SULA MAR PUONJRUOK 21
WER 107 Nyasaye Ketonwa Ranyisi mar Hera
Kaka Inyalo Yudo Ng’at Mikendorigo
“Ng’ano ma nyalo yudo dhako malong’o? Nengone duong’ ahinya moloyo kite mag korol.”—NGE. 31:10.
GIMA SULANI WUOYE
Wadwaro nono puonj mag Muma ma nyalo konyo ng’ato yiero ng’ama owinjore monyalo kendorego, kod kaka jomamoko e kanyakla nyalo konyogi.
1-2. (a) Gin gik mage ma Jakristo ma dwaro donjo e kend onego otim ka pok ochako kisera? (b) Tiend kisera en ang’o? (Ne “Weche Moler.”)
BE IGOMBO kendo kata ni okendi? Kata obedo ni ok ochuno ni ng’ato odonj e kend e ka obed mamor, Jokristo mang’eny ma ok nie kend diher ni chieng’ moro giyudie ng’at ma ginyalo kendorego. Ka pok ichako kisera gi ng’ato, dwarore ni ibed gi winjruok motegno gi Jehova, ing’e gimomiyo idwaro donjo e kend, kendo ing’e kaka ibiro rito joodi e yor ringruok. a (1 Kor. 7:36) Ka ikwongo itimo gik mowachgo, to kend maru nyalo bedo gi mor.
2 Kata kamano, yudo ng’at mowinjore minyalo kendorigo ok yotga. (Nge. 31:10) To kata kiyudo ng’ama ineno ni owinjore kodi, chako kode kisera pod nyalo bedo matek. b E sulani, wabiro nono gik ma nyalo konyo Jakristo ma ok nie kend mondo oyud ng’at mowinjore monyalo kendorego, kod kaka ginyalo chako weche mag kisera. Bende, wabiro neno kaka jomamoko e kanyakla nyalo konyo joma diher yudo ng’at ma ginyalo kendorego.
KAKA INYALO YUDO NG’AT MOWINJORE MINYALO KENDORIGO
3. Gin weche mage ma Jakristo ma dwaro donjo e kend onego onon sama omanyo ng’ama onyalo kendorego?
3 Ka diher donjo e kend, ber mondo ing’e kido midwaro ni jaodi obedgo ka pok ichako kisera. Nono to inyalo weyo ng’at mowinjore kodi, kata inyalo chako kisera gi ng’at ma ok owinjore kodi. En adier ni ng’at midwaro kendorigo onego obed Jakristo mosebatisi. (1 Kor. 7:39) Kata kamano, mano ok nyis ni Jakristo moro amora owinjore bedo jaodi. Omiyo, inyalo penjori kama: ‘Gin chenro mage ma daher chopo e ngimana? Gin kido mage ma daher ni jaoda obedgo? Be gik ma amanyo kuom ng’at ma adwaro donjogo e kend gin gik ma nyalore?’
4. Gin weche mage ma Jokristo moko osegakwayo Jehova e lamo?
4 Onge kiawa ni isebedo kikwayo Jehova e lamo mondo okonyi yudo ng’ama owinjore minyalo kendorigo. (Fil. 4:6) En adier ni Jehova ok sing ne ng’ato ka ng’ato ni obiro miye ng’ama onyalo kendorego. Kata kamano, odewo ahinya gik midwaro kod kaka iwinjo e chunyi, kendo onyalo konyi mondo iyud ng’at mowinjore. Omiyo, dhi nyime nyise gomboni kod kaka iwinjo e chunyi. (Zab. 62:8) Kwaye mondo okonyi bedo gi horuok kod rieko. (Jak. 1:5) Owadwa John c modak Amerka kendo ma pok odonjo e kend, wacho gik monyisoga Jehova e lamo. Owacho kama: “Anyisoga Jehova kido ma daher ni ng’ama abiro kendo obedgo. Akwayoga Jehova mondo olosna thuolo mag romo gi ng’at mowinjore. Bende, akwayoga Jehova mondo okonya nyago kido ma biro miyo abed dichwo maber ka asekendo.” Nyaminwa Tanya modak Sri Lanka wacho kama: “Sama amanyo ng’ama nyalo kenda, akwayoga Jehova mondo okonya siko ka ategno e yie, ka an gi paro makare, kendo ka amor.” Kata ka ok iyudo mapiyo ng’ama inyalo kendorigo, Jehova singo ni obiro dhi nyime konyi kendo dewi gadier.—Zab. 55:22.
