Bang’ kinde moko ka ne Jo-Israel ni e thim, Kora, Dathan, Abiram, kod jomamoko 250 ne ong’anyo ne Musa. Ne ginyise kama: ‘Waol kodi! Be ochuno adier ni in e ma ibed jatendwa, to Harun obed jadolo maduong’? Jehova ni kodwa waduto, ok mana in kendi gi Harun.’ Jehova ne ok omor kata matin. Ne oneno ni en e ma jogo ne ng’anyone, to ok Musa!

Musa nonyiso Kora gi joge kama: ‘Kiny biuru e dho tabenakel kuting’o tewni moketie ubani. Jehova biro nyisowa e lela ng’ama oyiego.’

Kinyne, Kora gi joge 250 ne odhi ir Musa e nyim tabenakel. Ne gichako wang’o ubani, to mano ne en tij jodolo kende. Jehova nonyiso Musa gi Harun niya: ‘Auru kuom Kora gi joge.’

Kata obedo ni Kora ne odhi ir Musa e nyim tabenakel, Dathan gi Abiram gi joodgi to ne otamore dhi kuno. Jehova ne onyiso Jo-Israel mondo gibed mabor gi hembe mag Kora, Dathan, gi Abiram. Mapiyo piyo, Jo-Israel ne osudo gi chien. Dathan, Abiram, gi joodgi to ne ochung’ oko mar hembegi. Apoya nono, lowo  nobarore momwonyogi giduto! Kae to e dho tabenakel, mach noa malo mi owang’o Kora gi chwo 250 ma ne ni kode.

Kae to Jehova nonyiso Musa kama: ‘Kaw luth kuom ng’ato ka ng’ato motelo ne dhoudi 12 mag Israel, kendo indik nying ng’ato ka ng’ato e ludhe mokelo. Luth mowuok e dhood Lawi to indikie nying Harun. Ket ludhego duto te e tabenakel, kae to maua dhi dongo e luth ma ondikie nying ng’ama ayiero.’

Kinyne, Musa nokelo ludhego duto e nyim jotend dhoudigo. Luth ma nondikie nying Harun ne nigi maua kuome kod olemb mlozi mochiek. Mano e yo ma Jehova nonyisogo ni noyiero Harun mondo obed jadolo maduong’.