1. Ere kaka jolendo mang’eny osenyiso ni gigombo tiyo ne Jehova e okang’ malach?

 NITIE gik mathoth ma pod onego watim kaka giko mar pinyni medo sudo machiegni. (Mat. 24:14; Luka 10:2; 1 Pet. 5:2) Waduto wagombo tiyo ne Jehova e okang’ malach kaka nyalore, kendo thothwa osebedo ka manyo yore ma ginyalo timogo kamano. Moko kuomwa gombo bedo jopainia, jo Bethel, kata konyo e tij gero ute mag lamo. Owete mang’eny bende temo matek mondo gibed jokony-tich kata jodong-kanyakla. (1 Tim. 3:1, 8) To mano kaka Jehova mor sama oneno ka jotichne gombo chiwore tiyone gi chunygi duto!​—Zab. 110:3; Isa. 6:8.

2. Wanyaloga winjo nade ka ok wayud migepe ma wagombo?

² Seche moko chunywa nyalo nyosore ka kinde malach kalo ka pok wayudo migepe ma wagombo. Kata, chunywa nyalo nyosore ka ok wanyal yudo migepe moko nikech hikwa kata weche mamoko. (Nge. 13:12) Mano e gima notimore ne Melissa. * Osebedo kogombo dhi e Bethel, kata e Skul mar Joland-Injili mar Pinyruoth, kata kamano, owacho kama: “Sani hika osekalo higni midwaro ni joma dhi e skundno kata Bethel obedgo. Ang’eyo ni sani ok anyal yudo migepego. Seche moko mano nyosoga chunya ahinya.”

3. En ang’o ma nyalo dwarore ni jomoko otim e ka gichop e migepe ma gigombo?

³ Nitie rowere ma seche moko nyalo dwarore ni onyag kido  moko ka pok omigi migepe momedore. Kata obedo ni samoro giriek, ging’adoga paro piyo-piyo, kendo gigombo timo mathoth, nyalo dwarore ni gimed nyiso ni gihore, ni gitimo gik moko adimba, kendo ni gimiyo jomamoko luor. Ka gitimo kinda mondo gibed gi kido kaka mago, gibiro po ka giyudo migepe ma gisebedo ka gigombo e sama ok gipar kata. Ne ane gima notimore ne Nick. Ka ne en jahigni 20, nowinjo marach ka ne ok okete jakony-tich. Owacho kama: “Naparo ni nitie gima rach koda.” Kata kamano, chuny Nick ne ok ojok. Notimo migepe ma nomiye gi kinda, kendo sani en achiel kuom owete manie Komiti mar Bad Ofis.

4. Ang’o ma wabiro nono e sulani?

⁴ Dibed ni chunyi onyosore nikech pok iyudo migawo moro migombo? Ka en kamano, nyis Jehova wachno. (Zab. 37:5-7) E wi mano, inyalo kwayo owete ma nigi lony mondo omiyi paro moko ma nyalo konyi timo dongruok e tij Nyasaye, kendo itim matek mondo iti gi paro ma gimiyigo. Kitimo kamano, inyalo po kiyudo migawo ma isebedo kigombono. Kata kamano, mana kaka notimore ne Melissa ma ne wasewuoyoe, samoro ok ibi yudo migawo migombono. Ka en kamano, ang’o minyalo timo mondo isik kimor? Sulani biro konyowa yudo dwoko mar penjono sama wanono weche ma luwogi: (1) Ere kama inyalo yudoe mor? (2) Ang’o minyalo timo mondo idhi nyime bedo mamor? (3) Gin chenro mage minyalo bedogo ma nyalo konyi medo mor ma in-go?

5. Onego waket pachwa kuom ang’o ka wadwaro bedo mamor? (Eklesiastes 6:9)

⁵ Eklesiastes 6:9 leronwa gima nyalo konyowa yudo mor. (Som.) Ng’at mamor “gi gik ma wang’e neno” goyoga erokamano ne gik ma en-go kod chal ma entie. Mopogore gi mano, ng’ama gombo gik ma oongego siko ka paro mana gik ma ok onyal yudo. Mano puonjowa ang’o? Ka wadwaro bedo mamor, onego waket pachwa mana kuom gik ma wan-go kod gik ma wanyalo yudo.

