Jo-Israel ne oweyo lamo Jehova kendo, mi gichako lamo nyiseche manono. Ka ne Jo-Amon omonjo Jo-Israel, nyisechegi manonogo ne ok okonyogi kata matin. Jo-Israel ne osandore kuom higni mang’eny. Nochopo kama ne gikwayo Jehova niya: ‘Wasetimo gik maricho mathoth e nyimi. Yie ireswa kuom jowasikwa.’ Jo-Israel ne oketho sanamu maggi, kendo ne gichako lamo Jehova. Jehova ne ok mor koneno Jo-Israel ka dhi nyime sandore kamano.

Ne oyier jalweny moro ma nyinge Jeftha mondo ota jolweny mamoko e kedo gi Jo-Amon. Jeftha ne osingore ne Jehova kama: ‘Ka ikonyowa loyo lwenyni, abiro chiwoni ng’at mokwongo romona sama aduogo dala.’ Jehova ne owinjo kwayo mar Jeftha, kendo nokonye loyo lweny.

 Ka ne Jeftha oduogo koa e lweny, ng’at ma nokwongo wuok mondo oromne ne en nyare achiel kende. Noringo kochomo ir wuon-gi komiel, kendo kogoyo oyieke. Jeftha ne dhi timo nang’o? Jeftha ne oparo gima nosingo ne Jehova. Nowacho kama: ‘Mayoo nyara! Inyoso chunya, nyathina. Nitie gima ne asingo ne Jehova. Nikech mano, biro chuno ni achiwi idhi iti Shilo e hema mar lamo.’ Kata kamano, nyare ne onyise niya: ‘Baba, ka isingori ne Jehova, nyaka ichop singono. An mana gi kwayo achiel kende: Yiena mondo adhi e gode gi osiepena ma nyiri kuom dweche ariyo kende. Kae to abiro dhi Shilo.’ Nyar Jeftha ne otiyo gi chunye duto e hema mar lamo kuom ngimane duto. Higa ka higa, osiepene ne dhiga lime Shilo.