SULA MAR PUONJRUOK 14
WER 8 Jehova En Kar Bwokwa
‘Yieruru ni Ubiro Tiyo ne Ng’a’
“An kaachiel gi jooda, wabiro tiyo ne Jehova.”—JOS. 24:15.
GIMA SULANI WUOYE
Sulani biro paronwa gik momiyo wayiero tiyo ne Jehova.
1. Ang’o ma nyaka watim mondo wabed mamor gadier, to nikech ang’o? (Isaya 48:17, 18)
JEHOVA Wuonwa manie polo oherowa ahinya, kendo odwaro ni wabed mamor sani kod e kinde mabiro. (Ekl. 3:12, 13) Nochueyowa gi nyalo mopogore opogore, kata kamano, ne ok omiyowa nyalo mar locho e wiwa wawegi kata ratiro mar yiero gima rach gi gima ber. (Ekl. 8:9; Jer. 10:23) Ong’eyo ni mondo wabed mamor gadier, nyaka watine kendo wadag ka luwore gi chikene.—Som Isaya 48:17, 18.
2. Satan dwaro ni wapar ang’o, to Jehova osetimo ang’o?
2 Satan dwaro ni wapar ni wanyalo bedo mamor kata ka ok wati ne Jehova, kendo ni dhano nyalo locho e wigi giwegi e yo maber. (Cha. 3:4, 5) Jehova osemiyo dhano thuolo mar locho kuom kinde, mondo onyis ni weche ma ne Satan owacho gin miriambo. Gik ma timore e piny sani nyiso maler ni dhano ok nyal locho e wigi giwegi. To komachielo, Muma oting’o ranyisi mag chwo gi mon mang’eny ma ne mor nikech ne gitiyo ne Jehova. Yesu Kristo en achiel kuomgi. Mokwongo, wanon ane gik ma nomiyo Yesu oyiero tiyo ne Jehova. Kae to wabiro neno gimomiyo onego wati ne Wuonwa manie polo. To gikone, wabiro neno moko kuom gik momiyo wayiero tiyo ne Jehova.
GIMOMIYO YESU NOYIERO TIYO NE JEHOVA
3. Satan nonyiso Yesu ni obiro timone ang’o, to Yesu notimo ang’o?
3 Ka ne Yesu nie piny kae, ne nyaka oyier ni nodhi tiyo ne ng’a. Mana mapiyo bang’ ka nosebatise, Satan nonyise ni nodhi miye pinjeruodhi duto mag piny kogoyo chonge piny molame mana dichiel kende. Yesu nodwoke kama: “Dhi kucha Satan! Nikech ondik niya: ‘Jehova Nyasachu e ma onego ulam, kendo en kende e ma onego utine.’” (Mat. 4:8-10) Ang’o momiyo Yesu notimo yierono? Ne ane moko kuom gik momiyo notimo kamano.
4-5. Ang’o momiyo Yesu noyiero tiyo ne Jehova?
4 Gima duong’ momiyo Yesu noyiero tiyo ne Jehova en nikech ohero Wuon-gi manie polo gi hera matut. (Joh. 14:31) E wi mano, Yesu tiyo ne Jehova nikech mano e gima owinjore. (Joh. 8:28, 29; Fwe. 4:11) Ong’eyo ni Jehova e Jachiw ngima kendo en Nyasaye minyalo gen kendo ma jachiwo. (Zab. 33:4; 36:9; Jak. 1:17) Jehova nosebedo ka puonjo Yesu adiera kinde duto kendo nosemiye gik mang’eny. (Joh. 1:14) Mopogore gi Jehova, Satan to osekelo ne dhano richo kod tho. En ja miriambo, ok odew dhano, kendo odich mana gi gik ma konye. (Joh. 8:44) Nikech Yesu nong’eyo Jehova e yo maber kendo nong’eyo Satan bende e yo maber, ne ok otemo kata matin luwo tim Satan mar ng’anyo ne Jehova.—Fil. 2:5-8.
5 Gimachielo momiyo Yesu noyiero tiyo ne Jehova en nikech nong’eyo ber ma mano ne dhi kelo. (Hib. 12:2) Nong’eyo ni ka nodhi nyime makore gi Jehova, mano ne dhi miyo nying Wuon-gi obed maler, kendo timo gima ne dhi miyo richo kod tho orum chuth.
