samoro ne anyalo fwenyo ni nyako moro ohera to an ok ahere, mano ne miyo milruok kode e yor kisera bedona ma yot.” Samuel nofwenyo ni ji mang’eny ne osechako wacho ni ohero milruok e yor kisera kata sama ne ok odwar timo kamano, to mano nomiyo ochako timo timno goyiem. Timno ne chando chunye ahinya. Owacho niya, “Timno ne ok ber nikech ne omiyo ok adew jomamoko.”

Samuel nosomo sula moro molos ne rowere ma yudore e websait mar jw.org. Kae to noparo weche ma yudore e Ngeche 20:11 ma wacho niya: “Nyathi ong’ere kuom timne; kata timne ler, kata timne owinjore.” Ere kaka mano nokonye? Samuel nofwenyo ni timne mar milruok e yor kisera ne ok ler kendo ne ok owinjore. Owacho niya: “Nafwenyo ni rawera ma nigi tim mar milruok e yor kisera nyalo bedo gi kido maricho ma biro miyo kik obed dichwo kata dhako maber. Ne achako paro ni kapo ni akendo, chiega biro winjo nade ka ofwenyo ni amilora gi mon moko. Mano nomiyo afwenyo ni timno en tim marach. Bedo ni milruok gi ng’ato e yor kisera en gima yot timo, mano koro ok nyis ni timno ber.” Samuel noweyo timno. Weyo milruok gi jomamoko ne okonye mondo kik odonj e terruok.

Antonio to ne timo gima rachie moloyo ma ne nyalo miyo odonj e tim terruok sa asaya. Tim ng’iyo ponografi ne osodonjo e rembe. Kata obedo ni ne okendo dhako ma ne ohero ahinya, weyo ponografi ne obedo ne matek. Owacho ni paro matut weche ma yudore e 1 Petro 5:8 ne okonye ahinya. Ndikono wacho kama: “Sikuru ka urito pachu, kendo beduru ka uneno! Jasiku ma en Jachien wuotho koni gi koni kaka sibuor ma ruto komanyo ng’at ma dongam.” Antonio wacho kama: “Piche mag ponografi olworowa kamoro amora e pinyni kendo pichego nyalo siko e pach ng’ato. Ndikono nomiyo aparo matut e wi ng’at ma kelonwa tembego. Ne nyaka apar mapiyo ni piche mochidogo ne owuok kuom Jachien. Sani koro ang’eyo ni Jehova kende e ma nyalo konya ‘rito pacha kendo siko ka aneno,’ mondo aked gi tembe ma nyalo ketho pacha, chunya, kod kend mara.” Antonio ne oyudo kony ma dwarore kendo sani oseweyo chuth tim mar neno ponografi. Mano osemiyo ogeng’o kata mana chandruoge matek ahinya.

Onge kiawa ni Muma chiwo puonj ma beyo ma nyalo konyowa geng’o chandruoge matek ahinya. To nade chandruoge ma osedonjo mogurore motegno kuom ng’ato? We wang’i ane kaka Wach Nyasaye nyalo konyowa loyo chandruoge matek kaka mago.