Jehoshafat ruodh Juda ne oketho kendo mag misango mag Baal gi sanamu duto ma ne ni e piny Juda. Ne odwaro ni ji ong’e chike Jehova. Omiyo, ne ooro jodongo kod Jo-Lawi e Juda duto mondo gipuonj ji chike Jehova.

Ogendni ma ne odak machiegni gi Jo-Juda ne oluor monjogi nikech ne ging’eyo ni Jehova ne ni kodgi. Ne gikelo nyaka mich ne Ruoth Jehoshafat. Kata kamano, Jo-Moab, Jo-Amon, kod joma ne a e alwora mar Seir nodhi monjo Jo-Juda. Jehoshafat nong’eyo ni Jehova e ma ne nyalo konyogi. Ne ochoko chwo, mon, gi nyithindo duto e Jerusalem. Nolemo e nyim ogandano kama: ‘Jehova, ok wanyal loyo lwenyni mak mana ka in e ma ikonyowa. Nyiswae gima onego watim.’

Jehova nodwoke kama: ‘Kik uluor. Abiro konyou. Un chung’uru achung’a kar tiendu mondo une kaka aresou.’ Ere kaka Jehova noresogi?

Kinyne gokinyi, Jehoshafat noyiero jower, monyisogi ni gipangre ka giwer e nyim jolweny. Ne gipangore ka gia Jerusalem nyaka e paw lweny ma ne ni kama iluongo ni Tekoa.

Sama jowergo ne pako Jehova gi mor kendo gi dwol maduong’, Jehova ne kedonegi. Ne omiyo Jo-Amon gi Jo-Moab ochochni ma gichako negore kendgi giwegi, mi githo te. Jehova ne orito Jo-Juda, jolwenygi, kaachiel gi jodolo maggi mondo kik hinygi. Ka ne pinje molworogi owinjo gik ma Jehova notimogo, ne ging’eyo ni adier, Jehova pod ne kedo ne Jo-Israel. Ere kaka Jehova resoga joge? Otimo mano e yore mang’eny. Ok ochuno ni dhano okonye.