GIMOMIYO JEHOVA E MA ONEGO WALAM
6-7. Ang’o momiyo ji mang’eny e kindegi ok ti ne Jehova, to ang’o momiyo en kende e mowinjore walame?
6 Ji mathoth ok ti ne Jehova e kindegi nikech pok ging’eyo kido mabeyo ma en-go kod gik mabeyo ma osetimonegi. Mano bende e kaka joma Paulo nolendonegi Athens ne chalo.—Tich 17:19, 20, 30, 34.
7 Paulo nolero ne Jo-Athens ni Nyasaye madier miyo “ji duto ngima, gi muya, kod gik moko duto.” Nomedo nyisogi ni kokalo kuom Nyasaye “wangima, wawuotho, kendo wantiere.” Nyasaye e Jachuech ma “noloso ogendni duto koa kuom ng’ato achiel,” omiyo, en kende e mowinjore walame.—Tich 17:25, 26, 28.
8. En ang’o ma Jehova ok nyal timo? Ler ane.
8 Nikech Jehova e Jachuech kendo Jaloch mar piny gi polo, onyalo chuno ji mondo otine. Kata kamano, Jehova ok nyal timo gima kamano. Kar mano, osemiyowa gik mang’eny ma nyiso ni entie kendo ni ohero ng’ato ka ng’ato kuomwa. Odwaro ni ji mang’eny kaka nyalore obed osiepene nyaka chieng’. (1 Tim. 2:3, 4) Nikech mano, Jehova osetiegowa mondo wapuonj jomamoko dwache kod gik mabeyo mobiro timo ne dhano. (Mat. 10:11-13; 28:19, 20) Oseketonwa chenro maber mar bedo gi kanyakla kod jokwath ma ritowa maber.—Tich 20:28.
9. Gin yore mage ma Jehova osenyisogo ni ohero ji duto?
9 Jehova nyiso ni ohero nyaka joma ok oyie ni entie kuom miyogi gik mabeyo. Par ane wachni: Kuom higni mang’eny, ji mathoth oseyiero timo dwachgi kar timo dwach Jehova. Kata kamano, Jehova pod miyogi gik ma dwarore mondo gidhi nyime bedo mangima. (Mat. 5:44, 45; Tich 14:16, 17) Osemiyogi nyalo mar bedo gi osiepe, joot, nyithindo, kendo timo gik ma kelonegi mor. (Zab. 127:3; Ekl. 2:24) Mano nyiso maler ni Wuonwa manie polo ohero ji duto. (Wuok 34:6) We wanon ane kendo gik momiyo wayiero tiyo ne Jehova kod kaka oguedhowa.
GIK MOMIYO WAYIERO TIYO NE JEHOVA
10. (a) Gima duong’ momiyo watiyo ne Jehova en ang’o? (Mathayo 22:37) (b) Gin yore mage ma Jehova osenyisogo ni ohore kodi kendo ni oikore weyoni richoni? (Zaburi 103:13, 14)
10 Mana kaka Yesu, gima duong’ momiyo watiyo ne Jehova en nikech wahere. (Som Mathayo 22:37.) Puonjruok e wi kido mabeyo mag Jehova miyo wasudo machiegni kode. Kuom ranyisi, par ane kaka Jehova hore kodwa kendo oikore weyonwa richowa. Ka ne Jo-Israel otamore winje, nosayogi kama: “Akwayou, lokreuru mondo uwe yoreu kod timbeu maricho.” (Jer. 18:11) Jehova ong’eyo ni wan joma orem kendo ni wan mana buru. (Som Zaburi 103:13, 14.) Ka iparo matut e wi horuok mar Jehova kod kido moko mabeyo ma en-go, donge mano miyo igombo tiyone nyaka chieng’?
11. Gin gik mage mamoko ma miyo wayiero tiyo ne Wuonwa manie polo?
11 Gimachielo momiyo watiyo ne Jehova en nikech mano e gima owinjore watim. (Mat. 4:10) E wi mano, wang’eyo ni ka wadhi nyime tiyo ne Jehova to obiro guedhowa gi gik mang’eny. Ka wadhi nyime tiyo ne Jehova, wamiyo nyinge bedo maler, wamoro chunye, kendo wanyiso ni Jachien en ja miriambo. E wi mano, ka wayiero tiyo ne Jehova sani, wanyalo bedo gadier ni wabiro tiyone nyaka chieng’!—Joh. 17:3.