6. En ngero mane ma wadwaro nono, to ngerono biro puonjowa ang’o?

⁶ Be en gima nyalore mondo ng’ato obed mamor gi gima en-go? Ji mang’eny neno ni mano ok nyalre nikech giparo ni ng’ato nyalo bedo mamor mana koyudo gik manyien. Kata kamano, adiera en ni wanyalo bedo mamor gi gik ma wan-go sani. Ere kaka mano nyalore? Mondo wayud dwoko mar penjono, we wanon ane ngero ma ne Yesu ogoyo mar talanta ma yudore e Mathayo 25:14-30. Wabiro nono gima ngerono puonjowa e wi kaka wanyalo bedo mamor gi gik ma wan-go.

7. Ler ane machuok ngero ma ne Yesu ogoyo e wi talanta.

⁷ E ngero ma Yesu nogoyo mar talanta, ng’at moro ne chiegni dhi e wuoth moro mabor. Ka ne pok owuok, noluongo wasumbnine kendo nomiyo moro ka moro talanta mondo gitimgo ohala. * Nikech nong’eyo nyalo margi, nomiyo misumba mokwongo talanta abich, mar ariyo nomiyo ariyo, to mar adek nomiyo achiel. Wasumbni ariyo mokwongo notimo kinda ma giyudo ohala e wi talanta ma nomigi. Kata kamano, misumba mar adek ne ok otimo gimoro amora gi talanta ma nomiye, kendo ruodhe noriembe e tich.

8. En ang’o ma ne nyalo miyo misumba mokwongo obed mamor?

 ⁸ Nyaka bed ni misumba mokwongo ne mor ka ruodhe nomiye talanta abich. Mano ne en pesa mang’eny ahinya kendo mano nyiso kaka ruodhe nogene! To nade misumba mar ariyo? Chunye ne nyalo nyosore nikech ne ok omiye talanta mang’eny kaka nomi misumba mokwongo. Nokawo wachno nade?

9. En ang’o ma Yesu ne ok owacho e wi misumba mar ariyo? (Mathayo 25:22, 23)

⁹ Som Mathayo 25:22, 23. Yesu ne ok owacho ni misumba mar ariyo ne iye owang’ nikech ne omiye talanta ariyo kende. Bende Yesu ne ok owacho ni misumbano noywagore kowacho ni: ‘Ma kende e talanta minyalo miya? Donge an bende anyalo timo ohala maber mana kaka misumba ma nomi talanta abich? Ka ruodha ok ogena, anyalo pando talantaga ariyogi mondo adhi atim tijena.’

10. En ang’o ma misumba mar ariyo notimo gi talanta ma nomiye?

¹⁰ Mana kaka misumba mokwongo, misumba mar ariyo bende nokawo mapek migawo ma ruodhe nomiye kendo notimo migawono gi kinda. Mano nomiyo oyudo ohala nyadiriyo e wi talanta ma ruodhe nomiye. Ruodhe nomiye mich nikech kinda ma notimono. E wi mano, ruodhe ne mor kode kendo nomiye migepe momedore.

11. En ang’o minyalo timo mondo imed bedo mamor?

¹¹ Wan bende wanyalo medo morwa ka watimo duto ma wanyalo e migawo moro amora  ma Jehova omiyowa. Kuom mano, bed “modich ahinya” e tij yalo wach maber, kendo itim duto minyalo e kanyakla. (Tich 18:5; Hib. 10:24, 25) Ikri maber ne chokruoge mondo ichiw paro ma nyalo jiwo jomamoko e kanyakla. Ka po ni omiyi migawo e chokruok, time gi chunyi duto. To ka po ni omiyo tich moro ni tim e kanyakla, tem matek mondo irit sa kendo ibed ng’at minyalo gen. Kik icha tich kata migawo moro amora ma omiyi e kanyakla. Tem matek mondo imed lony ma in-go e wi tich kata migawo moro. (Nge. 22:29) Kaka imedo timo kinda e tich kata migawo moro momiyi, e kaka ibiro medo timo dongruok, kendo mor ma in-go biro medore. (Gal. 6:4) Mano bende biro miyo ibed mamor sama jomamoko oyudo migawo misebedo kigombo ahinya.​—Rumi 12:15; Gal. 5:26.

