SULA MAR PUONJRUOK 24
WER 24 Biuru e Got mar Jehova
Bed Wendo Jehova Nyaka Chieng’!
“A Jehova, ng’ano ma nobed wendo e hema mari?”—ZAB. 15:1.
GIMA SULANI WUOYE
Sulani biro konyowa ng’eyo gik ma dwarore mondo wadhi nyime bedo osiepe Jehova, kod kaka odwaro ni watimne osiepene.
1. Ere kaka Zaburi 15:1-5 nyalo konyowa?
E SULA mokalo, ne wapuonjore ni jotich Jehova mosechiworene, nyalo bedo wende e hema mare mar ranyisi kuom temo matek mondo gibed gi osiep machiegni kode. To ang’o monego watim mondo wabed osiepe Jehova? Zaburi mar 15 lero weche moko ma nyalo konyowa. (Som Zaburi 15:1-5.) Zaburino nigi puonj mabeyo ma nyalo konyowa sudo machiegni gi Nyasaye.
2. Ang’o ma nyalo bedo ni ne nitie e pach Daudi sama nowuoyo e wi hema mar Jehova?
2 Zaburi mar 15 chako ka penjo kama: “A Jehova, ng’ano ma nobed wendo e hema mari? Ng’ano ma nyalo dak e godi maler?” (Zab. 15:1) Sama Daudi ma nondiko zaburini ne wuoyo kuom “hema,” nyalo bedo ni gima ne en-go e paro ne en tabernakel ma kinde moro ne niga Gibeon. To sama nowuoyo kuom “got maler,” nyalo bedo ni nowuoyo kuom Sayun ma ne ni Jerusalem. Sayun ne ni kilomita mang’eny ahinya kiwuok Jerusalem. Mano e kama kinde moko Daudi noketoe hema ma ne iketo e sandug singruok, nyaka chop kinde ma nogerne sandugno kama owinjore.—2 Sa. 6:17.
3. Ang’o momiyo onego wanon tiend weche manie Zaburi mar 15? (Ne picha bende.)
3 En adier ni ne ok oyiene ng’eny Jo-Israel tiyo e hema mar lamo, kendo joma nok ahinya e ma ne nyalo donjo kama ne okane sandug singruok. Kata kamano, e kindewagi jotich Jehova duto momakore kode nyalo bedo welo e hema mare mar ranyisi kendo siko ka gin osiepene. Mano en gima waduto dwaher. Zaburi mar 15 wuoyo kuom kido moko ma dwarore ni wabedgo mondo wasik ka wan osiepe Jehova.
Jo-Israel ma nodak e kinde Daudi ne nyalo ng’eyo maber tiend bedo wendo Jehova (Ne paragraf mar 3)
WUOTH TIR KENDO ITIM GIK MAKARE
4. Wang’eyo nade ni batiso kende ok oromo miyo ng’ato obed wendo Jehova? (Isaya 48:1)
4 Zaburi 15:2 wacho ni osiepe Nyasaye ‘gin joma wuotho tir e yoregi duto, kendo ma timo gik makare.’ Weche motigo ni “wuotho” kod “timo” nyiso ni dwarore ni wadhi nyime timo gik ma biro miyo wabed osiepe Nyasaye. To be en gima nyalore mondo ‘wawuoth tir’ e yorewa duto kendo bedo osiepe Nyasaye? Ee. Kata obedo ni wan dhano morem, pod Jehova nyalo kwanowa kaka joma ‘wuotho tir’ ka watimo duto ma wanyalo mondo waluw chikene. Sama wachiwore ne Nyasaye mobatiswa, wachako wuotho kode. Par ni e ndalo ma nindiko Muma, bedo e oganda Jo-Israel ne ok oromo nyiso ni koro ng’ato en wendo Jehova. Jomoko ne luongoga nyinge, kata kamano, ne ok gitim kamano “gadiera kendo e yo makare.” (Som Isaya 48:1.) Jo-Israel ma ne gombo bedo wend Jehova ne nyaka puonjre chikene kendo luwogi. E yo ma kamano bende, e ndalowagi, batiso kod bedo e kanyakla mar Jokristo kende ok oromo mondo ng’ato obed osiep Nyasaye. Nyaka wadhi nyime “timo gik makare.” Mano oriwo timo ang’o?
