Jehova ne osingo kama: ‘Ywak, rem, tuoche, kata tho ok bi betie kendo. Abiro yweyo pi wang’ duto. Ji ok bi paro gik maricho duto ma notimorenegi chon.’

Jehova ne oketo Adam gi Hawa e puodho mar Eden mondo gidag gi kue kod mor. Ne onego gilam Wuon-gi manie polo, ka gin kanyachiel gi nyithindgi. Adam gi Hawa ne ok oluwo kaka Jehova ne ochikogi, kata kamano, dwach Jehova to ne ok olokore. Bugni osekonyowa neno ni gik moko duto ma Jehova osingo nyaka timre. Pinyruodhe biro kelo gueth mogundho e pinywani mana kaka Jehova nosingo ne Ibrahim.

Machiegnini, Satan, jochiendene, kaachiel gi joma richo duto biro bedo ma onge. Ji duto ma biro dong’ nolam Jehova. Ok wabi bedo matuo, kendo ok wabi tho. Kar mano, wabiro chiewoga pile ka watek kendo wangima ka siling’. Ngima biro bedo mamit. Piny duto  biro bedo paradiso. Ji duto biro bedo gi chiemo moromogi kod ute mabeyo. Wabiro dak e kind joma ng’won ma onge timbe gero. Le mag bungu ok bi luorowa, to wan be ok wabi luorogi.

Wabiro bedo mamor ahinya ka Jehova ochako chiero joma ne otho. Wabiro rwako joma ne odak e kinde machon, kaka Abel, Noa, Ibrahim, Sara, Musa, Esta, Daudi, gi mamoko. Gibiro riwore kodwa e loso pinywani obed paradiso. Wabiro bedo gi tije mathoth mabeyo.

Jehova diher ni in bende ibi idag e paradiso ma jaberno. E kindeno, ibiro ng’eyo Jehova e yo maber moloyo kaka ing’eye sani. Koro, donge ber ka wadhi nyime timo kinda pile ka pile mondo wamed sudo machiegni gi Jehova Nyasachwa sani, kendo nyaka chieng’!