12. En ang’o ma Joneno moko ariyo notimo mondo gimed bedo mamor?

¹² Be iparo Nyaminwa Melissa ma wasewuoyo kuome motelo, ma ne gombo tiyo Bethel kata dhi e Skul mar Joland-Injili mar Pinyruoth? Kata obedo ni ne ok onyal yudo migepe ma nogombogo, pod owacho kama: “Atemoga matek mondo atim tij painia gi kinda kendo tiyo gi yore mopogore opogore mag lendo. Mano osekelona mor ahinya.” To nade Nick? En ang’o ma nokonye bedo mamor kata bed ni nowinjo marach ni ne ok okete jakony-tich? Owacho kama: “Naketo pacha e migepe ma ne an-go gie kindeno, kuom ranyisi, tij lendo kod chiwo paro ma jiwo jomamoko e kanyakla. Bende, napong’o fom mar Bethel kendo noluonga mana higa ma noluwo.”

13. En ang’o mibiro yudo kiketo pachi e migawo ma in-go sani kendo time gi kinda? (Eklesiastes 2:24)

¹³ Kiketo chunyi e migawo ma in-go gie sani, be inyalo yudo migepe mamoko momedore e kinde mabiro? Ee, mano nyalo timoreni mana kaka notimore ne Nick. To kata ka po ni ok iyudo migepe ma nigombo kaka notimore ne Melissa, pod inyalo bedo mamor ka idhi nyime timo duto minyalo e tij Nyasaye. (Som Eklesiastes 2:24.) E wi mano, ibiro bedo mamor ng’eyo ni Ruodhwa Yesu Kristo mor gi kinda mitimo.

14. En ang’o monego wapar sama wan gi chenro ma dwaher chopo e tij Nyasaye?

¹⁴ Be bedo ni koro waketo pachwa e migawo ma wan-go sani, nyiso ni koro ok onego wapar kuom yore mamoko ma wanyalo tiyonego Jehova e okang’ momedore? Ok en kamano kata matin! Wanyalo bedo gi chenro ma dwaher chopo e tij Nyasaye kaka medo lonywa e tij yalo kod puonjo, kaachiel gi konyo owete gi nyimine. Weche biro dhinwa maber ka waketo pachwa kuom konyo jomamoko kar keto pachwa kuomwa wawegi.​—Nge. 11:2; Tich 20:35.

15. Gin chenro mage minyalo bedogo ma nyalo miyo imed bedo mamor?

¹⁵ Gin chenro mage minyalo bedogo ma diher chopo? Kwa Jehova mondo okonyi fwenyo gik minyalo timo e kinde mabiro. (Nge. 16:3; Jak. 1:5) Be inyalo bedo gi chenro ma chal gi ma ne wasewuoyoe e  paragraf mokwongo e sulani, kuom ranyisi, bedo painia makonyo, painia mapile, tiyo e Bethel, kata konyo e tij gero ute mag lamo? Koso inyalo puonjori dhok machielo mondo idhi ikony tij yalo wach maber e piny machielo kata e alwora miwachoe dhokno? Mondo ing’e weche momedore e wi chenro kaka mago, som sula mar 10 e bug  Riwruok ma Timo Dwach Jehova kendo iwuo gi jodong-kanyaklau. * Sama itimo kinda mondo ichop e chenro kaka mago, dongruok mari biro nenore ayanga ne ji duto kendo ibiro medo bedo mamor.

16. En ang’o minyalo timo ka po ni sani ok inyal chopo e chenro moro?

¹⁶ To nade ka di po ni sani ok inyal chopo e migepe mosewuoyego? Many chenro machielo minyalo chopoe mayot. Ne ane moko kuomgi.

