Ka pok Yesu odok Galili, oduogo ir Johana jal ma ne obatise. Otimo kamano bang’ tieko ndalo 40 e thim. Sama Yesu chiegni chopo, Johana sieme ne joma ni kode kowachonegi niya: “Neuru, Nyarombo mar Nyasaye ma golo richo mar piny oko! Ma e ng’at ma nawacho kuome niya: ‘Nitie ng’at ma biro bang’a to osetelo e nyima nimar ne entie ka pok nabetie.’” (Johana 1:29, 30) Kata obedo ni hik Johana ohingo mag Yesu, ong’eyo ni Yesu ne odak e polo kata ka en pok nobetie.

Jumbe moko motelo ne mano, ka Yesu nobiro mondo obatise, Johana ne ok ni gadier ni Yesu e ma ne dhi bedo Mesia. Johana wacho ayanga niya: “To bende ne ok ang’eye, to gimomiyo ne abiro ka abatiso ji gi pi ne en ni mondo ng’atno ong’ere maler ne Israel.”​—Johana 1:31.

Johana dhi nyime wacho ne joma winje gik ma ne otimore sama ne obatiso Yesu. Owachonegi kama: “Ne aneno roho ka lor piny koa e polo kaka akuru, mopiyo kuome. Bende, ne ok ang’eye kata, to Jal ma noora mondo abatis ji gi pi e ma nowachona ni, ‘Ng’at ma inine ka roho olor kendo obet kuome, ma e ng’atno ma batiso ji gi roho maler.’ Kendo aseneno mano, mi asechiwo neno ni jali e Wuod Nyasaye.”​—Johana 1:32-34.

Kinyne, Yesu yudo ka Johana nigi jopuonjrene ariyo. Johana wacho ne jopuonjrenego kama: “Neuru, Nyarombo mar Nyasaye!” (Johana 1:36) Gikanyono, jopuonjre ariyo mag Johana Jabatisogo luwo Yesu. Achiel kuom jopuonjrego iluongo ni Andrea. Nenore ni japuonjre machielono to en jal ma nondiko weche ma ne otimoregi, ma bende iluongo ni Johana. Inyalo wach ni mae en Johana ma wat Yesu, nimar nenore ni Salome ma min Johanano en nyamin Maria. Chwor Salome iluongo ni Zebedi.

Ka Yesu lokore, oneno Andrea gi Johana ka luwo bang’e kae to openjogi niya: “En ang’o ma umanyo?”

Gipenje ni, “Rabi, idak kanye?”

Yesu dwokogi kama: “Biuru, kendo unune.”​—Johana 1:37-39.

Chiegni ni koro en sa apar odhiambo, to Andrea gi Johana pod ni kod Yesu. Gibedo kode kuom thuolo modong’ duto mar odiechieng’no. Andrea mor sidang’ mi bang’ romo gi owadgi ma en Simon, ma bende iluongo ni Petro, owachone kama: “Waseyudo Mesia.” (Johana 1:41) Andrea tero Petro ir Yesu. Gik ma timore bang’e nyiso ni Johana bende yudo owadgi miluongo ni Jakobo, kendo okele ir Yesu. Kata kamano, Johana ok nyis mano e weche ma en owuon nondikogo.

E odiechieng’ ma luwo, Yesu yudo Filipo, ma wuok Bethsaida. Bethsaida yudore machiegni  gi wath man nyandwat mar Nam Galili, kendo mano e taond gi Andrea gi Petro. Yesu gwelo Filipo kowachone kama: “Bed jalupna.”​—Johana 1:43.

Bang’e Filipo yudo Nathaniel, ma bende iluongo ni Bathlomeo, kendo owachone kama: “Waseyudo jal ma Musa nondiko kuome e Chik kendo mondik wachne e weche Jonabi: en Yesu ma wuod Josef, ma wuok Nazareth.” Nathaniel riwo gi kiawa kae to openjo Filipo niya: “Be nitie gimoro maber ma nyalo wuok Nazareth?”

Filipo jiwe ni, “Bi mondo ine.” Yesu neno Nathaniel ka biro kendo owacho kama: “Neuru, Ja-Israel ma kuom adier, onge wuondruok kuome.”

Nathaniel penjo Yesu niya: “Ing’eya nadi?”

Yesu dwoko kama: “Ka pok Filipo ne oluongi, sama a ibet e tiend yadh ng’owo, ne aneni.”

Nathaniel wuoro kendo odwoke kama: “Rabi, in e Wuod Nyasaye, in Ruodh Israel.”

Yesu penje niya: “Be koro iyie kuoma mana nikech awachoni ni ne aneni e tiend yadh ng’owo? Ibiro neno gik madongo moloyo magi.” Kae to Yesu singo kama: “Adier akonu ni, ubiro neno polo koyawore, kendo ka malaike mag Nyasaye idho kendo lor ir Wuod dhano.”​—Johana 1:45-51.

Mapiyo bang’ mano, Yesu gi jopuonjre ma e ka oa yudogo wuok e Hoho mar Jordan kendo gidhi nyaka Galili.