5. Luwo chike Jehova e ngimawa duto oriwo timo ang’o?
5 E wang’ Jehova, ‘wuotho tir’ kendo “timo gik makare” oriwo gik mang’eny moloyo mana dhi e chokruoge mag Jokrsito. (1 Sa. 15:22) Nyaka watem matek mondo waluw chike Jehova e ngimawa duto, kata sama wan kendwa. (Nge. 3:6; Ekl. 12:13, 14) Dwarore ni waluw chike Jehova kata mana e weche matindo tindo. Timo mano nyiso ni wahere gadier, to mano miyo en bende omedo herowa.—Joh. 14:23; 1 Joh. 5:3.
6. Ka luwore gi Jo-Hibrania 6:10-12, be gik mabeyo ma ne watimo chon nyalo miyo wasik e hema mar Jehova? Ler ane.
6 Jehova mor ahinya gi gik ma wasetimone e kinde mokalo. Kata kamano, gik ma wasetimogo kende ok oromo miyo wasik ka wan welo e hema mar Jehova. Jo-Hibrania 6:10-12 nyiso mano maler. (Som.) Wi Jehova ok nyal wil gi gik ma wasetimone e kinde mokalo. Kata kamano, odwaro ni wadhi nyime tiyone gi chunywa duto “nyaka giko.” Obiro miyowa thuolo mar bedo osiepene nyaka chieng’ “ka ok waol.”—Gal. 6:9.
WACH ADIER EI CHUNYI
7. Wacho adiera koa e chunywa oriwo timo ang’o?
7 Ng’ato ang’ata ma dwaro ni Jehova oyiene dhi nyime bedo e hemane nyaka bed ng’ama “wacho adier ei chunye.” (Zab. 15:2) Ok en aena wacho miriambo. Jehova dwaro ni wabed joratiro e wechewa kod timbewa duto. (Hib. 13:18) Mano en gima dwarore nikech “chuny Jehova osin gi ng’at ma wuondore, to obedo osiep ng’at ma yorene tir.”—Nge. 3:32.
8. En tim mane monego watang’go?
8 Joma ‘wacho adier ei chunygi’ ok luw chike Jehova mana sama gin e lela, to sama gin kar kendgi to giketho chikego. (Isa. 29:13) Ok giwuondre e nyim ji. Ng’at ma wuondore e nyim ji nyalo chako bedo gi kiawa kuom rieko kod chike makare ma Jehova chiwo. (Jak. 1:5-8) Onyalo weyo luwo chike Jehova e gik moko moneno e wang’e ni tindo. Mosmos, nikech oneno ni kata ka oketho chike moko to onge gima rach ma yude, onyalo chako ketho chike moko madongo kendo dak e ngima mar wuondruok. (Ekl. 8:11) Wan to wadwaro ni wabed joratiro e weche duto.
9. Weche ma Yesu nowacho kuom Nathaniel ka nohango romo kode puonjowa ang’o? (Ne picha bende.)
9 En gima dwarore ahinya ni wabed joma ‘wacho adier ei chunywa.’ Wanyalo neno mano ka wanono gima Yesu nowacho e wi Nathaniel osiep Filipo. Kata obedo ni chieng’no e ma Yesu nohangoe romo gi Nathaniel, nowacho kuome kama: “Neuru, Ja-Israel ma kuom adier, onge wuondruok kuome.” (Joh. 1:47) En adier ni jopuonjre Yesu moko ne gin joratiro kendo ne ok giwuondre, kata kamano, Nathaniel to nonyiso kidono e okang’ malach. Nathaniel ne en dhano morem mana kaka wan. Kata kamano, ne onge wuondruok moro amora kuome. Mano gima nomoro Yesu kendo nopwoye. Donge en adier ni wan bende wanyalo bedo mamor ka Yesu owacho kamano kuomwa?