17. Ka luwore gi 1 Timotheo 4:13, 15, gin ang’o ma owadwa mosebatisi nyalo timo mondo obed japuonj molony?

¹⁷ Som 1 Timotheo 4:13, 15. Ka po ni in owadwa mosebatisi, inyalo timo kinda mondo imed lony e golo twege kod puonjo. Ang’o momiyo mano dwarore? En nikech kiketo “chunyi kuom” yo misomogo, kaka igolo twege, kod rang’iny mipuonjogo, ibiro konyo jowinjoni ahinya. Tem bedo gi chenro kaka mar puonjori weche manie brosua mar Ket Chunyi Kuom Somo kod Puonjo kendo iti gi gik mipuonjorigo. Non moro ka moro kuom wechego kendo itim tiegruok ka in pacho, kae to iti gi wechego sama itimo migawo mari e kanyakla. Kwa jatieg jogol-twak * kata jodong-kanyakla molony e puonjo mondo gikonyi gi paro moko. (1 Tim. 5:17) Kik iket pachi mana kuom kaka inyalo tiyo gi lony moro, to ket pachi e yo minyalo konyogo jowinjo magi mondo obed gi yie motegno kendo jiwogi mondo gikaw okang’ moro ma dwarore. Kitimo kamano, ibiro bedo mamor kaachiel gi joma winji bende.

18. Gin ang’o ma nyalo konyowa medo lony e tij lendo?

 ¹⁸ Waduto wan gi migawo mar yalo wach maber kendo loko ji obed jopuonjre Yesu. (Mat. 28:19, 20; Rumi 10:14) Be diher medo lony mari e tich ma dwarore ahinyani? Inyalo keto chenro mar puonjori tiyo gi paro mochiw e brosua mar Somo kod Puonjo kendo tiyo gi gik misepuonjorigo. Inyalo yudo paro momedore e bug Ngimawa kod Tijwa Kaka Jokristo​—Chenro mar Chokruok kaachiel gi vidio mitang’onwaga mag weche mwanyalo chako wuoyogo gi ji. Tem tiyo gi yore mopogore opogore mondo ifweny yo ma nyalo tiyoni maber. Ka itiyo gi paro kaka mago, ibiro bedo japuonj molony kendo mano biro miyo imed bedo mamor.​—2 Tim. 4:5.

19. Ang’o ma wanyalo timo mondo wabed gi kido ma dwarore kuom Jokristo?

¹⁹ Sama iketo chenro mar gik ma diher chopo, kik wiyi wil gi achiel kuom chenro madongo, ma en timo kinda mondo ibed gi kido ma dwarore kuom Jokristo. (Gal. 5:22, 23; Kol. 3:12; 2 Pet. 1:5-8) Ere kaka inyalo timo mano? Kuom ranyisi, wawach ni diher bedo gi yie motegno, nyalo dwarore ni isom sula mopogore opogore ma nigi paro ma nyalo konyi tego yieni. Bende inyalo yudo ber ka ineno vidio mopogore opogore mag JW Broadcasting^® ma nyiso kaka owete gi nyimine osenyiso yie makende sama ginyagore gi tembe mopogore opogore. Kae to inon ane yo minyalo luwogo ranyisi margi.

20. En ang’o mwanyalo timo mondo wamed bedo mamor kendo wadwok chien gik ma nyalo nyoso chunywa?

²⁰ Onge kiawa ni waduto dwaher timo momedore ne Jehova moloyo kaka watimo sani. E piny manyien, wabiro tiyo ne Nyasaye e okang’ makare chuth. Gie sani, wanyalo medo bedo mamor kendo dwoko chien gik ma nyalo nyoso chunywa ka watimo duto ma wanyalo e tij Nyasaye. To maduong’ie moloyo, wabiro kelo duong’ kod pak ne Jehova ‘Nyasachwa mamor.’ (1 Tim. 1:11) Kuom mano, wadhiuru nyime bedo mamor gi migawo ma wan-go sani!