12-13. Gik ma notimore ne Jane gi Pam puonjowa ang’o?
12 Wanyalo chako hero Jehova kata ka pod watindo, kendo herano nyalo dhi nyime bedo motegno kaka higni medo sudo. Ne ane ranyisi mar Jane gi nyamin-gi miluongo ni Pam. a Jane ne en jahigni 11 to Pam ne en jahigni 10 ka ne gichako puonjore Muma gi Joneno mag Jehova. Kata obedo ni jonyuol Jane gi Pam ne ok puonjre Muma, ne giyienegi mondo gipuonjre Muma gi Joneno mag Jehova, tek mana ni ne ok gidhi weyo dhi e kanisa gi jonyuolgi e giko juma. Jane wacho kama: “Gik ma ne Joneno mag Jehova opuonja e Muma nokonya mondo kik adonjra e timbe maricho ma joskul wetena ne timo kaka tiyo gi yedhe mamero, kod timbe maricho mag nindruok.”
13 Higni matin bang’e, giduto ne gibedo jolendo. Bang’e, ne gibedo jopainia ka girito jonyuolgi ma koro ne osechako bedo moti. Jane lero kaka owinjo e chunye koparo gik ma Jehova osetimonegi. Owacho kama: “Napuonjora ni Jehova ritoga osiepene, omakore kodgi, kendo mana kaka 2 Timotheo 2:19 wacho, ‘Jehova ong’eyo joge.’” Onge kiawa ni Jehova rito jogo duto mohere kendo moyiero tiyone!
14. Ere kaka wechewa gi timbewa nyalo miyo ji ong’e adiera e wi Jehova? (Ne pichni bende.)
14 Dwaher konyo ji mondo ging’e ni gik maricho ma gisewinjo ka iwacho e wi Jehova ok gin adier. Par ane ranyisini: Wawach ni in gi osiepni moro ma en ng’at mang’won, ma jachiwo, kendo ma weyo ne ji kethogi. Kae to chieng’ moro, iwinjo ka ng’ato wacho ni osiepnino en ng’at ma ger kendo ja miriambo. Inyalo timo ang’o? Ok diling’ aling’a. E yo ma kamano, sama Satan gi joma riwe lwedo ketho nying Jehova, ok waling’ aling’a. Kar mano, watimoga duto ma wanyalo mondo wanyis ji adiera e wi Jehova. (Zab. 34:1; Isa. 43:10) Wanyiso ni wayiero hero Jehova kendo tiyone kokalo kuom wechewa gi timbewa.
Be ibiro kedo ne nying Jehova? (Ne paragraf mar 14) b
15. Gin ber mage ma jaote Paulo noyudo nikech noloko kit ngimane? (Jo-Filipi 3:7, 8)
15 Waikore timo lokruok e ngimawa mondo wamor Jehova kata mondo watim momedore e tije. Kuom ranyisi, jaote Paulo ne nigi migawo maduong’ e din mar Jo-Yahudi, kata kamano, noyiero weyo mano mondo obed jalup Kristo kendo oti ne Jehova. (Gal. 1:14) Nikech mano, noyudo gueth mang’eny ka notiyo ne Jehova kendo noyudo thuolo mar dhi locho kanyachiel gi Kristo e polo. Ne ok oywago ang’e nikech yiero ma notimo mar tiyo ne Jehova, to wan bende ka wayiero tiyo ne Jehova, ok wabi ywago ang’e.—Som Jo-Filipi 3:7, 8.