5. Gin thuolo mage ma Jakristo ma gombo donjo e kend nyalo tiyogo mondo ong’ere gi Jakristo wadgi ma bende gombo yudo ng’ama onyalo kendorego? (1 Jo-Korintho 15:58) (Ne picha bende.)
5 Muma jiwowa ni kinde duto wabed “modich e tij Ruoth.” (Som 1 Jo-Korintho 15:58.) Sama idich e tij Jehova kendo iloso thuolo mag bedo gi owete gi nyimine mopogore opogore, ibiro bedo mamor. To e wi mano, ibiro yudo thuolo mar ng’eri gi owete gi nyimine mamoko ma pok odonjo e kend, kendo moketo pachgi e tij Jehova mana kaka in. Bende, sama itimo duto minyalo mondo imor Jehova, ibiro yudo mor madier.
Ka ibedo modich e tij Jehova kendo iloso thuolo mag bedo kanyachiel gi Jokristo weteni mopogore opogore, inyalo romo gi ng’ama diher donjo e kend (Ne paragraf mar 5)
6. Ang’o ma Jakristo ma ok nie kend onego opar sama omanyo ng’ama onyalo kendorego?
6 Nitie wach moro ma dwaro tang’: Kik iyie mondo tij manyo ng’ama dikendrigo okaw thuoloni duto. (Fil. 1:10) Mor madier ok otenore kuom bedo e kend kata ooyo, to otenore kuom winjruok maber ma in-go gi Jehova. (Mat. 5:3) Bende, sama pok idonjo e kend, inyalo bedo gi thuolo mang’eny mag tiyo ne Nyasaye e yore momedore. (1 Kor. 7:32, 33) Omiyo, ti maber gi thuolo ma in-go ka pok idonjo e kend. Nyaminwa Jessica ma wuok Amerka ma nokend ka hike hawo 40 wacho kama: “Nadichga e tij lendo, to mano nokonya mondo kik ane ni aremo gimoro kata obedo ni nagombo ni okenda.”
KAW THUOLO MONDO INON NG’AMA IDWARO KENDORIGO
7. Ang’o momiyo en gima nyiso rieko kikawo thuolo moromo mondo inon ng’ato ka pok inyise ni diher ni ukendru? (Ngeche 13:16)
7 Nade ka nitie ng’at moro mineno ni owinjore bedo jaodi? Be onego inyise mapiyo gomboni kod kaka iwinjo e chunyi? Muma wacho ni ng’ama riek paro ka pok okawo okang’ moro amora. (Som Ngeche 13:16.) Omiyo, inyalo tiyo gi rieko ka ikawo thuolo moromo mondo inon ng’ato ka pok inyise gomboni, ma ok ofwenyo ni inone. Owadwa Aschwin modak Netherlands wacho kama: “Gombo nyaloga dongo mapiyo, to bende onyalo lal mapiyo. Kikawo thuolo moromo mondo inon ng’ato, gombo mag ringruok ok bi chiki mondo ichak kode kisera.” Sama inono ng’ato, samoro inyalo fwenyo ni ok owinjore kodi.
8. Ere kaka Jakristo ma dwaro donjo e kend nyalo nono ng’ama doher kendorego? (Ne picha bende.)
8 Ere kaka inyalo nono ng’ato e yo malong’o, ma ok ofwenyo ni inone? E chokruoge mag kanyakla kata e budho moko, inyalo fwenyo gik moko kuom ng’at ma diher kendorigo, kuom ranyisi, winjruokne gi Jehova, kite, kod timbene. Inyalo ng’eyo ni osiepene gin jomage, to ohero mbekni ma chalo nade. (Luka 6:45) Bende, inyalo ng’eyo ka be chenro ma en-go e ngima kod tij Nyasaye chalre gi magi. Inyalo wuoyo gi jodong-kanyaklagi kata Jokristo moko motegno mong’eye maber. (Nge. 20:18) Inyalo penjo jomamoko kaka ginene kod kido ma en-go. (Ruth 2:11) Sama inono ng’atno, tem matek mondo iwene kore kendo kik one ni ithung’e ahinya. Miye luor kendo kik idonjri e wechene ahinya.