Filipo nokelo Nathaniel osiepne ma ne en ng’at ma onge wuondruok kuome mondo orom gi Yesu. Be inyalo wach kamano kuomwa? (Ne paragraf mar 9)
10. Ang’o momiyo ok onego wati marach gi mich mar wuoyo? (Jakobo 1:26)
10 Nitie gik ma ok onego watim ne ji, ma yudore e Zaburi mar 15. Zaburi 15:3 wacho ni ng’ama en wendo e hema mar Jehova “en ng’at ma ok keth nying ng’ato, ok tim marach ne jowetene, kendo ok okuod wi osiepene.” Ka watiyo marach gi mich mar wuoyo e ketho nying ji, mano nyalo chwanyogi kendo ketho winjruokwa kodgi. Bende, onyalo miyo kik wadhi nyime bedo e hema mar Jehova.—Som Jakobo 1:26.
11. Ketho nying ng’ato tiende en ang’o, to en okang’ mane mikawoga ne ng’at ma ketho nying ji to odagi weyo timno?
11 Jandik-zaburi nowuoyo e wi ketho nying ng’ato. Ketho nying ng’ato tiende en ang’o? En wacho miriambo kuom ng’ato ma miyo ji nene e yo ma ok owinjore. Joma ketho nying ji to odagi weyo timno, igolo oko mar kanyakla.—Jer. 17:10.
12-13. Ere kaka wanyalo kuodo wi osiepewa ka ok wang’eyo? (Ne picha bende.)
12 Zaburi 15:3 bende paronwa ni wend Jehova ok tim marach ne jowetegi kendo ok okuod wi osiepegi. Mano oriwo ang’o?
13 Wanyalo kuodo wi ng’ato ka ok wang’eyo sama wawacho gik ma ok owinjore kuome. Kuom ranyisi, wane ane weche ma luwogi: (1) Nyaminwa moro oweyo tiyo ne Jehova kuom thuolone duto, (2) owadwa moro gi jaode migapgi mar tiyo e Bethel orumo, (3) owadwa moro koro ok en jakony tich kata jaduong’ kanyakla. Be en gima owinjore pong’o apong’a gi wiwa gimomiyo wechego notimore kendo chako pimogi ne jomamoko? Samoro nyalo bedo ni nitie gimomiyo ne giweyo migepego ma wan ok wang’eyo. E wi mano, osiepe Jehova “ok tim marach ne jowetene, kendo ok kuod wi osiepene.”
Yot ahinya wacho weche ma ok gin adier e wi jomoko kendo ketho nyinggi (Ne paragraf mar 12-13)
MI JOMA OLUORO JEHOVA DUONG’
14. Ler ane kaka osiepe Jehova onego “okwed ng’ato ang’ata ma timbene richo.”
14 Zaburi 15:4 wacho ni Jehova “[kwedo] ng’ato ang’ata ma timbene richo.” Ere kaka wanyalo ng’eyo ni ng’ato timbene richo? Nikech wan dhano morem, ok wanyal ng’ado ne ng’ato bura ni orach kata ooyo. Ang’o momiyo wacho kamano? Nitie kido moko ma ng’ato nyalo bedogo ma nyalo miyo wabed osiepene, jomoko to nyalo bedo gi kido moko ma monowa bedo osiepegi. Kata kamano, ok onego wawe bedo osiepegi mana nikech kido ma gin-go ma ok morwa, to onego wawe bedo osiepegi nikech Jehova nenogi kaka joma ‘timbegi richo.’ (1 Kor. 5:11) To mano oriwo joma timo gik maricho to odagi loko chunygi, joma ok omiyo adiera kod gik ma wayiego luor kendo ma temo nyoso chunywa, kata joma temo ketho winjruokwa gi Jehova.—Nge. 13:20.
15. Achiel kuom yore ma wa miyogo “[joma] oluoro Jehova duong’” en mane?
15 Zaburi 15:4 nyisowa ni wami “[joma] oluoro Jehova duong’.” Watemo matek mondo wamany yore ma wanyalo nyisogo osiepe Jehova ng’wono kod duong’. (Rumi 12:10) E yo mane? Yo achiel ma wanyalo timogo kamano yudore e Zaburi 15:4 ma wacho ni joma gin welo e hema mar Jehova ‘timo gik ma gisesingore, kata ka timo kamano biro hinyogi.’ Tamruok timo gima wasesingore nyalo chwanyo jomamoko. (Mat. 5:37) Kuom ranyisi, Jehova dwaro ni wende orit singruok mar kend. Jehova bende bedoga mamor sama jonyuol temo matek mondo gichop singo ma gitimo gi nyithindgi. Hero Nyasaye kod jowetewa biro chwalowa mondo watim duto ma wanyalo e chopo singowa.