16. Ranyisi mar Julia puonjowa ang’o? (Ne pichni bende.)
16 Ka waketo tiyo ne Jehova e ma obed gima duong’ e ngimawa, wabiro yudo gueth sani kod e kinde ma biro. Ne ane ranyisi mar nyaminwa moro miluongo ni Julia. Chakre tinne, nosebedo ka en ja kwaya e kanisagi e kinde ma ne pok opuonjore adiera. Nikech nong’eyo wer ahinya, jower molony nokawe mondo omed tiege. Bang’ kinde machuok, humbe nolandore kendo nochako wer kuonde ma nong’ere ahinya. E kinde ma ne en e skul moro ma nong’ere ahinya mipuonjoe ji thum, japuonjre wadgi moro nochako wuoyo kode e wi Nyasaye kendo nyise ni Nyasaye nigi nyinge, ma en Jehova. Mapiyo bang’ mano, Julia nochako puonjore Muma diriyo e juma. Gikone, nong’ado mar tiyo gi thuolone kod tekone e tiyo ne Jehova kar bedo jawer ma rahuma. Mano ne ok en yiero mayot. Owacho kama: “Ji mang’eny ne nyisa ni natimo fuwo kuom weyo wer mondo ati ne Jehova. Kata kamano, ne adwaro tiyo ne Jehova gi ngimana duto.” Owinjo nade nikech yiero ma notimo higni 30 mokalono? Omedo wacho kama: “Amor ni nayiero tiyo ne Jehova kendo ang’eyo ni obiro chopo gomboga duto e kinde ma biro.”—Zab. 145:16.
Wayudoga mor kod gueth mang’eny sama waketo tij Jehova obed mokwongo e ngimawa (Ne paragraf mar 16) c
DHI NYIME TIYO NE JEHOVA
17. Ere kaka ndalo ma wadakiegi onego omul ngima joma oseyiero tiyo ne Nyasaye kod ma pok oyiero timo kamano?
17 Wadak e giko mar ndalo giko. Jaote Paulo nondiko kama: “Nimar pod odong’ ‘mana kinde matin ahinya’ ma ‘jalno ma biro nochop kendo ok obi deko.’” (Hib. 10:37) Ere kaka wachno mulowa? Kinde modong’ mag yiero tiyo ne Jehova nok ahinya. (1 Kor. 7:29) Ka po ni waseyiero tiyo ne Jehova, wang’eyo ni wabiro romo gi tembe, to gima ber en ni mano biro timore mana kuom “kinde matin ahinya.”
18. Jehova gi Yesu dwaro ni watim ang’o?
18 Yesu nojiwo ji mondo gibed jopuonjrene kendo gidhi nyime luwe. (Mat. 16:24) Omiyo, ka wasebedo ka watiyo ne Jehova kuom higni mang’eny, onego wang’ad mar dhi nyime timo kamano. Nyaka watim kinda mondo wadhi nyime makore gi yiero ma wasetimono. Kata obedo ni ok yot timo mano, wayudoga mor kod gueth mang’eny nikech wayiero tiyo ne Jehova!—Zab. 35:27.
19. Ranyisi mar Gene puonjowa ang’o?
19 Jomoko neno ni tiyo ne Jehova dwaro ni ng’ato otuonre gik mang’eny ahinya. Ka in rawera, dibed ni iparo ni tiyo ne Jehova en gima tek ahinya, kendo ni ok ibi yudo mor ka itiyone? Owadwa moro ma rawera miluongo ni Gene wacho kama: “Ne aneno ni bedo Janeno mar Jehova ne mona timo gik ma miya mor. Ne nenore ka gima mbesena ne timo gik ma miyogi mor kaka dhi e nyasi mopogore opogore, bedo gi osiepe ma yawuoyi gi ma nyiri, kata tugo tuke mag vidio mopong’ gi timbe gero, ka an to koni adhi mana e chokruok gi tij lendo.” Paro ma Gene ne nigono nomulo ngimane nade? Owacho kama: “Nachako timo gik moko maricho ma mbesena ne timo, kendo ne gimiya mor e okang’ moro. Kata kamano, ne en mana mor mar kinde machuok. Nachako paro ber mar luwo puonj mag Muma kendo nang’ado mar tiyo ne Jehova gi chunya duto. Chakre natim yierono, aseneno kaka Jehova dwoko lamoga.”
20. En ang’o monego wang’ad ni wabiro timo?
20 Jandik-zaburi moro nowero ne Jehova kama: “Ng’at mamor en ng’at miyiero kendo mikelo machiegni mondo odag e laru mari.” (Zab. 65:4) Omiyo, wang’aduru e chunywa ni wabiro dhi nyime tiyo ne Jehova, mana kaka Joshua notimo ka nowacho niya: “To an kaachiel gi jooda, wabiro tiyo ne Jehova.”—Jos. 24:15.
WER 28 Mako Osiep gi Jehova
a Nyinge moko oloki.
