Jehova ne omiyo dhano piny. Piny e dalawa. Omiyo, ji ariyo mokwongo, Adam gi Hawa, ne ok ochue ni mondo ginyuolre gipong’ polo, nimar Nyasaye ne osechueyo malaike mondo odag e polo. (Ayub 38:4, 7) Kar mano, Nyasaye ne oketo dhano mokwongo e paradiso ma jaber ma ne iluongo ni puodho mar Eden. (Chakruok 2:15-17) Jehova ne omiyo Adam kod kothe ngima maber ma ne onego odhi nyime nyaka chieng’ e piny.​—Som Zaburi 37:29; 115:16.

Mokwongo tiktik, puodho mar Eden kende e ma ne en paradiso. Dichwo gi dhako mokwongo ne onego onyuolre kendo gipong’ piny. Bang’ kinde, ne onego gichik gik moko duto e piny, gipong’e, kendo gilose obed paradiso. (Chakruok 1:28) Ok bi keth piny ngang’. Obiro bedo dala dhano nyaka chieng’.​—Som Zaburi 104:5.

Ne vidioni: Ang’o Momiyo Nyasaye Ne Ochueyo Piny?

Adam gi Hawa ne ok owinjo chik Nyasaye, omiyo Jehova ne ogologi e puodho mar Eden. Paradiso ne olal, kendo onge dhano mosenyalo dwoke. Muma wacho niya: “Oseket piny e lwet jo maricho.”​—Ayub 9:24.​—Som Chakruok 3:23, 24.

Be Jehova osejwang’o gima ne odwaro timo ne dhano? Ooyo! En Nyasaye ma nyalo duto. Onge gima nyalo mone chopo dwarone. (Isaya 45:18) Obiro miyo oganda dhano ngima maber mana kaka ne odwaronegi a chakruok.​—Som Zaburi 37:11, 34.

Piny biro bedo paradiso kendo e kinde ma Yesu biro locho kaka Ruoth ma Nyasaye oketo. E lweny miluongo ni  Har–Magedon, Yesu biro telo ne malaike mag Nyasaye mondo giketh jogo duto ma kwedo Nyasaye. Kae to, Yesu biro tueyo Satan kuom higini 1,000. Oganda Nyasaye biro tony e kethruogno nikech Yesu biro telonegi kendo ritogi. Gibiro dak nyaka chieng’ e Paradiso e piny.​—Som Fweny 20:1-3; 21:3, 4.

Nyasaye biro tieko richo e piny karang’o? Yesu ne ochiwo “ranyisi” ma ne dhi konyo e fwenyo ni giko chiegni. Gik ma timore gie sani keto ngima dhano ka marach kendo nyiso ni wadak e “giko mar ndalo.”​—Som Mathayo 24:3, 7-14, 21, 22.

E kinde loch Yesu mar higini 1,0e wi piny ka en e polo, obiro tieko chandruoge duto. (Isaya 9:6, 7; 11:9) E wi mano, Yesu biro tiyo kaka Jadolo Maduong’, kendo obiro golo richo duto. Omiyo, Nyasaye biro tiyo gi Yesu mondo otiek tuoche, bedo moti, kod tho.​—Som Isaya 25:8; 33:24.

Jogo ma timo dwach Nyasaye biro dak e Paradiso. (1 Johana 2:17) Yesu ne opuonjo jolupne ni gimany jogo ma muol kendo gipuonjgi kaka ginyalo timo dwach Nyasaye. E kindewagi, Jehova iko ji tara gi tara mondo obi odag e Paradiso e piny kinde ma biro. (Zefania 2:3) E Ute Romo mag Joneno mag Jehova, ji puonjore kaka ginyalo bedo chwo kata wuone mabeyo, mon kata mine mabeyo. Nyithindo gi jonyuol lamo Nyasaye kanyachiel kendo gipuonjore kaka wach maber nyalo konyogi.​—Som Mika 4:1-4.