Yesu koro ool nikech osebedo gi odiechieng’ modich ahinya. Kochopo godhiambo, owacho ne jopuonjrene niya: “Wang’aduru wadhi e wath loka machielo” e alwora mar Kapernaum.​—Mariko 4:35.

Alwora mar Jo-Gerasi yudore loka yo wuok-chieng’ mar Nam Galili. Alworano bende iluongo ni Dekapoli. Joma odak e taonde mag Dekapoli luwo puonj, timbe, kod chike mag oganda Jo-Grik. Kata kamano, Jo-Yahudi bende odak e taondego.

Ji fwenyo sama Yesu owuok Kapernaum. Yiedhi mamoko bende chako ng’ado namno. (Mariko 4:36) Kuom adier, loka namno chiegni. Bor mar Nam Galili en kilomita 21 kama, to lachne en kilomita 12 kama. Kata kamano, namno tut.

Kata obedo ni Yesu en ng’at makare chuth ma onge richo, adier en ni ool nikech tij yalo mosetimo kuom odiechieng’no mangima. Omiyo, sama yie chako dhi, Yesu teno wiye e raten-wich man chien e yie kendo nindo tere.

Kata obedo ni thoth joote Yesu ong’eyo kwang’o yie maber, wuodhgino ok dhi bedo mayot. Nitie gode molworo Nam Galili koni gi koni, kendo mano miyo seche moko pi namno bedoga ma mor-mor. Omiyo, sama yamo mang’ich kudho kowuok e wi godego kochomo wi nam, apaka muochga kae to yamo bedo mager moloyo. Kendo mano e gima timore. Mapiyo, apaka goyo yie, kae to gichandore nikech pi chako “pong’onegi yie.” (Luka 8:23) Yesu to pod nindo!

Jokwang’-yie temo matek ka gitiyo gi lony ma gin-go mondo gichik yie e yamo magerno. Kata kamano, wang’ni to opogore. Nikech giluor ni ginyalo tho, gichiewo Yesu kendo wachone kama: “Ruoth, reswa, wachiegni tho!” (Mathayo 8:25) Jopuonjre koro luor ni gibiro nimo!

Yesu chiew kae to openjo jootene kama: “Ang’o momiyo uluor kamano un joma nigi yie matin-gi?” (Mathayo 8:26) Kae to Yesu chogo yamo kod nam kowacho niya: “Kue mos! Ling’ thi!” (Mariko 4:39) Yamo magerno ling’ kendo nam kue mos. (Injili mag Mariko kod Luka wuoyo e wi hono ma ne otimoreni. Gichako kuom nyiso ni Yesu kueyo yamo magerno kae to giwuoyo e wi yie matin ma jopuonjre nigo.)

Parie kaka wachno mulo chuny jopuonjre! Gia neno kaka yamo mager oa kutho e namno, to apoya nono namno kue thi. Luoro maduong’ makogi. Giwacho e kindgi niya: “Jali en ng’a gadier? Kata mana yamo kod nam winje.” Gitony kendo gichopo maber loka namno. (Mariko 4:41–5:1) Nyalo bedo ni yiedhi mamoko ma ne ng’ado kodgi namno olokore modok kuma giaye.

Mano kaka en gima chiwo hoch ng’eyo ni Wuod Nyasaye nigi teko e wi gik ma chalo kaka yamo mager! E kinde ma Pinyruodhe biro locho e piny mangima, ji duto biro dak gi kue nikech onge gik ma biro kelonegi luoro!