16. En yo mane machielo ma wanyisogo ni wamiyo joma oluoro Jehova duong’?
16 Yo machielo ma wanyalo miyogo joma oluoro Jehova duong’ en kuom bedo joma ohero rwako welo kendo jochiwo. (Rumi 12:13) Bedo kanyachiel gi owetewa gi nyiminewa tego osiep manie kindwa kodgi kod osiep manie kindwa gi Jehova. Ka wan joma ohero rwako welo, waluwo ranyisi mar Jehova.
KIK IHER PESA
17. Ang’o momiyo owuo e wi pesa e ndiko mar Zaburi mar 15?
17 Osiepe Jehova “ok hol ng’ato pesa mondo oduokne gi ohala e wiye, kendo ok ocham asoya mondo oketh buch ng’at ma onge ketho.” (Zab. 15:5) Ang’o momiyo owuo e wi pesa e weche ma yudore e Zaburini? En nikech bedo gi paro ma ok owinjore e wi pesa, nyalo ketho winjruokwa gi ji kod winjruokwa gi Nyasaye. (1 Tim. 6:10) E kinde ma nindiko Muma, nitie jotich Nyasaye moko ma ne holo jowetegi modhier pesa ka gidwaro ni odwoknegi pesano gi ohala e wiye. Bende, nitie jong’ad bura moko ma ne kawo asoya mondo ging’ad ne jomoko bura marach. Mago gin timbe ma ok mor Jehova.—Eze. 22:12.
18. Gin penjo mage ma wanyalo penjore ma nyalo konyowa ng’eyo ka be wan-gi paro mowinjore e wi pesa? (Jo-Hibrania 13:5)
18 Onego wanonre mondo wang’e ni wan gi paro mane e wi pesa. Penjri ane kama: ‘Be kinde duto aparoga mana pesa kod gik ma pesa nyalo nyiewo? Ka ng’ato ohola pesa, be adwokonega mapiyo, koso abudhogo ka aparo ni ng’atno ok odich gi pesaneno? Be bedo gi pesa miyo ating’ora malo e wi jomamoko, to sechego an ng’ama ngudi? Be aneno owetena gi nyiminena kaka joma ohero mwandu mana nikech gin gi pesa? Be amakoga osiep gi joma nigi pesa to abwono joma odhier?’ Waseyudo thuolo makende mar bedo wend Jehova. Wanyalo siko ka wan wende ka ok wahero pesa. Ka watimo kamano, to Jehova ok bi jwang’owa!—Som Jo-Hibrania 13:5.
JEHOVA OHERO OSIEPENE
19. En ang’o maduong’ momiyo Jehova dwaro ni waluw chikene?
19 Zaburi mar 15 rumo ka singo kama: “Ng’ato ang’ata ma timo gigi ok noyiengni ngang’.” (Zab. 15:5) Weche mogik e Zaburino leronwa gimomiyo Jehova dwaro ni waluw chikene. Odwaro ni wabed mamor. Mano e momiyo otayowa e yo ma biro kelonwa gueth kod arita maber.—Isa. 48:17.
20. Gin gueth mage ma wend Jehova biro yudo?
20 Wend Jehova moyiego biro yudo gueth mang’eny e kinde mabiro. Jokristo mowal momakore kode biro yudo “kuonde dak mang’eny” ma Yesu oseikonegi e polo. (Joh. 14:2) Joma nigi geno mar dak e piny to biro yudo gueth ma yudore e Fweny 21:3. Kuom adier, donge en thuolo makende bedo osiepe Jehova sani, kendo siko ka wan wende nyaka chieng’!
WER 39 Walos Nying Maber gi Nyasaye