Ka pok inyiso ng’ato ni diher timo kode kisera, kwong inone kuom kinde ma ok ofwenyo ni inone (Ne paragraf mar 7-8)
9. En ang’o monego ibedgo gadier chuth ka pok inyiso ng’ato ni diher ni ukendru?
9 Onego inon ng’ato kuom thuolo ma romo nade ka pok inyise ni diher donjo kode e kend? Ka inyise wachno mapiyo ahinya, onyalo neno ni irikni timo yiero. (Nge. 29:20) To komachielo, kikawo thuolo mang’eny ahinya ka pok iwacho gima idwaro, ng’atno nyalo neno ni idigni e timo yiero, to ahinya-ahinya ka po ni osefwenyo gomboni. (Ekl. 11:4) Par ni ok ochuno ni ibed gadier chuth ni mano e ng’ama nyaka ikendi kata okendi. Kata kamano, onego ibed gadier chuth ni iikori ne kend, kendo ni ng’atno owinjore kodi.
10. Ang’o monego itim kifwenyo ni ng’ato diher chako kodi kisera to in ok idwar wachno?
10 Nade kifwenyo ni ng’ato diher chako kodi kisera? Ka po ni ok idwar wachno, we mondo gik mitimo onyis mano maler. Ok en gima nyiso ng’wono ka imiyo ng’atno opar ni inyalo timo kode kisera, to ing’eyo maber ni gima kamano ok nyalre.—1 Kor. 10:24; Efe. 4:25.
11. Ang’o monego iket e paro kokwayi ni imany ne ng’ato ng’ama onyalo kendorego?
11 E pinje moko, jonyuol kata jomoko madongo e ma yieroga ne ng’ato ng’ama onyalo kendorego. To e pinje mamoko, joot kata osiepe e ma manyoga ne ng’ato ng’ama ginyalo kendorego, kae to gichano mondo ji ariyogo orom mondo gine ka giwinjore. Ka okwayi ni imeny ne ng’ato, nyis ni idewo paro mar ng’ama imenyone, kod mar ng’ama ineno ni owinjore gi ng’ama imenyoneno. Kifwenyo ng’at mowinjore kode, tem nono kido mag ng’atno, to moloyo, winjruokne gi Jehova. Winjruok ma ng’ato nigo gi Jehova duong’ moloyo pesa, somo, kata mwandu. Par ni owadwa gi nyaminwa ma dwaro kendore e ma biro timo yiero mogik.—Gal. 6:5.
CHAKO KISERA
12. Ka diher chako kisera gi ng’ato, ere kaka inyalo nyise wachno?
12 Ka diher chako kisera gi ng’ato, ere kaka inyalo nyise wachno? d Inyalo chano mondo igo mbaka kode kamoro ma ok opondo kata e simu. Nyise maler kendo e yo moriere gima idwaro. (1 Kor. 14:9) Ka nyalore, miye thuolo mar paro matut kuom wachno ka pok omiyi dwoko. (Nge. 15:28) To ka po ni iyudo ka ok oikore chako kisera, chiw luor ne yieroneno.
13. Ang’o minyalo timo ka ng’ato onyisi ni doher chako kodi kisera? (Jo-Kolosai 4:6)
13 To nade ka in e ma ng’ato onyisi ni doher chako kodi kisera? Ng’e ni ng’atno ochoko chir ahinya mondo onyisi wachno, omiyo, bed mang’won kode kendo inyise luor. (Som Jo-Kolosai 4:6.) Ka diher ni omiyi thuolo mar paro e wi wachno, to nyise. Kata kamano, tem mondo imiye dwoko mapiyo kaka nyalore. (Nge. 13:12) Ka ok diher chako kode kisera, nyise wachno e yo mang’won kendo moriere. Ne ane gima Owadwa Hans ma wuok Austria notimo ka ne nyaminwa moro okwaye osiep mar kisera: “Nanyise pacha e yo mang’won kendo moriere. Nikech ne ok adwar chako timo kisera kode, namiye dwoko gikanyo mondo kik ogen gima onge. Bang’ mano, natang’ ahinya mondo kik atim gimoro amora ma ne nyalo miyo opar ni nanyalo loko pacha.” To komachielo, ka diher chako kisera gi ng’atno, nyise pachi kendo uwuo e wi kaka ubiro timo kisera. Gik ma diher timo nyalo pogore gi mage nikech samoro ne upon mopogore kata nikech weche mamoko.
