DWE mar Novemba 1932 ne dhi ka rumo. Noyudo juma achiel osekadho nyaka ne taya mag sitima ma menyo ndara chak tiyo e taon mar Mexico City, ma en taon modich kendo moting’o dhano mokalo milion achiel. Kata kamano, wach teyinigo koro ne ok en gima nyien kendo. Jofwambo gi keyo sani koro oketo pachgi e wach moro madhi timore jumani. Gisechokore e stend mar gach reru kendo giikore gi kamera ka girito wendo moro modhial. Wendono en Joseph F. Rutherford, ma gie kindego ne ochung’ ne tije duto mag Watch Tower Society. Joneno mag Jehova manie piny Mexico bende ne nitie kanyo ka girito gi siso rwako Owadwa Rutherford, ma ne dhi e chokruok maduong’ mar ndalo adek e pinyno.

Gaset mar The Golden Age nowacho kama: “Onge kiawa ni chokruogni ibiro par kuom higni mang’eny nikech en chokruok ma biro miyo adiera omed landore e piny Mexico.” Kata kamano, ang’o momiyo chokruogno ne en makende kata obedo ni ji 150 kende e ma nochope?

Ka ne pok chokruogno otimore, tij lendo ne onge gi nyak ahinya e piny Mexico. Chakre higa mar 1919, ne itimoga chokruoge mag alwora, kata kamano, kwan mag kanyakla ne siko dok chien higa ka higa. Ka ne oyaw ofis Joneno e taon mar Mexico City e higa mar 1929, mano ne en gima ber ahinya. Kata kamano, ne nitie pek moko. Ka ne riwruokwa ochiko ni jopainia kik tim ohala seche ma gilendo, painia moro ne ochwanyore mi oweyo bedo Janeno, kendo ne odhi mochako grube owuon mar puonjruok Muma. Gie kindego bende, owadwa ma ne tayo tije ofis e piny Mexico ne otimo richo kendo ne ogole. Onge kiawa ni Joneno manie piny Mexico nonego ojiw gadier.

Ka ne Owadwa Rutherford odhi e piny Mexico, ne ogolo twege ariyo ma nojiwo owete e chokruogno. E wi mano, nogolo twege mamoko abich e redio. Mano e kinde ma redio mag piny Mexico nohango landoe wach maber e pinyno duto. Bang’ chokruogno, owadwa ma ne ochung’ ne ofis mar Joneno e piny Mexico nochako chano tij lendo kendo. Mano nomiyo owete gi nyimine odhi nyime lendo gi kinda mi Jehova noguedhogi ahinya.

E higa mar 1933, ne otim chokruoge madongo ariyo e piny Mexico. Achiel notim taon mar Veracruz to machielo notim e taon mar Mexico City. Kinda ma owete gi nyimine noketo e tij lendo nochako kelo nyak. E higa mar 1931, ne nitie mana jolendo 82 kende. Higni apar bang’e, kwanno nomedore nyadi par! Jolendo ma dirom 1,000 nobiro e chokruok mar Theocratic Assembly ma notim Mexico City e higa mar 1941.

E higa mar 1943 Joneno mag Jehova nochako lando chokruok maduong’ ma wiye ne wacho ni “Free Nation” ma ne gidhi bedogo e taonde 12 e piny Mexico. * Ne gitimo kamano ka girwako  otese ma dongo. Ne girwako otese ariyo ma dongo ka achiel ni e nyimgi to machielo ni e ng’egi. Mano ne en yor timo kampen ma Joneno nosebedo ka tiyogo chakre higa mar 1936.

Gaset miluongo ni La Nación nowuoyo e wi otese ma dongo ma Joneno notimogo kampen e taon mar Mexico City kowacho kama: “Odiechieng’ mokwongo [mar chokruok], nokwa [Joneno] mondo ogwel ji mang’eny. Odiechieng’ ma ne luwo, ji nobiro mang’eny ma gihewo kar chokruok.” Kampenno ne ok omoro Kanisa mar Katholik kendo ne gitimo kampen mar pingo Joneno. Kata obedo ni ne ikwedogi kamano, owete gi nyimine ne odhi nyime lendo e nderni mag Mexico City. La Nación nondiko bende kama: “Ji duto manie taon noneno . . . chwo gi mon morwako otese milendogo.” Gasedno nogoyo picha mar owete gi nyimine ka gin e taon mar Mexico City. E bwo pichano nondike weche ma wacho ni: “Gikwako taon.”

E hignigo, ne chuno Joneno mang’eny mondo ochiwre ahinya ka ne gidwaro dhi e chokruoge ma dongo ma ne itimo e piny Mexico. Joneno mathoth ne odak e gwenge mosokore ma kata gach reru ne ok chopie. Kanyakla moro nondiko niya, “Gima okalo kae ne en mana lain mar telegraph.” Omiyo, ne chuno owete ni oidh farese kata owuoth kuom ndalo mang’eny e ka gichop e stend mar gach reru ma ne nyalo terogi e taon mitime chokruok ma duong’.

Thoth Joneno nodhier ma kata chulo pes wuoth ma terogi e chokruok kende ne ok ginyal. Ka ne gichopo, owete manie taon mitimoe chokruok ne rwakogi gi chuny ma huyanga. Moko to ne nindoga e Ute mag Romo. Nitie kinde moro ma Joneno moko ma dirom 90 ne onindo e ofis Joneno e katonde mag buge. Ne gichano katonde piero ariyo ariyo maber e lain kae to gininde. Yearbook nowacho ni owetego ne mor ahinya gi katonde ma ne ginindego ma giwacho ni, “giyom kendo giliet moloyo dier ot mar simiti.”

Jonenogo ne neno ni bedo e chokruok gi Jokristo wetegi ne ber moloyo chiwruok moro amora ma ne ginyalo timo. Sani kwan mar jolendo man Mexico hawo milion achiel, kendo owete pod nigi chuny mar goyo erokamano. * Ripot ma ofis ma Mexico noora e higa mar 1949 nowacho kama e wi owete gi nyimine: “Pek ma owete osebedogo ok osedwoko kindagi chien e tije Nyasaye nikech sa asaya ma wabedo gi chokruok maduong’, owete gi nyimine dhi nyime wuoyo e wi chokruogno kuom kinde malach kendo gidong’ ka gipenjore niya, Wabiro bedo gi chokruok machielo karang’o?” Mana kaka e kindeno, owete pod nigi siso mar dhi e chokruoge ma dongo e ndalogi bende.—Moa e giwa machon e Central America.