Be isebedo ka isomo gasede mag Ohinga mar Jarito ma higani? Ka en kamano, ne ane ka inyalo dwoko penjo ma luwogi:

Onego wabed gi paro mane e wi Jokristo mowal?

Wamor ahinya gi yie ma ginyiso, kata kamano, ok wadwar miyogi duong’ mokalo tong’. Onego watang’ mondo kik waluw aluwa jomamoko mana nikech owalgi. (Juda 16) Bende, ok onego wapenjgi penjo motudore gi geno ma gin-go.​—w20.01, ite mar 29.

Ang’o momiyo onego ibed gadier ni Jehova ong’eyi?

Muma wacho ni Jehova ne ong’eyi kata ka ne pod in e ich. Kendo owinjoga lamo magi. Bende, ong’eyo gik ma ni e chunyi, weche miparo, kod timbeni duto. (1 We. 28:9; Nge. 27:11) Jehova owuon e ma noywayi ire.​—w20.02, ite mar 12.

Gin kinde kaka mage monego wawuoye kod monego waling’ie?

Wamorga wuoyo e wi Jehova. Ok wabi ling’ sama ng’ato ochomo yo ma ok kare. Jodong-kanyakla ok onego oling’ sama dwarore ni gichiw siem. Ok onego wapenj kata wacho kaka itimo tijwa e pinje ma ogowae marfuk. Bende ok onego wael weche maling’ ling’ mag jomoko.​—w20.03, ite mar 20-21.

Ere kaka det-bonyo miwuoyoe e Joel sula mar 2 opogore gi det-bonyo miwuoyoe Fweny sula mar 9?

Joel 2:20-29 wacho ni Nyasaye ne dhi riembo det-bonyogo kendo dwoko gik ma ne giketho. Bang’ mano, Nyasaye ne dhi olo roho mare maler. Wechego notimore ka ne Jo-Babulon omonjo Jo-Israel kod kinde moko bang’e. Fweny 9:1-11 wuoyo kuom Jokristo mowal ma chalo kaka det-bonyo sama gilando kum mag Nyasaye ne joma riwo pinyni lwedo. Weche ma gilandogo miyo jogo winjo marach.​—w20.04, ite mar 3-6.

Ruoth ma nyandwat en ng’a sani?

En Russia gi pinje ma riwe lwedo. Gisetimo gik mamulo jotich Jehova achiel kachiel, gisegoyo tijwa mar lendo marfuk, kendo sando Joneno. Ruoth ma nyandwat osebedo ka piem gi ruoth ma milambo.​—w20.05, ite mar 13.

Be kido ochiko miwuoye e Jo-Galatia 5:22, 23 kende e “olembe ma roho nyago”?

Ooyo. Roho maler nyalo konyowa nyago kido mamoko mabeyo kaka tim makare. (Efe. 5:8, 9)​—w20.06, ite mar 17.

Ang’o momiyo onego itang’ gi pichni kod gik mamoko ma iketo kuonde tudruok e intanet?

Nikech pichni kod gik mamoko ma iketo kuonde tudruok e intanet nyalo miyo jomoko opar ni isungori kendo ni ok in ng’at ma obolore.​—w20.07, ite mar 6-7.

Gin ang’o ma jolendo nyalo puonjore kuom jolupo molony?

Jolupo molony lupoga e seche mowinjore kendo kuonde ma ging’eyo ni ginyalo makoe rech mang’eny. Gitiyoga gi gige tich mowinjore. Kendo gilupoga gi chir kata sama giromo gi chandruoge moko. Wan be wanyalo luwo ranyisi mar jolupo molony sama wan e tij lendo.​—w20.09, ite mar 5.

Gin yore mage ma wanyalo konyogo jopuonjre mag Muma mondo omed hero Jehova?

Wanyalo jiwogi mondo gisom Muma pile kendo paro matut kuom gik ma gisomo. Bende, onego wapuonjgi lemo.​—w20.11, ite mar 4.

Bug 1 Jo-Korintho 15:22 wacho kama: “Kuom Kristo dhano duto biro bedo mangima.” Ji duto mabiro bedo mangimago oriwo jomage?

Jaote Paulo ne ok temo nyiso ni dhano duto ibiro chier. To nowuoyo kuom Jokristo mowal, “ma osepwodh e winjruok achiel gi Kristo Yesu.” (1 Kor. 1:2; 15:18)​—w20.12, ite mar 5-6.

En ang’o ma Jokristo mowal biro timo bang’ ka ‘oselokgi mapiyo ka diemo wang’, e kinde ywak mar turmbeta mogik’?​—1 Kor. 15:51-53.

Gin bende gibiro kwayo oganda ka gitiyo gi luth mar chuma kaachiel gi Yesu. (Fwe. 2:26, 27)​—w20.12, ite mar 12-13.