HIGNI moko mokalo, ka di ne ilimo chula moro matin miluongo ni Sangir Besar ma ni Indonesia, di ne iyudo nyiminewa moko adek e dho wath mar chulano. Nyiminewago ong’ere ahinya e dho wadhno nikech gipuonjoga ji Muma. Kata kamano, higni matin mokalo, ne gitimo tich moro mopogore e dho wadhno.

Mokwongo, ne gidhiga e nam kae to gikwanyo kite kendo giduogo kodgi e dho wath. Kite moko ne dongo ma ne nyalo romo gi opich adhula. Bang’ mano, ne gibetga e orindi (kata then) kae to gitoyo kitego gi nyundo ma bed kokoto. Bang’e, ne giketogi e ndope kendo idho kodgi malo kuma ne gidakie. Kae to ne giketogi e ogunde mondo loche ma loso ndara obi oting’gi.

Achiel kuom nyiminego nyinge Hulda. Chal mare noyiene tiyo tijno kuom seche mang’eny moloyo jowetene. Nojatiyoga gi pesa ma noyudo e rito joode. Kata kamano, koro to nochako timo tijno ka en gi gombo moro makende. Nodwaro ni ong’iew tablet ma ne nyalo konye tiyo gi JW Library^®. Hulda nong’eyo ni vidio kod gik mamoko miketoga e JW Library ne nyalo miyo omed lony e tij lendo kendo winjo tiend weche manie Muma.

Hulda ne tiyoga seche ariyo gi nus pile ka pile kuom dwe achiel, kendo pile notoyo kite ma ne nyalo pong’o pickup. Gikone, noyudo pesa ma norome ng’iewo tablet.

Hulda wacho kama: “Kata obedo ni ne aolga kendo lwetena ne kuot ma ridhre nikech toyo kite, wiya nowil gi remgo duto ka nachako tiyo gi tabletna nikech nokonya medo lony e tij lendo kendo iko chokruoge e yo mayot.” Owacho bende ni tabletneno nokonye e kinde ma tuo mar korona ne chakore nikech chokruoge duto mag kanyakla nitimo e yor vidio. Wan bende wamor ni Hulda nochopo gombone.