KAKA JOMAMOKO NYALO KONYO JOKRISTO MA DWARO DONJO E KEND
14. Ere kaka wanyalo tiyo gi wechewa e jiwo Jokristo ma ok nie kend?
14 Ere kaka waduto wanyalo konyo Jokristo ma gombo donjo e kend. Yo achiel en tang’ ahinya gi gik ma wawacho. (Efe. 4:29) Wanyalo penjore kama: ‘Be wechena nyiso ni athung’oga jomoko mondo odonj e kend? Sama aneno owadwa ma pok odonjo e kend ka goyo mbaka gi nyaminwa moro ma pok odonjo e kend, be apong’oga gi wiya ni gitimo kisera?’ (1 Tim. 5:13) E wi mago, ok onego wami Jokristo ma pok odonjo e kend opar ni nitie gima giremo e ngima. Hans ma ne wasewuoyo kuome motelo wacho kama: “Owete moko penjoga penjo kaka, ‘Ang’o momiyo pok ikendo kata ni, ang’o momiyo pok okendi? Tinde iromo!’ Weche kaka mago miyo joma pok odonjo e kend neno ni ji ok dewgi, kendo wechego medo mana thung’ogi mondo gidonj e kend.” Donge nyalo bedo maber ka wamanyo thuolo mag pwoyo Jokristo ma pok odonjo e kend?—1 The. 5:11.
15. (a) Ka luwore gi puonj manie Jo-Rumi 15:2, ang’o monego waket e paro ka pok wachako konyo ng’ato manyo ng’ama dokendrego? (b) Gin puonj mage madongo miyudo e vidio? (Ne picha bende.)
15 To nade kineno ni owadwa moro owinjore gi nyaminwa moro? Muma nyisowa ni wadew jomamoko. (Som Jo-Rumi 15:2.) Ji mang’eny ma ok nie kend ok diher ni jomamoko onyisgi joma ginyalo kendorego, kendo onego wachiw luor ne yierogino. (2 The. 3:11) Jomoko to nyalo dwaro ni wakonygi menyo, kata kamano, ok onego watim kamano ka pok gikwayowa. e (Nge. 3:27) Moko kuom joma ok nie kend ok ohero ni otudgi achiel kachiel gi ng’ato. Nyaminwa Lydia ma wuok Germany, ma pok odonjo e kend, wacho kama: “Inyalo loso thuolo mondo owadwa gi nyaminwano orom kanyachiel gi jomamoko e budho moro. In losnegi mana thuolo ma kamano, kae to iwe gin e ma gitim yiero.”
Sama ji nie budho moro kata e chokruok, Jokristo ma gombo donjo e kend nyalo yudo thuolo mar ng’ere gi ng’at ma ginyalo kendorego (Ne paragraf mar 15)
16. Ang’o ma Jokristo ma ok nie kend onego opar?
16 Waduto, bed ni wan e kend kata ooyo, wanyalo dak e ngima mopong’ gi mor madier! (Zab. 128:1) Omiyo, kidwaro donjo e kend to pok iyudo ng’ama owinjore kodi, dhi nyime keto chunyi e tij Jehova. Nyaminwa Sin Yi ma wuok Macao wacho kama: “Thuolo ma in-go ka pok idonjo e kend tin ahinya kopim gi kinde mibiro dakgo gi jaodi e Paradiso. Omiyo, ti maber gi thuolono sani.” To nade kiseyudo ng’at midwaro donjogo e kend, kendo usechako kisera? E sula ma luwo, wabiro wuoyo e wi kaka unyalo timo kisera e yo ma miyo Jehova duong’.
WER 137 Mon ma Nohero Nyasaye, Nyiminewa ma Jokristo
a Mondo ing’e ka be iseikori ne kend, som sula manie jw.org/sw ma wacho ni, “Urafiki wa Kimapenzi—Sehemu ya 1: Je, Niko Tayari Kuanzisha Urafiki wa Kimapenzi?”
b WECHE MOLER: E sulani kod ma luwo, oti gi kisera kiwuoyo kuom kinde ma dichwo gi dhako kawo ka ging’ere maber mondo ginon ka be ginyalo kendore. E pinje moko, kindego inyalo luong ni kinde mag ng’eruok. Kisera chakorega sama dichwo gi dhako oyie ni gidwaro ng’ere maber, kendo odhi nyime nyaka chieng’ ma gidonjo e kend kata ma ging’adoe osiep mar kisera.
c Nyinge moko oloki.
d E ogendni moko, dichwo e ma kawoga okang’ mar chako kisera. Kata kamano, nyaminwa ok onego oluor nyiso owadwa ni doher timo kode kisera. (Ruth 3:1-13) Mondo iyud weche momedore, som sula ma wacho ni, “Vijana Huuliza . . . Nitamwambiaje Jinsi Ninavyohisi?” e Amkeni! ma Oktoba 22, higa 2004.
e Ne vidio manie jw.org/luo ma wiye wacho ni, Joma Osekedo Matek Ne Yie—Jokristo ma Pok Odonjo e Kend.
