MUMA oting’o weche mathoth ma jotich Nyasaye machon nowacho ma nyiso kaka ne giwinjo e chunygi. Jogo ne gin agina ‘dhano kaka wan.’ (Jak. 5:17) Kuom ranyisi, wanyalo winjo maber tiend weche ma Paulo nowacho e Jo-Rumi 7:21-24 ni: “Ka adwaro timo gima kare, gima rach e ma siko ka ni koda. . . . Mano kaka an ng’at ma chandore!” Sama wan be wawinjo marach nikech nyawo moko ma wan-go, wanyalo yudo hoch ahinya kuom ng’eyo ni kata mana jaote Paulo bende ne winjo malit e chunye nikech nyawo ma ne en-go.

Nitie ndiko mamoko ma bende Paulo nowachoe kaka nowinjo e chunye. Kuom ranyisi, e Jo-Galatia 2:20, nowacho ka en gadier niya: ‘Yesu nohera kendo nochiwore owuon ne an.’ Be in be iwinjo e chunyi ni Yesu nothoni in iwuon? Samoro kinde moko inyalo bedo gi kiawa ka be en kamano adier.

Ka po ni wawinjo e chunywa ni wan joma nono nikech richo moko ma ne watimo chon, nyalo bedo ma teknwa yie ni Jehova oherowa kendo ni oikore weyonwa richowa. Bende, ok nyal bedonwa ma yot yie ni misango ma Kristo nochiwo en mich momiyo ng’ato ka ng’ato kuomwa. Be en adier ni Yesu dwaro ni wane misango ma nochiwo kaka mich momiyo ng’ato ka ng’ato kuomwa? Ka en kamano, ang’o ma nyalo konyowa mondo wane misangono kamano? We wane ane.

Yesu dwaro ni wane misango ma nochiwo kaka mich momiyo ng’ato ka ng’ato kuomwa. Ere kaka wanyalo bedo gadier gi wachno? Tem ane paro ni ineno gik miwuoye e Luka 23:39-43 ka timore. Ng’at moro ogur e yath e bath Yesu. Ng’atno yie ni kethone e momiyo ogure kanyo. Nyaka bed ni notimo gima rach ahinya nikech ne ok thor gur agura jaketho moro amora. Ng’atno parore ahinya nikech kethone; omiyo, osayo Yesu kama: “Iparae e kinde midonjo e Pinyruodhi.”

Yesu dwoke nang’o? Parie rem ma Yesu winjo sama oloko wiye mondo ong’i wang’ ng’atno. E remno duto, obwonjo gi ng’atno kae to ohoye kosingone niya: “Adier awachoni kawuononi, inibed koda e Paradiso.” Yesu ne nyalo yiero paro ne apara ng’atno ni “Wuod dhano nobiro . . . mondo ochiw ngimane obed rawar ne ji mang’eny.” (Mat. 20:28) Be ineno kaka weche ma Yesu notiyogo nyiso ni thone konyo ng’ato ka ng’ato yore? Nowuoyo mang’won kotiyo gi weche kaka “awachoni” gi “koda.” Ne ok onyiso anyisa ng’atno ni ji biro dak e paradiso; kar mano, nonyise ni ne odhi bedo e paradiso.

Nenore maler ni Yesu ne dwaro ni ng’atno one misangone kaka mich ma nomiye en owuon. Ka Yesu ne neno ni misangone ne en mich momiyo jamahundu ma ne pok oyudo kata mana thuolo mar tiyo ne Nyasaye, donge mano nyiso ni misangono konyo Jakristo ka Jakristo mosebatisi ma tiyo ne Nyasaye? Ka en kamano, kare ang’o ma nyalo konyowa mondo wabed gadier ni misango ma Yesu nochiwo nyalo konyowa ng’ato ka ng’ato kata bed ni ne wasetimo richo mage e kinde mokalo?

Bedo ni Yesu ne omiyo Paulo migawo mar yalo nomiyo Paulo oneno misango Yesu kaka mich ma  nomiye owuon. E yo mane? Nolero kama: “Agoyo erokamano ne Kristo Yesu Ruodhwa ma nomiya teko, nikech nokwana kaka ng’at migeno kuom miya migawo e tij Nyasaye, kata obedo ni chon ne achayo Nyasaye kendo ne asando joge, kendo ne an ng’at ma ne timo ne ji timbe mag achaya.” (1 Tim. 1:12-14) Nikech Yesu nomiyo Paulo migawono kata obedo ni Paulo ne en ng’at marach ahinya, mano nomiyo obedo gadier ni Yesu ne keche, nohere, kendo nogene. Wan bende Yesu omiyo ng’ato ka ng’ato kuomwa migawo. (Mat. 28:19, 20) Be migawono nyalo miyo wawinj e chunywa kaka Paulo nowinjo?

Albert ma yande oduok e kanyakla bang’ weyo Jehova kuom higni 34 wacho niya: “Asiko aparo richo ma natimo. To sama an e tij lendo, awinjo e chunya mana kaka Paulo nowinjo, ni Yesu okecha ahinya kuom miya migawono. Mano jiwa kendo miyo asiko ka amor gi ngimana ma sani kod ma kinde ma biro.”​—Zab. 51:3.

Allan ma ne en jamahundu ma nohero goyo ji ka ne pok opuonjore adiera wacho kama: “Pod aparo gik maricho ma natimo ne ji. Seche moko, mano chandoga chunya ahinya. Kata kamano, agoyo ne Jehova erokamano kuom miya thuolo mar lando ne ji wach maber kata obedo ni chon ne arach kamano. Sama aneno ka jomoko mor gi wach maber ma alando, mano parona kaka Jehova ber kendo ojahera. Aneno ni otiyo koda e konyo joma kit ngimagi chalo gi mara machon.”

Tij lendo ma Jehova omiyo ng’ato ka ng’ato kuomwa konyowa mondo wati gi tekowa e timo gik mabeyo kendo paro gik mabeyo. Tijno miyo wabedo gadier ni Yesu kechowa, oherowa, kendo ogenowa.

Ka pok oketh piny ma Satan lochoeni, gik maricho ma ne watimo chon pod biro dhi nyime chando chunywa. Ang’o ma biro konyowa mondo gigo kik chand chunywa ahinya?

Jean ne timoga timbe maricho aling’-ling’ to konchiel nowuondore ni en jatich Jehova maber. Gik ma notimo e kindeno pod chando chunye nyaka sani. Owacho kama: “Gima kueyo chunya en ng’eyo ni ‘Nyasaye duong’ moloyo chunywa.’” (1 Joh. 3:19, 20) Mana kaka Jean, wan bende wanyalo winjo maber e chunywa ni Jehova gi Yesu ong’eyo ni wan dhano ma joricho kendo giikore konyowa. Par ni hera ma giherowago e ma nomiyo gichiwo rawar. Ne gichiwe ne joma oyie loko chunygi mi giwe richogi, to ok ne joma onge richo moro amora.​—1 Tim. 1:15.

Mondo wasik ka wan gadier ni tho Yesu konyowa ng’ato ka ng’ato, dwarore ni wasik ka waparo matut kuom yo ma Yesu kechogo dhano morem, kendo watim duto ma wanyalo e tich momiyowa mar lando wach maber. Ka watimo kamano, ng’ato ka ng’ato kuomwa biro wacho mana kaka Paulo nowacho niya: ‘Yesu nohera kendo nochiwore owuon ne an.’