Yesu osetemo konyo ji e yore mang’eny mondo gipar matut kuom winjruok ma gin-go gi Nyasaye. Bang’ wuoyo gi oganda ma ne ni oko e od Ja-Farisaicha, thuolo moro chako neno kendo.

Moko kuomgi wuoyo kuom masira moro ma ne otimore. Giwuoyo e wi “Jo-Galili ma [Pontio] Pilato [Gavana ma Rumi noketo] noruwo rembgi gi misengni ma ne gichiwo.” (Luka 13:1) Tiend gima giwacho en ang’o?

Nyalo bedo ni Jo-Galiligo e ma ne oneg kane oganda maduong’ mar Jo-Yahudi ong’anjo ne Pilato kuom tiyo gi pesa ma nogolo e kar keno mar hekalu mondo ogergo mtaro mag kelo pi Jerusalem. Nyalo bedo ni jotend hekalu e ma ne oyie ne Pilato mondo okaw pesago. Nenore ni joma wuoyo kuom masirano paro ni Jo-Galiligo noyudo masirano nikech richo moro ma ne gitimo. Yesu to ok yie gi paro ma gin-gono.

Yesu penjogi kama: “Be uparo ni Jo-Galiligo ne gin joricho ma loyo Jo-Galili mamoko duto nikech ne giyudo sandruok ma kamago?” Ong’eyo ni dwoko mar penjono en ooyo. Kata kamano, otiyo gi masirano e miyo Jo-Yahudi siem niya: “Ka ok uloko chunyu ua e richo, uduto ibiro kethu kamano.” (Luka 13:2, 3) Kae to Yesu wuoyo kuom masira machielo ma nenore ni samoro nyocha oa timore machiegni e kinde mag gero mtaro mag pigego.

Openjogi kama: “Ji 18 ma ot moro ma rabora nopodho kuomgi Siloam kendo negogi​—be uparo ni ne gin gi ketho moloyo jomamoko duto modak Jerusalem?” (Luka 13:4) Oganda nyalo paro ni jogo ne otho nikech nitie ketho moro ma ng’ato ka ng’ato kuomgi ne otimo. Gie kindeni bende, Yesu ok yie gi parogino. Ong’eyo ni “kinde kod gik ma timore apoya” yudoga ji, to nyalo bedo ni mano e momiyo masirano notimore. (Eklesiastes 9:11, New World Translation) Kata kamano, ogandano onego oyud puonj kuom masira ma ne otimoreno. Yesu wachonegi kama: “Ka ok uloko chunyu ua e richo, uduto ibiro kethu kaka gin.” (Luka 13:5) To kare ang’o momiyo Yesu jiwo puonjni gie sani?

Mano luwore gi kinde mosechopoe nyaka ne ochak puonjo. Omiyo, ochiwo ranyisi kama: “Ng’at moro nopidho yadh ng’owo e puothe mar mzabibu, kendo nobiro manyo olemo kuome to ok noyudo. Mi nowacho ne jatij puoth mzabibu ni, ‘Sani koro en higa mar adek ma asebedo ka abiro manyo olemo e yadh ng’owoni, to ok ayud gimoro. Tong’e! Marang’o oketho lowo nono?’ To en nodwoke ni, ‘Ruodha, yie iweye ane higa achiel kendo nyaka chop apur alworane mi aketne manyiwa. Ka onyago olemo e kinde ma biro, mano nobed maber; to ka ok onyago eka initong’e.’”​—Luka 13:6-9.

Kuom higni mokalo adek, Yesu osebedo ka temo ahinya mondo okony Jo-Yahudi obed gi yie. To e ma Jo-Yahudi manok kende e ma osebedo jopuonjrene, kendo gin e ma inyalo kwan-gi kaka nyak mar tichne. Nikech sani en chak hike mar ang’wen e tije e piny, koro omedo kindane ahinya. Tij yalo kod puonjo mosebedo kotimo e alwora mar Judea kod Perea, osemiyo obedo kaka ng’at ma doyo yadh ng’owo kendo ketone manyiwa. Ji rwako wechenego nade?  Mana Jo-Yahudi manok kende e ma kawo okang’ ma dwarore. Inyalo wach ni oganda duto mar Jo-Yahudi to tamore loko chunygi kendo koro gima ritogi en mana kethruok.

Chieng’ Sabato moro, kit Jo-Yahudi mar bedo joma ok lok chunygi nenore ayanga kendo. Ka Yesu puonjo e sunagogi, oneno dhako moro ma jachien osebedo ka chando. Dhakono osebedo kodolore ma dak ochung’ moriere tir kuom higni 18. Yesu kecho dhakono kendo owachone niya: “Dhako, osegonyi kuom tuoni.” (Luka 13:12) Yesu keto lwetene kuom dhakono. Gikanyono, dhakono chung’ tir kae to ochako miyo Nyasaye duong’.

Gima otimoreno miyo jatelo ma tayo e sunagogi bedo gi mirima. Owacho ne ji kama: “Nitie odiechienge auchiel ma ji onego otimie tich; omiyo biuru e odiechiengego mondo ochangu, to ok e chieng’ Sabato.” (Luka 13:14) Jatelono ok tamre ni Yesu nigi teko mar chango ji; kar mano, okwedo joma biro mondo Yesu ochanggi chieng’ Sabato! Yesu dwoko e yo ma winjore maler kama: “Un joma wuondore, donge ng’ato ka ng’ato kuomu jagonyo ruadhe kata pundane kogole e kul kendo otere modho? Koro dhako ma nyar Ibrahim-ni, ma Satan osetueyo kuom higni 18, donge ber ka ogonye kuom gima osetueyeni e chieng’ Sabato, koso?”​—Luka 13:15, 16.

Joma kwedo Yesugo yudo wich-kuot, to oganda mochokore kanyo bedo mamor gi gik mabeyo miwuoro ma gineno ka Yesu timo. E alwora mar Judea kae, Yesu nwoyoe ranyisi moko ariyo mag weche mokor e wi Pinyruoth ma noyudo osewuoyoe motelo kobet e yie e Nam Galili.​—Mathayo 13:31-33; Luka 13:18-21.